પૃથ્વી પર તોળાતું મહાસંકટ: ગ્રીનલેન્ડ-એન્ટાર્કટિકામાંથી 12 લાખ કરોડ ટન બરફ ગાયબ, 90 લાખ લોકો પર પૂરનો ખતરો

Greenland Antarctica Ice Melt: વિજ્ઞાનીઓના એક લેટેસ્ટ અને ચોંકાવનારા રિપોર્ટ મુજબ, પૃથ્વી પર ગ્લોબલ વોર્મિંગનું મોટું સંકટ મંડરાઈ રહ્યું છે. તાજેતરના અભ્યાસમાં સામે આવ્યું છે કે વર્ષ 1979થી 2023 ના સમયગાળા દરમિયાન ગ્રીનલેન્ડ અને એન્ટાર્કટિકામાંથી બરફની ચાદરો ખૂબ જ ઝડપથી ગાયબ થઈ રહી છે. આ આંકડો કોઈ નાનો સૂનો નથી, પરંતુ પૂરા 12.5 ટ્રિલિયન ટન એટલે કે 12 લાખ કરોડ ટનથી વધુ બરફ ઓગળી ગયો છે.

જાણીતા ‘સાઇન્ટિફિક ડેટા જર્નલ'માં પ્રકાશિત થયેલા આ નવા સ્ટડીમાં 27 અલગ-અલગ સેટેલાઇટ મિશનના ડેટાનો ઉપયોગ કરવામાં આવ્યો છે. આ અત્યાધુનિક અને સચોટ માહિતી દર્શાવે છે કે આટલા વિશાળ જથ્થામાં બરફ પીગળવાને કારણે દુનિયાભરમાં સમુદ્રની સપાટીમાં 3.1 સેન્ટિમીટરનો વધારો નોંધાયો છે.

બરફ પીગળવાનું અસલી કારણ શું છે?

સામાન્ય રીતે આપણને એવું લાગે કે સૂર્યની કે હવાની ગરમીથી બરફ પીગળતો હશે, પરંતુ આ સંશોધને એક અલગ જ હકીકત રજૂ કરી છે:

ગરમ દરિયાઈ પાણી: રિપોર્ટ મુજબ 84 ટકા બરફનું નુકસાન સપાટીની ગરમીથી નહીં, પરંતુ બરફની નીચે અને કિનારાના ભાગોમાં ટકરાતા ગરમ દરિયાઈ પાણીને કારણે થયું છે. ગ્લેશિયર અંદરથી કપાઈને ઝડપથી સમુદ્રમાં ભળી રહ્યા છે, જેને વિજ્ઞાનની ભાષામાં 'ડાયનેમિક ઇમ્બેલેન્સ' કહેવાય છે.

સપાટીનું તાપમાન: માત્ર 16 ટકા નુકસાન જ સપાટી પરની હવા ગરમ થવાથી કે પીગળવાથી થયું છે.