અજિત પવારના નિધન બાદ પત્ની સુનેત્રા પવાર બનશે ડેપ્યુટી CM? NCP માં મોટા ફેરફારના સંકેત

મહારાષ્ટ્રના નાયબ મુખ્યમંત્રી અજિત પવારના અકાળે અવસાન બાદ રાજ્યના રાજકારણમાં મોટો શૂન્યાવકાશ સર્જાયો છે. બુધવારે બારામતીમાં થયેલી વિમાન દુર્ઘટના બાદ હવે NCPના નેતૃત્વ અને સરકારમાં તેમના સ્થાને કોણ આવશે, તેને લઈને મોટી હલચલ શરૂ થઈ ગઈ છે. અહેવાલો મુજબ, અજિત પવારના પત્ની સુનેત્રા પવારને મહારાષ્ટ્રના નવા નાયબ મુખ્યમંત્રી બનાવવામાં આવે તેવી પ્રબળ શક્યતા છે.

દિગ્ગજ નેતાઓએ સુનેત્રા પવાર સાથે કરી મુલાકાત NCP ના વરિષ્ઠ નેતાઓ છગન ભુજબળ, ધનંજય મુંડે અને સુનીલ તટકરેએ સુનેત્રા પવારની મુલાકાત લીધી હતી. સૂત્રોના જણાવ્યા અનુસાર, પાર્ટીના નેતાઓએ સુનેત્રા પવારને નાયબ મુખ્યમંત્રી પદ સ્વીકારવાનો પ્રસ્તાવ મૂક્યો છે. હાલમાં સુનેત્રા પવાર રાજ્યસભાના સાંસદ છે, પરંતુ તેઓ દિવંગત પતિ અજિત પવારની ખાલી પડેલી વિધાનસભા બેઠક પરથી ચૂંટણી લડી શકે છે.

'વહિની'ને મંત્રીમંડળમાં લાવવાની માંગ

NCP ના નેતા નરહરિ જિરવાલે જણાવ્યું હતું કે, પક્ષના કાર્યકરો અને નેતાઓ ઈચ્છે છે કે 'વહિની' એટલે કે સુનેત્રા પવારને મંત્રીમંડળમાં સામેલ કરવામાં આવે. અજિત પવારના જવાથી પક્ષને જે નુકસાન થયું છે, તેની ભરપાઈ કરવા માટે સુનેત્રા પવાર સક્રિય રાજકારણમાં મોટી જવાબદારી સંભાળે તેવો સૂર ઉઠ્યો છે.

બીજી તરફ, સંગઠન સ્તરે પણ ફેરફારોની ચર્ચા છે. મીડિયા રિપોર્ટ્સ મુજબ, પ્રફુલ્લ પટેલને NCP ના રાષ્ટ્રીય અધ્યક્ષ બનાવવામાં આવી શકે છે. આ અંગે તેઓ ટૂંક સમયમાં મુખ્યમંત્રી દેવેન્દ્ર ફડણવીસ સાથે બેઠક કરશે. આ ઉપરાંત, NCP સાથે વિલયની અટકળો પર પણ ચર્ચાઓ ચાલી રહી છે.

પ્લેન ક્રેશની તપાસ ચાલુ

ઉલ્લેખનીય છે કે, 28 જાન્યુઆરીના રોજ બારામતીમાં ખરાબ વિઝિબિલિટીને કારણે પ્લેન ક્રેશ થયું હતું, જેમાં અજિત પવાર અને પાયલોટ સહિત 5 લોકોના મોત થયા હતા. અજિત પવારની ઓળખ તેમની કાંડા ઘડિયાળ પરથી કરવામાં આવી હતી. હાલ AAIB દ્વારા આ દુર્ઘટનાની ફોરેન્સિક તપાસ ચાલી રહી છે.

આ પણ વાંચો-ભારતમાં બાળકો માટે સોશિયલ મીડિયા પર પ્રતિબંધ આવશે? 'ડિજિટલ લત' પર સરકારનું કડક વલણ