India’s First Hydrogen Train: યાત્રીગણ ધ્યાન આપશો! દેશની સૌ પ્રથમ હાઈડ્રોન ટ્રેન દોડવા છે તૈયાર, ગ્રીન રેલ યાત્રાનો નવો અધ્યાય!

India’s First Hydrogen Train: ભારતના રેલવે ઈતિહાસમાં એક નવો અધ્યાય ઉમેરાવા જઈ રહ્યો છે! દેશની પ્રથમ હાઇડ્રોજન ટ્રેન જીંદ-ગોહાના-સોનીપત રૂટ પર દોડવા માટે લગભગ તૈયાર છે. આ પાયલટ પ્રોજેક્ટ ભારતની ગ્રીન ટ્રાન્સપોર્ટ તરફની એક મહત્વપૂર્ણ ઝંપલાવ છે, જે પર્યાવરણને અનુકૂળ અને શૂન્ય કાર્બન ઉત્સર્જનનું વચન આપે છે.

હાઇડ્રોજન પ્લાન્ટની તૈયારીઓ

આ પ્રોજેક્ટના કેન્દ્રમાં છે હાઇડ્રોજન પ્લાન્ટ, જેનું નિર્માણ લગભગ પૂર્ણ થવાના આરે છે. આગામી 10-15 દિવસમાં આ પ્લાન્ટ સંપૂર્ણ રીતે કાર્યરત થઈ જશે. પ્લાન્ટ દૈનિક 430 કિલોગ્રામ હાઇડ્રોજન ગેસનું ઉત્પાદન કરશે, જેનો ખર્ચ 70 કરોડ રૂપિયા થયો છે. હાલમાં, પ્લાન્ટમાં ગેસનું ઉત્પાદન શરૂ થઈ ગયું છે અને તેનું ટેસ્ટિંગ ચાલી રહ્યું છે.

જોકે, તપાસ દરમિયાન ફાયર ફાઇટિંગ સિસ્ટમમાં કેટલીક ખામીઓ જોવા મળી હતી, જેને હવે દૂર કરવામાં આવી રહી છે. આ પ્લાન્ટ જીંદમાં આવેલા ઇંધણ ભરવાના સ્ટેશન માટે 3000 કિલો હાઇડ્રોજનનો સંગ્રહ કરશે. આ સ્ટેશનમાં બે ડિસ્પેન્સર, કોમ્પ્રેસર, અને ઝડપી ઇંધણ ભરવા માટે પ્રી-કૂલર ઇન્ટીગ્રેશન પણ સ્થાપિત કરવામાં આવ્યું છે.

ટ્રેનની ખાસિયતો

આ હાઇડ્રોજન ટ્રેન એક ડીઝલ ઇલેક્ટ્રિક મલ્ટીપલ યુનિટ રેકને અપગ્રેડ કરીને તૈયાર કરવામાં આવી છે. 8 કોચવાળી આ ટ્રેન હાઇડ્રોજન ફ્યુઅલ સેલ ટેક્નોલોજી પર આધારિત છે, જે એક સમયે 2638 મુસાફરોને લઈ જઈ શકે છે. ટ્રેનની મહત્તમ ગતિ 110થી 140 કિલોમીટર પ્રતિ કલાક હશે. આ ટ્રેનનું એન્જિન ધુમાડાને બદલે પાણી અને વરાળનું ઉત્સર્જન કરશે, જેનાથી પ્રદૂષણ નહીં થાય.

આ ટ્રેન પરંપરાગત ડીઝલ ટ્રેનોનો પર્યાવરણને અનુકૂળ વિકલ્પ છે. હાઇડ્રોજન ગેસનો ઇંધણ તરીકે ઉપયોગ થતાં આ ટ્રેન શૂન્ય કાર્બન ઉત્સર્જન સાથે ચાલશે. જીંદ-ગોહાના-સોનીપત રેલ ટ્રેક, જે 89 કિલોમીટર લાંબો છે, તેના પર આ ટ્રેન ચાલશે.