ગૂગલ એક્સ એ કર્યો કમાલ, તારા ચિપ કરી લોન્ચ, હવે તમને પ્રકાશ દ્વારા મળશે હાઇ સ્પીડ ઇન્ટરનેટ

ગૂગલની X મૂનશોટ ફેક્ટરીએ એક નવી ક્રાંતિકારી ટેક્નોલોજીની શોધ કરી છે, જેનું નામ છે 'તારા ચિપ' (Taara Chip). આ ચિપ પ્રકાશની મદદથી હાઈ સ્પીડ ઈન્ટરનેટ પૂરું પાડવાની ક્ષમતા ધરાવે છે. આ નવી ટેક્નોલોજી દ્વારા ઓપ્ટિકલ ફાઈબરની જેમ 10 Gbps સુધીની ઝડપે ડેટા ટ્રાન્સફર કરી શકાય છે, તે પણ કોઈપણ વાયર વગર. આ શોધ ખાસ કરીને એવા વિસ્તારો માટે વરદાન સાબિત થશે, જ્યાં ઓપ્ટિકલ ફાઈબરનું ઈન્ફ્રાસ્ટ્રક્ચર બનાવવું મુશ્કેલ કે અશક્ય હોય.

પ્રકાશથી ચાલતું ઈન્ટરનેટ

ગૂગલ X દ્વારા વિકસાવવામાં આવેલું આ તારા ચિપ એક સિલિકોન ફોટોનિક ચિપ છે, જે હવામાં પ્રકાશના કિરણો (લાઈટ બીમ્સ) દ્વારા હાઈ સ્પીડ ડેટા ટ્રાન્સમિટ કરે છે. ટેસ્ટિંગ દરમિયાન આ ચિપે 1 કિલોમીટરના અંતરે બે પોઈન્ટ્સ વચ્ચે 10 Gbpsની ઝડપે ડેટા ટ્રાન્સફર કરીને પોતાની ક્ષમતા સાબિત કરી છે. આ ટેક્નોલોજીનો મુખ્ય ફાયદો એ છે કે તેને કેબલની જરૂર નથી, જેનાથી ઈન્ટરનેટ સેવા ઝડપથી અને ઓછા ખર્ચે ઉપલબ્ધ કરાવી શકાય છે.

ઓછા ખર્ચે મોટો ફાયદો

આજે ટેલિકોમ કંપનીઓ અને ઈન્ટરનેટ સેવા પ્રદાતાઓ ઓપ્ટિકલ ફાઈબર કેબલ (OFC) દ્વારા ઘરોમાં હાઈ સ્પીડ ઈન્ટરનેટ પહોંચાડે છે. પરંતુ ઓપ્ટિકલ ફાઈબર નાખવાનો ખર્ચ અને સમય ઘણો લાગે છે. તારા ચિપ આ સમસ્યાને દૂર કરે છે. આ ટેક્નોલોજી દ્વારા કેબલ વગર જ ઓપ્ટિકલ ફાઈબર જેવી ઝડપે ઈન્ટરનેટ પૂરું પાડી શકાય છે. આનાથી દૂરના વિસ્તારોમાં ડેટા સેન્ટર સ્થાપવું સરળ બનશે, જ્યાં ફાઈબર કેબલ પહોંચાડવું શક્ય નથી.

5G અને વાહન સંચારમાં ઉપયોગ

રિપોર્ટ્સ અનુસાર, ગૂગલનું આ તારા ચિપ પ્રકાશના ઉત્સર્જન અને ટ્રાન્સમિશનનો ઉપયોગ કરીને એકથી બીજા પોઈન્ટ સુધી ડેટા ટ્રાન્સફર કરે છે. આ ટેક્નોલોજીનો ઉપયોગ 5G નેટવર્કને અપગ્રેડ કરવા માટે પણ થઈ શકે છે. તારા ચિપના જનરલ મેનેજર મહેશ કૃષ્ણાસ્વામીએ જણાવ્યું કે, "આ ચિપ ઓછા ખર્ચે હાઈ સ્પીડ ડેટા ટ્રાન્સફરની સુવિધા આપશે, જે દુર્ગમ વિસ્તારોમાં ઈન્ટરનેટ પહોંચાડવાનું સરળ બનાવશે." આ ઉપરાંત, આ ટેક્નોલોજી વાહનોના સંચાર સિસ્ટમ (વ્હીકલ કમ્યુનિકેશન) માટે પણ ઉપયોગી સાબિત થઈ શકે છે.