મોદી સરકારની એક્સપાયરી ડેટ નજીક! ગોવામાં વોટ ચોરીના મુદ્દે રાહુલ ગાંધીના ભાજપ પર મોટા પ્રહાર

Rahul Gandhi Goa rally: ગોવામાં આગામી વિધાનસભા ચૂંટણીને લઈને અત્યારથી જ રાજકીય માહોલ ગરમાયો છે. તાજેતરમાં ગોવાના મડગાંવ ખાતે યોજાયેલી એક વિશાળ જાહેર સભામાં લોકસભાના વિપક્ષી નેતા રાહુલ ગાંધીએ કેન્દ્રની ભાજપ સરકાર અને ચૂંટણી પંચ પર અત્યાર સુધીના સૌથી આકરા પ્રહારો કર્યા છે. તેમણે સીધો અને સચોટ આરોપ લગાવ્યો છે કે મોદી સરકારની એક્સપાયરી ડેટ હવે એકદમ નજીક આવી ગઈ છે.

45 કેસ કર્યા, પણ ‘વોટ ચોરી' ના દાવા પર એક પણ કેમ નહીં?

સભાને સંબોધતા રાહુલ ગાંધીએ ભાજપ પર નિશાન સાધતા એક મોટો દાવો કર્યો હતો. તેમણે કહ્યું કે ભાજપના નેતાઓએ અત્યાર સુધીમાં તેમની સામે 45થી વધુ માનહાનિના કેસ દાખલ કર્યા છે. પરંતુ, તેઓ ખુલ્લેઆમ 'વોટ ચોરી' (મત ચોરી) ના આરોપો લગાવે છે છતાં તેમની સામે એક પણ કેસ કરવાની ભાજપની હિંમત થઈ નથી.

પીએમ મોદી અને અમિત શાહ ડરે છે: રાહુલ ગાંધી

કોંગ્રેસ નેતાએ સ્પષ્ટ શબ્દોમાં કહ્યું કે, "હું દરેક રાજ્યમાં જઈને ખુલ્લેઆમ કહું છું કે નરેન્દ્ર મોદી વોટની ચોરી કરે છે. છતાં મારી સામે કોઈ એફઆઈઆર કે કેસ થતો નથી. કારણ કે તેઓ ડરે છે કે જો આ મુદ્દે કેસ થશે, તો સમગ્ર મામલાની કાનૂની તપાસ થશે અને તેમાં તેઓ જાતે જ ફસાઈ જશે." આ ઉપરાંત તેમણે ગંભીર આરોપ લગાવ્યો કે પ્રધાનમંત્રી મોદી, ગૃહમંત્રી અમિત શાહ અને ચૂંટણી પંચ એકસાથે મળીને વિપક્ષના મતો ગાયબ કરવાનું અને પોતાના મતો વધારવાનું ષડયંત્ર રચે છે.

કોંગ્રેસ કાર્યકરોને સતર્ક રહેવા ખાસ અપીલ

ગોવાની આગામી ચૂંટણી પહેલા રાહુલ ગાંધીએ પોતાના કાર્યકરોમાં નવો જોશ ભર્યો હતો. તેમણે કેટલીક ખાસ વાતો પર ભાર મૂક્યો. કોંગ્રેસના કાર્યકરોએ દેશના બંધારણના રક્ષક બનીને એકદમ સતર્ક રહેવાની જરૂર છે. આગામી ચૂંટણીમાં ક્યાંય પણ મતોની ચોરી કરવાનો પ્રયાસ થાય, તો તેને પકડવાની સીધી જવાબદારી કાર્યકરોની રહેશે. તેમણે ગોવાની ભાજપ સરકાર પર આરોપ લગાવ્યો કે સરકાર સ્થાનિક લોકોના હિતોને નેવે મૂકીને માત્ર પોતાના ઉદ્યોગપતિ મિત્રોને જ ધનવાન બનાવી રહી છે.