મુંબઈનો 'કિંગ' કોણ? BMC સહિત 29 જગ્યાએ વોટિંગ શરૂ, અક્ષય કુમારે કહ્યું- ‘આપણા હાથમાં છે રિમોટ કંટ્રોલ'

Maharashtra Election: મહારાષ્ટ્રના રાજકારણમાં આજનો દિવસ ખૂબ જ મોટો અને નિર્ણાયક સાબિત થવાનો છે. રાજ્યની આર્થિક નસ ગણાતી મુંબઈ (BMC) સહિત કુલ 29 મહાનગરપાલિકાઓમાં સત્તા કોના હાથમાં જશે, તેનો ફેંસલો કરવા માટે આજ સવારથી મતદાન શરૂ થઈ ગયું છે. સવારે 7:30 વાગ્યાથી શરૂ થયેલી આ વોટિંગ પ્રક્રિયા સાંજે 5:30 વાગ્યા સુધી ચાલશે. 2022માં શિવસેનામાં પડેલા ભંગાણ બાદ મહારાષ્ટ્રના રાજકારણ માટે આ ચૂંટણી કોઈ 'અગ્નિપરીક્ષા'થી ઓછી નથી.

મુંબઈમાં કોનું જોર? ઠાકરે બંધુઓ વર્સીસ ભાજપ-શિવસેના

આ ચૂંટણી માત્ર સત્તા મેળવવા માટે નહીં, પણ શાખ બચાવવા માટે પણ લડાઈ રહી છે. મુંબઈ પર ફરીથી પકડ જમાવવી એ ઉદ્ધવ ઠાકરે માટે અસ્તિત્વનો સવાલ છે. આ માટે તેઓ પોતાના પિતરાઈ ભાઈ રાજ ઠાકરે સાથે હાથ મિલાવીને મેદાનમાં ઉતર્યા છે. બીજી તરફ, વિધાનસભા ચૂંટણીમાં જોરદાર પ્રદર્શન કરનારી ભાજપ અને શિવસેના (શિંદે જૂથ)ની યુતિ પોતાની તાકાત વધારવા માટે પૂરો દમ લગાવી રહી છે. આ જંગ ખરાખરીનો સાબિત થવાનો છે.

અક્ષય કુમારની મુંબઈગરાઓને ખાસ અપીલ

મતદાન કર્યા બાદ અક્ષય કુમારે મુંબઈના લોકોને જાગૃત કરતા એક દમદાર મેસેજ આપ્યો હતો. તેમણે કહ્યું કે, "આજે BMC માટે વોટિંગ છે. એક મુંબઈકર તરીકે આજે રિમોટ કંટ્રોલ આપણા હાથમાં છે. જો આપણે શહેરના અસલી હીરો બનવું હોય તો ખાલી વાતો કે ડાયલોગબાજી કરવાથી કઈ નહીં વળે, તમારે ઘરની બહાર નીકળીને વોટ આપવો જ પડશે."

#WATCH | Mumbai: After casting his vote, Actor Akshay Kumar says, "Today, the voting for BMC is taking place. As Mumbaikars, we have the remote control with us today. I would request all the people of Mumbai to come out in large numbers and cast their votes. If we have to be the… https://t.co/AOlWRmnx1V pic.twitter.com/19RmBgMFB7

— ANI (@ANI) January 15, 2026

ચૂંટણીના મહત્વના આંકડા

મુંબઈ મહાનગરપાલિકાની ચૂંટણી કેટલી વિશાળ છે, તેનો અંદાજ નીચેના આંકડા પરથી લગાવી શકાય છે:

* કુલ વોર્ડ: BMCના 227 વોર્ડ માટે મતદાન થઈ રહ્યું છે.

* ઉમેદવારો: મેદાનમાં કુલ 1,700 ઉમેદવારો છે, જેમના ભાવિનો ફેંસલો આજે થશે.

* મતદારો: મુંબઈના 1.03 કરોડથી વધુ મતદારો પોતાના હક્કનો ઉપયોગ કરશે.

* વર્ગીકરણ: જેમાં 55.16 લાખ પુરુષો, 48.26 લાખ મહિલાઓ અને 1,099 અન્ય મતદારોનો સમાવેશ થાય છે.

કડક સુરક્ષા અને પિંક બૂથની વ્યવસ્થા

કોઈ પણ અનિચ્છનીય બનાવ ન બને તે માટે મુંબઈ પોલીસે જડબેસલાક સુરક્ષા વ્યવસ્થા ગોઠવી છે. શહેરભરમાં નાકાબંધી અને વાહનોનું ચેકિંગ ચાલી રહ્યું છે. ચૂંટણી પંચે પણ મતદારોની સુવિધા માટે ખાસ વ્યવસ્થા કરી છે:

મહિલાઓ માટે ખાસ 'પિંક પોલિંગ બૂથ' બનાવવામાં આવ્યા છે, જેનું સંચાલન મહિલાઓ જ કરે છે. વરિષ્ઠ નાગરિકોને મદદ કરવા માટે સ્પેશિયલ ટીમ તૈનાત છે. સાંજે વોટિંગ પૂરું થવાના સમયે ભીડ થાય તો તેને કંટ્રોલ કરવા માટે ટોકન સિસ્ટમ પણ રાખવામાં આવી છે. આજે ચૂંટણીને કારણે મુંબઈ સહિત જે 29 જગ્યાએ મતદાન છે, ત્યાં જાહેર રજા જાહેર કરવામાં આવી છે. આ ચૂંટણીના પરિણામો 16 જાન્યુઆરીના રોજ જાહેર થશે, ત્યારે જ ખબર પડશે કે મુંબઈનો અસલી 'કિંગ' કોણ છે.

આ પણ વાંચો- પેન્શનરો માટે ખુશખબર: હવે લાઈફ સર્ટિફિકેટ જમા કરાવવા માટે બેંકના ધક્કા ખાવાની જરૂર નથી, ઘરે બેઠા ફ્રીમાં થશે કામ!