સાવધાન! રેલવે કે એરપોર્ટ પર ફોન ચાર્જ કરતા જ બેન્ક એકાઉન્ટ થઈ જશે ઝીરો, જાણો 2026ના આ નવા સાયબર ફ્રોડ વિશે

Juice Jacking Scam 2026: વર્ષ 2026માં સાયબર ક્રિમિનલ્સ લોકોને લૂંટવા માટે રોજેરોજ નવી અને હાઈ-ટેક તરકીબો શોધી રહ્યા છે. શું તમને પણ મુસાફરી દરમિયાન રેલવે સ્ટેશન, મેટ્રો કે એરપોર્ટ પર તમારો ફોન ચાર્જિંગમાં મૂકવાની આદત છે? જો તમારો જવાબ 'હા' છે, તો આજે જ તમારી આ આદત બદલી નાખો. નહીંતર તમારું બેન્ક એકાઉન્ટ ગણતરીની મિનિટોમાં ખાલી થઈ શકે છે.

હાલમાં એક ખૂબ જ ખતરનાક ફ્રોડ સામે આવ્યો છે, જેમાં હેકર્સ પબ્લિક ચાર્જિંગ સ્ટેશનનો ઉપયોગ કરીને લોકોના ફોન હેક કરી રહ્યા છે અને તેમની મહેનતની કમાણી લૂંટી રહ્યા છે. ચાલો સરળ ભાષામાં સમજીએ કે આ કૌભાંડ શું છે અને તેનાથી કેવી રીતે બચી શકાય.

શું છે આ ‘જ્યુસ જેકિંગ સ્કેમ'?

સાયબર દુનિયામાં આ નવા અને ખતરનાક ફ્રોડને ‘જ્યુસ જેકિંગ સ્કેમ' કહેવામાં આવે છે. આપણે સૌ જાણીએ છીએ કે મોબાઈલનો ચાર્જિંગ કેબલ માત્ર પાવર જ નહીં, પણ ડેટા ટ્રાન્સફર કરવાનું કામ પણ કરે છે. સાયબર ગુનેગારો પબ્લિક પ્લેસ પર લાગેલા USB પોર્ટ સાથે ચેડાં કરે છે અથવા તો પોતાનું નકલી ચાર્જિંગ સ્ટેશન ઊભું કરી દે છે. જ્યારે કોઈ સામાન્ય માણસ પોતાનો ફોન આ USB પોર્ટમાં ભરાવે છે, ત્યારે ચાર્જિંગની સાથે સાથે હેકર્સ ફોનમાં ખતરનાક મેલવેયર ઈન્જેક્ટ કરી દે છે.

એકવાર આ વાયરસ તમારા ફોનમાં ઘૂસી જાય, પછી તમારી બધી જ ખાનગી માહિતી હેકર્સ પાસે પહોંચી જાય છે. ફોનમાં આવતા બેન્કિંગ OTP (વન ટાઈમ પાસવર્ડ) હેકર્સ વાંચી શકે છે, જેનાથી તેઓ તમારું બેન્ક એકાઉન્ટ સાફ કરી દે છે. તમારી પર્સનલ ચેટ્સ અને ફોટો ગેલેરી પણ તેમના હાથમાં જતી રહે છે. આ ખાનગી ફોટાઓનો ઉપયોગ કરીને હેકર્સ તમને બ્લેકમેલ કરી શકે છે અને હાલમાં સૌથી વધુ ચાલતા ‘ડિજિટલ એરેસ્ટ' જેવા ફ્રોડનો શિકાર પણ બનાવી શકે છે.

આ ફ્રોડથી કેવી રીતે બચશો?

સાયબર એક્સપર્ટ્સ મુજબ થોડી સાવચેતી રાખીને તમે આ મોટા નુકસાનથી બચી શકો છો:

ડાયરેક્ટ USB પોર્ટનો ઉપયોગ ટાળો: પબ્લિક સ્ટેશન પર સીધા USB કેબલ ભરાવવાને બદલે, હંમેશા તમારા પોતાના ચાર્જિંગ એડેપ્ટરનો જ ઉપયોગ કરો અને તેને ડાયરેક્ટ પ્લગમાં લગાવો.

પાવરબેંક સાથે રાખો: મુસાફરી દરમિયાન ઇમરજન્સી ચાર્જિંગ માટે હંમેશા પોતાની પાવરબેંક કે પોર્ટેબલ ચાર્જરનો ઉપયોગ કરો.

સ્ક્રીન પર ધ્યાન આપો: જો કોઈ મજબૂરીમાં પબ્લિક ચાર્જિંગ સ્ટેશન પર ફોન મૂકવો જ પડે, તો ફોન ભરાવતાની સાથે સ્ક્રીન પર દેખાતા મેસેજનું ખાસ ધ્યાન રાખો. જો સ્ક્રીન પર "Trust this device" અથવા "Allow Data Transfer" લખેલું આવે, તો ભૂલથી પણ તેના પર ટેપ કરશો નહીં.

ફ્રોડ થાય તો શું કરવું?

જો તમને લાગે કે તમારા ફોનમાં કોઈ શંકાસ્પદ ગતિવિધિ થઈ રહી છે અથવા તમારા ખાતામાંથી પૈસા કપાઈ ગયા છે, તો જરા પણ ગભરાશો નહીં. સૌથી પહેલા સાયબર ક્રાઈમની નેશનલ હેલ્પલાઈન નંબર 1930 પર કોલ કરો અને તમારી ફરિયાદ નોંધાવો. તમે જેટલી જલ્દી જાણ કરશો, તમારા પૈસા પાછા આવવાની શક્યતા એટલી જ વધી જશે. સાવચેતી એ જ આજની ડિજિટલ દુનિયામાં તમારી સૌથી મોટી સુરક્ષા છે.

આ પણ વાંચો- રાજકોટ લોકમેળો ‘વિરાસતથી વિકાસ-2026': માત્ર મનોરંજન નહીં, યુપી-બિહારના કારીગરો માટે રોજીરોટીનો મહાસાગર, જાણો એક રાઈડ પાછળ કેટલા લોકોને મળે છે કામ