યુપી રાજ્યસભા ચૂંટણી 2026: ભાજપે 8 ઉમેદવારોની યાદી જાહેર કરી, મંત્રી હરદીપસિંહ પુરીનું પત્તું કપાયું

UP Rajya Sabha Election 2026 : ભારતીય જનતા પાર્ટીએ ઉત્તર પ્રદેશમાં યોજાનારી રાજ્યસભાની દ્વિવાર્ષિક ચૂંટણી 2026 માટે પોતાના પત્તા ખોલી દીધા છે. ભાજપની કેન્દ્રીય ચૂંટણી સમિતિએ યુપીની 8 રાજ્યસભા બેઠકો માટે ઉમેદવારોના નામ પર અંતિમ મહોર લગાવી દીધી છે. ભાજપના રાષ્ટ્રીય મુખ્યાલય પ્રભારી અને રાજ્યસભા સાંસદ તરુણ ચુગ દ્વારા આ સત્તાવાર યાદી જાહેર કરવામાં આવી છે.

ઉત્તર પ્રદેશની કુલ 10 રાજ્યસભા બેઠકો માટે આગામી 16 ઓક્ટોબરના રોજ મતદાન થવાનું છે, જેમાંથી ભાજપે 8 બેઠકો માટે પોતાના ઉમેદવારો મેદાનમાં ઉતાર્યા છે.

મોટા માથાઓના પત્તા કપાયા, નવા ચહેરાઓને તક

આ વખતની યાદીમાં સૌથી મોટો ઉલટફેર એ છે કે ભાજપે ઘણા નવા ચહેરાઓ પર ભરોસો મૂક્યો છે, જ્યારે વર્તમાન રાજ્યસભા સાંસદ અને કેન્દ્રીય મંત્રી હરદીપ સિંહ પુરીનું નામ આ લિસ્ટમાંથી ગાયબ છે. આ સાથે જ હરદીપ સિંહ પુરીને યુપીમાંથી ફરી રાજ્યસભામાં મોકલવાની અટકળોનો અંત આવી ગયો છે. નોંધનીય છે કે, યુપીમાંથી જે સભ્યોનો કાર્યકાળ પૂરો થઈ રહ્યો છે તેમાં હરદીપ સિંહ પુરી ઉપરાંત અરુણ સિંહ અને નીરજ શેખરના નામ પણ સામેલ છે.

ભાજપ દ્વારા ઉમેદવારોની યાદી જાહેર થતાં જ ઉત્તર પ્રદેશના મુખ્યમંત્રી યોગી આદિત્યનાથે તમામ ઉમેદવારોને અભિનંદન પાઠવ્યા હતા. સીએમ યોગીએ સોશિયલ મીડિયા પ્લેટફોર્મ 'X' પર પોસ્ટ કરતા લખ્યું, "આજે જાહેર થયેલા તમામ સન્માનિત ઉમેદવારોને હાર્દિક બધાઈ. આપ સૌના ઐતિહાસિક વિજય માટે અનંત મંગળકામનાઓ."

કોણ છે ભાજપના આ 8 રાજ્યસભા ઉમેદવારો? જાણો વિગતવાર

ભાજપે પોતાની યાદીમાં જાતિગત સમીકરણો અને સંગઠનના અનુભવી નેતાઓને પ્રાધાન્ય આપ્યું છે.

ધર્મપાલ સિંહ: તેઓ ઉત્તર પ્રદેશ સરકારમાં પશુધન મંત્રી છે. બરેલીની આંવલા વિધાનસભા બેઠક પરથી ધારાસભ્ય છે અને યોગી સરકારમાં બે વખત મંત્રી રહી ચૂક્યા છે.

રાધાકાંત ઓઝા: તેઓ પ્રયાગરાજના અત્યંત પ્રતિષ્ઠિત અને સિનિયર વકીલ છે. અલ્હાબાદ હાઈકોર્ટ બાર એસોસિએશનના બે વખત પ્રમુખ રહી ચૂક્યા છે. કાનૂની અને સામાજિક ક્ષેત્રનો મોટો ચહેરો છે.

પ્રકાશ પાલ: હાલમાં યુપી ભાજપ ઓબીસી મોરચાના પ્રદેશ અધ્યક્ષ તરીકે સંગઠનને મજબૂત કરી રહ્યા છે. અગાઉ તેઓ કાનપુર-બુંદેલખંડ ક્ષેત્રના પ્રમુખ રહી ચૂક્યા છે.

વિદ્યાસાગર સોનકર: ભાજપના સિનિયર દલિત નેતા છે. જૌનપુર (મછલીશહર) ના પૂર્વ લોકસભા સાંસદ અને પૂર્વ MLC રહી ચૂક્યા છે. તેઓ પ્રદેશ મહામંત્રી જેવી મહત્વની જવાબદારીઓ સંભાળી ચૂક્યા છે.

ગોપી કૃષ્ણ પાંડેય: તેઓ ભાજપના અત્યંત સમર્પિત અને વરિષ્ઠ સંગઠનકર્તા છે. લાંબા સમયથી પક્ષના પાયાના કાર્યો અને અભિયાનોનું સંચાલન કરી રહ્યા છે.

પ્રિયંકા સિંહ રાવત: બારાબંકીથી 16 મી લોકસભાના પૂર્વ સાંસદ રહી ચૂક્યા છે. તેઓ યુપી ભાજપનો અગ્રણી મહિલા ચહેરો છે અને સંગઠનમાં સક્રિય ભૂમિકા ભજવે છે.

રામ પ્રતાપ સિંહ ચૌહાણ: યુપી ભાજપના પ્રદેશ મહામંત્રી અને પશ્ચિમ ક્ષેત્રના પ્રભારી છે. વર્ષ 2017 થી 2022 સુધી તેઓ આગ્રાની એત્માદપુર બેઠકથી ધારાસભ્ય રહી ચૂક્યા છે.

શ્રુતિ ગંગવાર: તેઓ IIT પાસઆઉટ છે અને બરેલીની અર્બન કો-ઓપરેટિવ બેંકના ચેરપર્સન છે. તેઓ વરિષ્ઠ ભાજપ નેતા અને રાજ્યપાલ સંતોષ ગંગવારના પુત્રી છે. બરેલી વિસ્તારમાં તેઓ રાજકીય અને સામાજિક રીતે ખૂબ સક્રિય છે.

આ પણ વાંચો-પશ્ચિમ બંગાળમાં 6 મહિનામાં આવશે UCC! CM શુભેન્દુ અધિકારીનું લવ જિહાદ અને લેન્ડ જિહાદ પર મોટું એલાન