અમેરિકાનો ઈરાન પર ભીષણ હુમલો, અનેક શહેરોમાં એર સ્ટ્રાઈક અને હોર્મુઝ સ્ટ્રેટ બંધ થતા દુનિયાભરમાં તેલનું સંકટ

US-Iran War updates: પશ્ચિમ એશિયામાં પરિસ્થિતિ અત્યંત સ્ફોટક બની ગઈ છે. અમેરિકાએ ઈરાન પર નવેસરથી ભીષણ હવાઈ હુમલા શરૂ કર્યા છે. રાષ્ટ્રપતિ ડોનાલ્ડ ટ્રમ્પની કડક ચેતવણી બાદ અમેરિકી સેનાએ ઈરાનના અનેક સૈન્ય ઠેકાણાઓને નિશાન બનાવ્યા છે. યુએસ સેન્ટ્રલ કમાન્ડના જણાવ્યા અનુસાર, આ હુમલા ઈરાનની સતત વધતી જતી આક્રમકતાના જવાબમાં આત્મરક્ષા માટે કરવામાં આવ્યા છે.

શા માટે ભડક્યું અમેરિકા?

આ તાજા હુમલાઓ પાછળનું મુખ્ય કારણ અમેરિકાનું 'અપાચે હેલિકોપ્ટર' છે. રિપોર્ટ્સ મુજબ, ઈરાને અમેરિકાના એક અપાચે હેલિકોપ્ટરને તોડી પાડ્યું હતું, જેનાથી રાષ્ટ્રપતિ ટ્રમ્પ લાલઘૂમ થયા છે. ટ્રમ્પે સ્પષ્ટ શબ્દોમાં કહ્યું છે કે જો ઈરાન વાતચીતનો રસ્તો નહીં અપનાવે તો તેણે આકરી કિંમત ચૂકવવી પડશે. આ હુમલાઓ દ્વારા ઈરાનના એર ડિફેન્સ સિસ્ટમ, રડાર સ્ટેશનો અને ગ્રાઉન્ડ કંટ્રોલ યુનિટ્સને ધ્વસ્ત કરવામાં આવ્યા છે.

ઈરાનના આ શહેરોમાં થયા પ્રચંડ ધડાકા

ઈરાની મીડિયા અને પ્રેસ ટીવીના અહેવાલ મુજબ, દક્ષિણ ઈરાનના જાર્ક, સિરિક અને કેશમ ટાપુ જેવા વિસ્તારોમાં જોરદાર ધડાકા સંભળાયા છે. અમેરિકી વાયુસેનાએ ચોકસાઈપૂર્વક નિશાન સાધીને ઈરાની સૈન્ય માળખાને નુકસાન પહોંચાડ્યું છે. સેન્ટ્રલ કમાન્ડે ટ્વિટર (X) પર જાહેર કર્યું છે કે આ મિશન સફળતાપૂર્વક પૂર્ણ થયું છે અને અમેરિકી સેના કોઈપણ સ્થિતિને પહોંચી વળવા માટે સજ્જ છે.

હોર્મુઝ સ્ટ્રેટ બંધ થતા તેલના ભાવમાં ભડકો

અમેરિકી હુમલાના વળતા જવાબમાં ઈરાને વિશ્વના સૌથી મહત્વના દરિયાઈ માર્ગ હોર્મુઝ સ્ટ્રેટને ફરીથી બંધ કરી દીધો છે. આ માર્ગ બંધ થવાની જાહેરાત થતાની સાથે જ આંતરરાષ્ટ્રીય બજારમાં તેલની કિંમતોમાં બે ડૉલરથી વધુનો ઉછાળો આવ્યો છે. ઈરાનના રિવોલ્યુશનરી ગાર્ડ્સએ ચેતવણી આપી છે કે તેઓ કુવૈત અને બહેરીનમાં સ્થિત અમેરિકી ઠેકાણાઓ પર પણ જવાબી હુમલા કરી શકે છે.