'ટ્રમ્પની ધમકી સામે PM મોદી ચૂપ કેમ?' કોંગ્રેસે પૂછ્યા ત્રણ સવાલ, ખડગેનો સીધો હુમલો

અમેરિકામાં સત્તા પરિવર્તન બાદ ભારત અને અમેરિકાના સંબંધોમાં ઉતાર-ચઢાવ જોવા મળી રહ્યા છે. જ્યારથી ડોનાલ્ડ ટ્રમ્પ બીજી વખત રાષ્ટ્રપતિ બન્યા છે, ત્યારથી ભારત પર સતત દબાણ વધી રહ્યું છે. ખાસ કરીને રશિયા સાથેના ભારતના સંબંધો અને ઓઈલની ખરીદી મુદ્દે ટ્રમ્પનું વલણ આક્રમક રહ્યું છે. તાજેતરમાં ટ્રમ્પે ભારત પર ટેરિફ લગાવવાની વાત કરી હતી અને રશિયાથી ઓઈલ ખરીદવા બાબતે ટિપ્પણી કરી હતી. હવે આ મુદ્દે ભારતના રાજકારણમાં ગરમાવો આવ્યો છે. કોંગ્રેસે આ મામલે કેન્દ્ર સરકાર અને વડાપ્રધાન નરેન્દ્ર મોદીને આડે હાથ લીધા છે.

ખડગેનો PM મોદી પર સીધો પ્રહાર: 'દેશ માટે ઊભા થાઓ'

ડોનાલ્ડ ટ્રમ્પના નિવેદન બાદ કોંગ્રેસ અધ્યક્ષ મલ્લિકાર્જુન ખડગેએ વડાપ્રધાન મોદીની ચૂપ્પી પર સવાલ ઉઠાવ્યા છે. ખડગેએ આક્રમક અંદાજમાં કહ્યું કે, "મને એ નથી સમજાતું કે વડાપ્રધાન મોદી ટ્રમ્પની સામે નમતું કેમ જોખી રહ્યા છે? આ પ્રકારની નીતિ આપણા દેશ માટે સારી નથી."

ખડગેએ વધુમાં ઉમેર્યું કે, દેશે તમને વડાપ્રધાન તરીકે પસંદ કર્યા છે તે માત્ર માથું હલાવવા માટે નથી, પરંતુ દેશના હિત માટે મજબૂતીથી ઊભા રહેવા માટે છે. તેમણે કટાક્ષ કરતા કહ્યું કે, ટ્રમ્પ તો 70 વખત એવો દાવો કરી ચૂક્યા છે કે ભારત અને પાકિસ્તાન વચ્ચે સીઝફાયર (યુદ્ધવિરામ) તેમણે કરાવ્યું છે.

આ વિવાદનું મૂળ ડોનાલ્ડ ટ્રમ્પનું તાજેતરનું એક નિવેદન છે. એક દિવસ પહેલા જ ટ્રમ્પે દાવો કર્યો હતો કે, "મને ખુશ કરવા માટે ભારતે રશિયાથી ક્રૂડ ઓઈલની આયાત ઘટાડી દીધી છે." વાત અહીં અટકી નથી, તેમણે ભારતને સીધી ચેતવણી પણ આપી દીધી છે કે જો ભારત રશિયા પાસેથી તેલ ખરીદવાનું બંધ નહીં કરે, તો અમેરિકા ભારત પર ટેરિફ (ટેક્સ) વધારી દેશે.

કોંગ્રેસે કેન્દ્ર સરકારને પૂછ્યા આ 3 સવાલ

ટ્રમ્પના આ દાવા અને ધમકીભર્યા સૂર બાદ કોંગ્રેસે મોદી સરકાર પાસે જવાબ માંગ્યો છે. કોંગ્રેસે સરકાર સામે 3 મહત્વના સવાલો મૂક્યા છે:

શું હવે ભારતની વિદેશનીતિ અમેરિકા નક્કી કરશે?

શું ખરેખર ટ્રમ્પને રાજી રાખવા માટે ભારતે રશિયાથી સસ્તું ઓઈલ ખરીદવાનું ઓછું કરી દીધું છે?

ટ્રમ્પ ભારતને ખુલ્લેઆમ ધમકી આપી રહ્યા છે, તો વડાપ્રધાન મોદી આ મુદ્દે મૌન કેમ છે?

અમેરિકાને રશિયન ઓઈલ સામે વાંધો કેમ?

જ્યારથી રશિયા અને યુક્રેન વચ્ચે યુદ્ધ શરૂ થયું છે, ત્યારથી આંતરરાષ્ટ્રીય બજારમાં ક્રૂડ ઓઈલના ભાવ આસમાને પહોંચ્યા હતા. તે સમયે ભારતે પોતાના નાગરિકોના હિતમાં રશિયા પાસેથી સસ્તા ભાવે ઓઈલ ખરીદવાનું શરૂ કર્યું હતું. અમેરિકાને આ વાત ખૂંચી રહી છે. અમેરિકાનો આરોપ છે કે ભારત ઓઈલ ખરીદીને આડકતરી રીતે યુદ્ધમાં રશિયાને આર્થિક મદદ કરી રહ્યું છે.

જોકે, ભૂતકાળમાં ભારતે સ્પષ્ટ શબ્દોમાં કહ્યું હતું કે અમે કોઈ પણ દેશના દબાણમાં આવ્યા વગર, જ્યાંથી ભારતીય જનતાને ફાયદો થશે અને સસ્તું ઓઈલ મળશે, ત્યાંથી જ ખરીદી કરીશું. હવે જોવાનું એ રહેશે કે ટ્રમ્પના નવા દબાણ સામે ભારત સરકાર શું વલણ અપનાવે છે.

આ પણ વાંચો-ડોનાલ્ડ ટ્રમ્પનો મોટો દાવો: ટેરિફથી અમેરિકાને થશે 600 અબજ ડોલરની કમાણી, ભારત પર પણ અસર