મોદી કેબિનેટના 7 મોટા નિર્ણયો: યુરિયા માટે નવી પોલિસીથી લઈને સેમિકન્ડક્ટર સુધી, 2.19 લાખ કરોડના મેગા પ્રોજેક્ટ્સને મંજૂરી

Modi Cabinet Decisions : વડાપ્રધાન નરેન્દ્ર મોદીની અધ્યક્ષતામાં બુધવારે કેન્દ્રીય કેબિનેટની એક ખૂબ જ મહત્વપૂર્ણ બેઠક યોજાઈ હતી. દેશના ઇન્ફ્રાસ્ટ્રક્ચર, મેન્યુફેક્ચરિંગ અને કૃષિ ક્ષેત્રને નવી ઊંચાઈઓ પર લઈ જવા માટે આ બેઠકમાં ઐતિહાસિક નિર્ણયો લેવામાં આવ્યા છે. કેબિનેટે એકસાથે 7 મોટા પ્રોજેક્ટ્સ અને પોલિસીઓને લીલી ઝંડી આપી છે, જેનો કુલ ખર્ચ 2,19,353 કરોડ રૂપિયા થશે.

કેબિનેટ બેઠક પૂર્ણ થયા બાદ કેન્દ્રીય માહિતી અને પ્રસારણ મંત્રી અશ્વિની વૈષ્ણવે મીડિયાને સંબોધિત કરતા આ તમામ 7 મોટા નિર્ણયોની વિસ્તૃત માહિતી આપી હતી.

વારાણસી માટે બે મેગા એલિવેટેડ કોરિડોર

કેન્દ્રીય મંત્રી અશ્વિની વૈષ્ણવે જણાવ્યું કે, પહેલા બે નિર્ણયો વારાણસી શહેરમાં ટ્રાફિક જામની સમસ્યા હલ કરવા અને બુનિયાદી માળખાના વિકાસ માટે લેવાયા છે. કેબિનેટે વરુણા નદીના કિનારે 10,998 કરોડ રૂપિયાના ખર્ચે 6/4-લેનના એલિવેટેડ કોરિડોરના નિર્માણને મંજૂરી આપી છે. આ સાથે જ ગંગા નદીના કિનારે 14,448 કરોડ રૂપિયાના ખર્ચે 6-લેનનો ભવ્ય એલિવેટેડ કોરિડોર બનાવવામાં આવશે.

ભારતને ઇલેક્ટ્રોનિક્સ મેન્યુફેક્ચરિંગનું 'ગ્લોબલ હબ' બનાવવા માટે સરકારે તિજોરી ખોલી નાખી છે. દેશમાં સેમિકન્ડક્ટર ઇકોસિસ્ટમને વધુ મજબૂત કરવા માટે સરકારે 1,27,500 કરોડ રૂપિયાના જંગી બજેટ સાથે 'સેમિકન્ડક્ટર 2.0' ને મંજૂરી આપી છે. મેન્યુફેક્ચરિંગ સેક્ટરને લગતો બીજો મોટો નિર્ણય લેતા સરકારે MPMS ને પણ મંજૂરી આપી દીધી છે. આ મહત્વાકાંક્ષી યોજના માટે 62,500 કરોડ રૂપિયાની ફાળવણી કરવામાં આવી છે.

ખેડૂતો માટે ભેટ, યુરિયા ઉત્પાદનમાં આત્મનિર્ભરતા માટે નવી પોલિસી

કૃષિ ક્ષેત્ર અને ખેડૂતોના હિતને ધ્યાનમાં રાખીને સરકારે એક મોટો નીતિગત નિર્ણય લીધો છે. કેબિનેટે નેશનલ ઇન્વેસ્ટમેન્ટ પોલિસી ફોર યુરિયા-2026ને પોતાની ઔપચારિક મંજૂરી આપી દીધી છે. આ નીતિનો મુખ્ય ઉદ્દેશ્ય ભારતને યુરિયા ખાતરના ઉત્પાદનમાં 100% આત્મનિર્ભર બનાવવાનો છે. મંત્રીએ સ્પષ્ટ કર્યું કે આ એક પોલિસી મંજૂરી છે, તેથી તેના માટે કોઈ અલગ નાણાકીય ફાળવણીનો આંકડો દર્શાવવામાં આવ્યો નથી.

રેલવે કનેક્ટિવિટીને મજબૂત કરવા બે મોટા પ્રોજેક્ટ

દેશમાં લોજિસ્ટિક્સ અને માલસામાનની હેરફેર ઝડપી બનાવવા માટે રેલવે નેટવર્કના વિસ્તરણને લગતી બે યોજનાઓ પાસ કરવામાં આવી છે. પારાદીપ-હરિદાસપુર રેલવે લાઇનનું ડબલિંગ કરવા માટે 2,542 કરોડ રૂપિયા મંજૂર કરવામાં આવ્યા છે. ડાંગોઆપોસી અને રાજખરસવાં વચ્ચે ચોથી રેલવે લાઇનના નિર્માણને પણ લીલી ઝંડી મળી છે, જેમાં 1,365 કરોડ રૂપિયાનું રોકાણ કરવામાં આવશે.