બ્રિટનમાં મોટો રાજકીય ઉલટફેર? કીર સ્ટાર્મરની ખુરશી ખતરામાં, પાકિસ્તાની મૂળના શબાના મહમૂદ બની શકે છે પહેલા મુસ્લિમ PM

UK Prime Minister: બ્રિટનની રાજનીતિમાં હાલ જબરદસ્ત ઉથલપાથલ ચાલી રહી છે. છેલ્લા 5 વર્ષમાં 5 વડાપ્રધાન જોઈ ચૂકેલા યુનાઈટેડ કિંગડમમાં હવે વધુ એક વડાપ્રધાનની વિદાયની અટકળો તેજ બની છે. એપસ્ટીન ફાઈલ્સના ખુલાસા બાદ વર્તમાન પ્રધાનમંત્રી કીર સ્ટાર્મર મુશ્કેલીમાં મુકાયા છે અને તેમના રાજીનામાની ચર્ચાઓએ જોર પકડ્યું છે. આ રાજકીય ડ્રામા વચ્ચે એક નામ સૌથી વધુ ચર્ચામાં છે અને તે છે - શબાના મહમૂદ.

જો કીર સ્ટાર્મર રાજીનામું આપે છે, તો શબાના મહમૂદ બ્રિટનના આગામી વડાપ્રધાન બની શકે છે. જો આમ થશે તો તે બ્રિટનના ઇતિહાસમાં પહેલીવાર બનશે કે કોઈ મુસ્લિમ મહિલા દેશની કમાન સંભાળશે.

સ્ટાર્મરની ટીમ છોડી રહી છે સાથ

વડાપ્રધાન કીર સ્ટાર્મર પર દબાણ સતત વધી રહ્યું છે. રિપોર્ટ્સ મુજબ, તેમના વિશ્વાસુ સાથીદારો એક પછી એક રાજીનામા આપી રહ્યા છે. સોમવારે પીએમના કોમ્યુનિકેશન ડાયરેક્ટર ટીમ એલને રાજીનામું આપ્યું હતું. તે પહેલાં 8 ફેબ્રુઆરીએ સ્ટાર્મરના ચીફ ઓફ સ્ટાફ મોર્ગન મેકસ્વીનીએ પણ પોતાનું પદ છોડી દીધું હતું. આ સ્થિતિ સ્પષ્ટ કરે છે કે સરકાર અંદરથી હલી ગઈ છે.

શબાના મહમૂદ હાલમાં બ્રિટનના હોમ સેક્રેટરી (ગૃહ મંત્રી) છે અને લેબર પાર્ટીના ખૂબ જ સીનિયર લીડર છે. તેઓ કીર સ્ટાર્મરના ખૂબ નજીકના માનવામાં આવે છે. શબાનાનો સંબંધ પાકિસ્તાન અધિકૃત કાશ્મીર (POJK) ના મીરપુર સાથે છે. તેઓ એક અનુભવી અને સ્થિર નેતા તરીકે ઉભરી આવ્યા છે, જેમને પીએમ પદના પ્રબળ દાવેદાર માનવામાં આવે છે.

ઈમિગ્રન્ટ્સના દીકરી, પણ ઈમિગ્રેશન પર કડક!

શબાના મહમૂદની ખાસિયત એ છે કે તેઓ પોતે ઈમિગ્રન્ટ્સ (પ્રવાસી) પરિવારમાંથી આવે છે, છતાં ઈમિગ્રેશનના મુદ્દે તેમનું વલણ ખૂબ જ કડક (હાર્ડલાઈનર) છે. આ જ કારણે તેઓ લેબર પાર્ટીના દક્ષિણપંથી જૂથની પહેલી પસંદ છે.

હોમ સેક્રેટરી તરીકે તેમણે લીધેલા પગલાં ખૂબ ચર્ચામાં રહ્યા છે:

ગેરકાયદેસર ઈમિગ્રેશન પર કડક નિયંત્રણો લાદ્યા.

બોર્ડર કંટ્રોલને વધુ મજબૂત બનાવ્યો.

પરમેનન્ટ રેસિડેન્સી (કાયમી નાગરિકતા) માટેની સમયમર્યાદા 5 વર્ષથી વધારીને 10 વર્ષ કરી દીધી.

આ પહેલા ન્યાય મંત્રી તરીકે તેમણે જેલ સુધારણા અને માનવ અધિકારો પર પણ કામ કર્યું હતું. તેઓ માર્ગરેટ થેચર અને બેનઝીર ભુટ્ટોને પોતાના રોલ મોડેલ માને છે.

PMની રેસમાં અન્ય કોણ?

જોકે, પીએમ પદની રેસમાં શબાના મહમૂદ એકલા નથી. અન્ય કેટલાક મોટા નામો પણ ચર્ચામાં છે:

એન્જેલા રેનર: પૂર્વ ડેપ્યુટી પીએમ અને પાર્ટીમાં ખૂબ લોકપ્રિય.

વેસ સ્ટ્રીટીંગ: હાલના સ્વાસ્થ્ય મંત્રી, જેઓ સારા વક્તા છે અને મીડિયામાં મજબૂત પકડ ધરાવે છે.

એડ મિલિબેન્ડ: ઉર્જા મંત્રી, જોકે તેઓ સંસદ સભ્ય નથી.

એન્ડી બર્નહામ: ગ્રેટર માન્ચેસ્ટરના મેયર

હાલ તો કીર સ્ટાર્મરના રાજીનામા અંગે કોઈ સત્તાવાર જાહેરાત થઈ નથી, પરંતુ રાજકીય પંડિતોનું માનવું છે કે બ્રિટનમાં નેતૃત્વ પરિવર્તન હવે માત્ર સમયની વાત છે. જો શબાના મહમૂદ વડાપ્રધાન બને છે, તો તે બ્રિટનમાં એશિયાઈ સમુદાય અને મુસ્લિમ પ્રતિનિધિત્વ માટે એક ઐતિહાસિક ક્ષણ હશે.

આ પણ વાંચો-DA Hike News: સરકારી કર્મચારીઓને મોટો ઝટકો! જાન્યુઆરીમાં માત્ર 2% વધશે DA; 8મા પગાર પંચ પર થશે ગંભીર અસર