ડોનાલ્ડ ટ્રમ્પનો ધડાકો: 'ઈરાનના નવા સુપ્રીમ લીડર મોજતબા ખામેનેઈ 90% ખતમ થઈ ચૂક્યા છે', હોર્મુઝ સ્ટ્રેટ પર ભયંકર તણાવ

અમેરિકા અને ઈરાન વચ્ચે હાલમાં દુશ્મનાવટ ચરમસીમાએ પહોંચી ગઈ છે. આ વધતા સૈન્ય તણાવ વચ્ચે અમેરિકન રાષ્ટ્રપતિ ડોનાલ્ડ ટ્રમ્પે એક એવો દાવો કર્યો છે, જેનાથી આખી દુનિયામાં ખળભળાટ મચી ગયો છે. ટ્રમ્પે સ્પષ્ટ શબ્દોમાં કહ્યું છે કે ઈરાનનું ટોચનું સૈન્ય નેતૃત્વ હવે સાફ થઈ ગયું છે અને સ્વર્ગસ્થ સુપ્રીમ લીડર અયાતુલ્લા અલી ખામેનેઈના પુત્ર મોજતબા ખામેનેઈ 90% જેટલા ખતમ થઈ ચૂક્યા છે. ખાડી વિસ્તારમાં ફરી એકવાર બંને દેશો વચ્ચે મિસાઈલ હુમલા અને જવાબી કાર્યવાહી તેજ બની છે, જે મોટા યુદ્ધનો સંકેત આપી રહી છે.

'ઈરાનની સંરક્ષણ વ્યવસ્થા સંપૂર્ણપણે તબાહ'

એક પ્રખ્યાત ન્યૂઝ ચેનલ ફોક્સ ન્યૂઝ ને આપેલા ઈન્ટરવ્યુમાં ટ્રમ્પે જણાવ્યું હતું કે, અમેરિકા અને ઈઝરાયેલ દ્વારા હાલમાં જ કરવામાં આવેલી સંયુક્ત સૈન્ય કાર્યવાહીએ ઈરાનની કમર તોડી નાખી છે.ટ્રમ્પે દાવો કરતા કહ્યું, "તેમની પાસે હવે કોઈ નેવી બચી નથી. કોઈ એરફોર્સ નથી. બધું જ ખતમ થઈ ગયું છે. તેમની એન્ટી-એરક્રાફ્ટ સિસ્ટમ પણ નાશ પામી છે અને તમામ મોટા નેતાઓ માર્યા ગયા છે." તેમણે એમ પણ જણાવ્યું કે ઈરાનના સૌથી સક્ષમ કમાન્ડરોને ખાસ નિશાન બનાવવામાં આવ્યા છે.

મોજતબા ખામેનેઈ અંગેનો સૌથી મોટો ખુલાસો

અહેવાલો અનુસાર, અગાઉ થયેલા એક ભયંકર હવાઈ હુમલામાં મોજતબા ગંભીર રીતે ઘાયલ થયા હતા. આ જ કારણ છે કે તેઓ તાજેતરમાં ઈરાન અને ઈરાકમાં યોજાયેલા મોટા અંતિમ સંસ્કારના કાર્યક્રમોમાં ક્યાંય જોવા મળ્યા ન હતા.

'સ્ટ્રેટ ઓફ હોર્મુઝ' પર 20% ટેક્સ લગાવવાની તૈયારી

આ વિવાદનું નવું કેન્દ્ર સ્ટ્રેટ ઓફ હોર્મુઝ નામનો દરિયાઈ માર્ગ બન્યો છે. અમેરિકાએ ઈરાન પર દબાણ વધારતા જાહેરાત કરી છે કે તે આ દરિયાઈ માર્ગ પર નાકાબંધી કરશે. ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર લખ્યું હતું કે હવે અમેરિકન સેના 'સ્ટ્રેટ ઓફ હોર્મુઝના ગાર્ડિયન' તરીકે કામ કરશે. એટલું જ નહીં, અમેરિકાએ પ્રસ્તાવ મૂક્યો છે કે આ માર્ગ પરથી પસાર થતા જહાજોના માલસામાન પર 20% ટેક્સ વસૂલવામાં આવશે. અમેરિકાનું કહેવું છે કે આ ટેક્સના પૈસાથી જહાજોની સુરક્ષાનો ખર્ચ કાઢવામાં આવશે.

ઈરાને અમેરિકાના દાવાઓ ફગાવ્યા

અમેરિકાની આ ટેક્સ વસૂલવાની અને સુરક્ષા કવચ પૂરા પાડવાની જાહેરાત બાદ ઈરાને આકરો વિરોધ નોંધાવ્યો છે. ઈરાનના વિદેશ મંત્રી અબ્બાસ અરાઘચીએ ટ્રમ્પના દાવાઓને પાયાવિહોણા ગણાવ્યા છે.

સોશિયલ મીડિયા પર કટાક્ષ કરતા અરાઘચીએ સ્પષ્ટ કર્યું કે, હોર્મુઝની સુરક્ષા કરવાની જવાબદારી ઈરાનની છે, અમેરિકાની નહીં. ઈરાને અમેરિકાના આ પગલાને એકતરફી અને ગેરકાયદેસર ગણાવ્યું છે. ઈરાનનું કહેવું છે કે ઐતિહાસિક અને કાયદાકીય રીતે હોર્મુઝ પર નિયંત્રણનો અધિકાર માત્ર તેમનો જ છે.

આ પણ વાંચો-લાલુ પ્રસાદ યાદવને સુપ્રીમ કોર્ટમાંથી મોટી રાહત! જામીન રદ કરવાની CBIની માંગ ફગાવી, જાણો શું છે લેટેસ્ટ અપડેટ