Gujarat politics: ‘આપ’ના ધારાસભ્ય ઉમેશ મકવાણાનો મોટો નિર્ણય, દંડકપદેથી આપ્યું રાજીનામું, MLA પદ માટે જનતાને પૂછશે

Gujarat politics: આમ આદમી પાર્ટી (AAP)ના બોટાદના ધારાસભ્ય ઉમેશ મકવાણાએ પાર્ટીના દંડકપદ અને રાષ્ટ્રીય જોઇન્ટ સેક્રેટરીના હોદ્દા પરથી રાજીનામું આપી દીધું છે. જોકે, તેમણે ધારાસભ્યપદેથી રાજીનામું આપવા અંગે હજુ નિર્ણય લીધો નથી અને આ માટે તેઓ જનતાનો અભિપ્રાય લેશે. આ નિર્ણયથી AAPમાં ખળભળાટ મચી ગયો છે, અને રાજકીય વર્તુળોમાં ચર્ચાઓ શરૂ થઈ છે.

AAP પર ગંભીર આરોપ

ઉમેશ મકવાણાએ પાર્ટી પર ગંભીર આરોપ લગાવ્યા છે. તેમણે કહ્યું કે, "વિસાવદરની પેટાચૂંટણીમાં ગોપાલ ઇટાલિયા માટે આખી AAP મેદાનમાં ઉતરી, પરંતુ કડીના દલિત ઉમેદવાર જગદીશ ચાવડાને એકલા મૂકી દેવાયા." તેમણે એમ પણ જણાવ્યું કે દરેક પાર્ટીમાં જાતિવાદી માનસિકતા વધી રહી છે અને પછાત સમાજના મુદ્દાઓ ઉપેક્ષાતા હોવાનો આક્ષેપ કર્યો.

ધારાસભ્યપદેથી રાજીનામું આપશે?

ઉમેશ મકવાણા કોણ છે?

ઉમેશ મકવાણા બોટાદ વિધાનસભા મતવિસ્તારમાંથી 2022માં AAPના ધારાસભ્ય તરીકે ચૂંટાયા હતા. તેમણે ભાજપના ઘનશ્યામ વિરાણી અને કોંગ્રેસના મનહર પટેલને હરાવ્યા હતા. બોટાદના વતની ઉમેશ મકવાણા સામાજિક કાર્યકર તરીકે પણ જાણીતા છે. AAPએ તેમને 2024ની લોકસભા ચૂંટણીમાં ભાવનગરથી ઉમેદવાર બનાવ્યા હતા, જોકે તેમાં તેમનો પરાજય થયો હતો.

વિવાદોમાં પણ રહ્યા છે મકવાણા

ઉમેશ મકવાણા અગાઉ પણ વિવાદોમાં સપડાયા છે. બોટાદમાં દારૂના ધંધાર્થી સામે રાજ્યની મોનિટરિંગ સેલની કાર્યવાહી દરમિયાન તેમણે એક સભ્યને બચાવવા એસપીને ધમકી આપી હોવાનો આરોપ લાગ્યો હતો. આ ઉપરાંત, તેમના પૂર્વ PAએ 13 લાખ રૂપિયા પરત ન આપવા અને ધમકી આપવાની ફરિયાદ નોંધાવી હતી.

AAP માટે ચિંતાનો વિષય

ઉમેશ મકવાણાનું રાજીનામું અને તેમના આક્ષેપો AAP માટે નવી મુશ્કેલી ઊભી કરી શકે છે. ખાસ કરીને વિસાવદરમાં ગોપાલ ઇટાલિયાની જીત બાદ પાર્ટીનો ઉત્સાહ ઊંચો હતો, પરંતુ આ ઘટનાએ પાર્ટીની આંતરિક એકતા પર સવાલો ઉભા કર્યા છે.

ઉમેશ મકવાણાનો આગળનો નિર્ણય ગુજરાતના રાજકારણમાં મહત્વની અસર કરી શકે છે. પછાત સમાજના આગેવાનો સાથેની તેમની બેઠક અને જનતાનો અભિપ્રાય તેમના રાજકીય ભવિષ્યને નિર્ધારિત કરશે. શું તેઓ AAPમાં રહેશે, અપક્ષ લડશે કે નવી પાર્ટી બનાવશે, તે આગામી દિવસોમાં સ્પષ્ટ થશે.

આ પણ વાંચો- અમરનાથ યાત્રા 2025: પહેલગામ હુમલા બાદ કડક સુરક્ષા, મોક ડ્રિલમાં દેખાઈ તંત્રની તૈયારી