ચૂંટણી પંચ વિરુદ્ધ વિપક્ષનો હલ્લાબોલ: રાહુલ ગાંધીની આગેવાનીમાં જંતર-મંતર તરફ કૂચ, દિલ્હીમાં કલમ 163 લાગુ

નવી દિલ્હીમાં ચૂંટણી પંચ અને વિપક્ષી સાંસદો વચ્ચેનો વિવાદ હવે ચરમસીમાએ પહોંચ્યો છે. દિલ્હીના રસ્તાઓ પર ફરી એકવાર પોલીસ અને વિપક્ષી નેતાઓ વચ્ચે મોટા ઘર્ષણના એંધાણ જોવા મળી રહ્યા છે. કોંગ્રેસના વરિષ્ઠ નેતા રાહુલ ગાંધીએ જાહેરાત કરી છે કે તેઓ ઇન્ડિયા ગઠબંધનના તમામ સાંસદો સાથે મળીને જંતર-મંતર ખાતે મોટું વિરોધ પ્રદર્શન કરશે.

આ જાહેરાત બાદ જનપથ પર વિપક્ષી સાંસદોનો જમાવડો શરૂ થઈ ગયો છે. પરિસ્થિતિને કાબૂમાં લેવા માટે દિલ્હી પોલીસે સુરક્ષા વ્યવસ્થા ખૂબ જ કડક કરી દીધી છે.

રાહુલ ગાંધીનું આક્રમક વલણ: '100 FIR થાય તો પણ પરવા નથી'

પોતાના નિર્ધાર પર અડગ રહેતા રાહુલ ગાંધીએ વિરોધ પ્રદર્શન દરમિયાન ખૂબ જ આક્રમક નિવેદન આપ્યું છે. તેમણે કહ્યું કે, "મારી સામે પહેલાથી જ 45 FIR નોંધાઈ ચૂકી છે. જો હવે આ આંકડો વધીને 100 થઈ જશે તો પણ મને કોઈ જ પરવા નથી." તેમણે વધુમાં કહ્યું કે આ FIR તેમના માટે કોઈ મેડલથી કમ નથી અને તેઓ કોઈપણ ભોગે લોકશાહીનો અવાજ દબાવા દેશે નહીં. તેઓ પોતાના સાથી સાંસદો સાથે જંતર-મંતર સુધી કૂચ કરીને જ રહેશે.

વિપક્ષના વિરોધને જોતા જંતર-મંતર અને તેની આસપાસના વિસ્તારોમાં ભારતીય નાગરિક સુરક્ષા સંહિતાની કલમ 163 લાગુ કરી દેવામાં આવી છે. દિલ્હી સીઈઓ કચેરી અને કાશ્મીરી ગેટ પાસે કોંગ્રેસ અને આમ આદમી પાર્ટીના કાર્યકરો ભારે દેખાવો કરી રહ્યા છે. પોલીસે હાલમાં 'વેઇટ એન્ડ વોચ' ની નીતિ અપનાવી છે. પોલીસ અધિકારીઓએ સ્પષ્ટ ચેતવણી આપી છે કે જો સાંસદો જંતર-મંતર, કનોટ પ્લેસ કે વિન્ડસર પેલેસ તરફ આગળ વધવાનો પ્રયાસ કરશે તો તેમની તાત્કાલિક અટકાયત કરવામાં આવશે.

ગઈકાલે શું થયું હતું? જાણો 'સેવ ડેમોક્રસી માર્ચ' નો ઘટનાક્રમ

મુખ્ય ચૂંટણી કમિશનર જ્ઞાનેશ કુમાર પર મત ચોરી અને 'સર' અભિયાન હેઠળ કરોડો મતદાતાઓના નામ કમી કરવાના ગંભીર આક્ષેપો લાગ્યા છે. આ મુદ્દે ગઈકાલે ભારે રાજકીય ડ્રામા થયો હતો.

140 થી વધુ વિપક્ષી સાંસદોએ સંસદ ભવનથી ચૂંટણી પંચ સુધી 'સેવ ડેમોક્રસી માર્ચ' કાઢી હતી. પોલીસે તેમને ચૂંટણી પંચની કચેરીથી 300 મીટર દૂર જ રોકી લીધા હતા, જેના કારણે સાંસદો બેરિકેડ પર ચઢી ગયા હતા અને તિરંગો લહેરાવ્યો હતો. ચૂંટણી પંચના અધિકારીઓ સાથે મુલાકાત ન થતાં, નેતાઓ આકાશવાણી ભવનના કેમ્પસમાં એક ઝાડ નીચે સળંગ 9 કલાક સુધી ધરણાં પર બેસી રહ્યા હતા.

મોડી રાત્રે પ્રિયંકા ગાંધી અને અખિલેશ યાદવની અટકાયત

વિપક્ષી નેતાઓનો આક્ષેપ છે કે ચૂંટણી પંચ તેમને મળવાનો સમય આપી રહ્યું નથી. ગઈકાલે મોડી રાત્રે દિલ્હી પોલીસે કાર્યવાહી કરતા પ્રિયંકા ગાંધી અને અખિલેશ યાદવ સહિત 50 થી વધુ સાંસદોની અટકાયત કરી હતી અને તેમને કિંગ્સવે કેમ્પ ખાતે લઈ જવામાં આવ્યા હતા.

આ પણ વાંચો-'ટીકાકારોએ મને મારી અંદર જોતા શીખવ્યું', પીએમ મોદીના રાજકીય સફરના 25 વર્ષ પૂર્ણ, સેવા જ્યોતિ કાર્યક્રમમાં કહી આ મોટી વાતો