2036 ઓલિમ્પિકની યજમાની માટે ભારત રેસમાં: IOCએ કરી મોટી જાહેરાત, આ 7 દેશો વચ્ચે થશે જોરદાર ટક્કર

Olympic Games: સ્પોર્ટ્સ પ્રેમીઓ માટે એક બહુ જ મોટા સમાચાર સામે આવ્યા છે. ઇન્ટરનેશનલ ઓલિમ્પિક કમિટીએ સત્તાવાર રીતે પુષ્ટિ કરી છે કે 2036 માં યોજાનારા ઓલિમ્પિક ગેમ્સની યજમાની કરવા માટે ભારત મજબૂત દાવેદાર છે. ભારત સહિત કુલ 7 દેશોએ આ મેગા સ્પોર્ટ્સ ઇવેન્ટને હોસ્ટ કરવામાં રસ દાખવ્યો છે.

નવેમ્બરમાં થશે પ્રેઝન્ટેશન, 2029 માં લેવાશે ફાઇનલ નિર્ણય

ન્યૂઝ એજન્સીના રિપોર્ટ અનુસાર, 2036 ઓલિમ્પિકની રેસમાં હાલ ભારત, જર્મની, હંગેરી, કતાર, સાઉથ કોરિયા, સાઉથ આફ્રિકા અને તુર્કી સામેલ છે. આ ઉપરાંત કેટલાક દેશો 2036 પછીના ઓલિમ્પિક માટે પણ અત્યારથી વાતચીત કરી રહ્યા છે.

IOC દ્વારા આ તમામ 7 દેશોને આવતા નવેમ્બર મહિનામાં 'ફ્યુચર હોસ્ટ કમિશન' સમક્ષ પોતાની તૈયારીઓ અને યોજનાઓનું પ્રેઝન્ટેશન આપવા માટે બોલાવવામાં આવ્યા છે. આ પ્રેઝન્ટેશન બાદ, વર્ષ 2029 માં 100 થી વધુ દેશો સાથે મળીને વોટિંગ કરશે. આ વોટિંગ બાદ જ ફાઇનલ જાહેરાત થશે કે 2036 નો ઓલિમ્પિક કયા દેશમાં રમાશે.

IOC એ સ્પષ્ટ કર્યું છે કે, યજમાની આપતા પહેલા ઘણી મહત્વની બાબતોનું બારીકાઈથી ધ્યાન રાખવામાં આવશે. કોઈ પણ દેશની પસંદગી નીચે મુજબના આધારે થશે.

રમતો ક્યાં રમાડાશે અને ખેલાડીઓ ને કેવી સુવિધાઓ મળશે?

આટલા મોટા આયોજન માટે દેશ પાસે પૂરતું બજેટ ક્યાંથી આવશે?

દેશની સરકાર અને જનતાનો આ ઇવેન્ટ માટે કેવો સપોર્ટ છે?

દેશમાં આટલી મોટી ઇવેન્ટ સંભાળવા માટે ઇન્ફ્રાસ્ટ્રક્ચર અને ક્ષમતા છે કે નહીં?

રમતો પૂરી થયા પછી ત્યાંના સામાન્ય લોકોને ભવિષ્યમાં તેનો શું ફાયદો થશે?

ભારતની દાવેદારીમાં અમદાવાદ છે મુખ્ય શહેર

IOC એ એ પણ સ્પષ્ટ કરી દીધું છે કે 31 ઓક્ટોબર પછી કોઈ પણ નવા દેશની દાવેદારી સ્વીકારવામાં આવશે નહીં. ભારતે તાજેતરમાં જ યજમાની કરવાની પોતાની પ્રબળ ઈચ્છા વ્યક્ત કરી હતી.

IOC ના નવા અધ્યક્ષ અને 2 વખતના ઓલિમ્પિક ગોલ્ડ મેડાલિસ્ટ કર્સ્ટી કોવેન્ટ્રીનું માનવું છે કે, રમત દુનિયાના કોઈ પણ ખૂણે રમાય, પરંતુ એથ્લેટ્સની સુવિધાઓ અને જરૂરિયાતો હંમેશા સૌથી ઉપર હોવી જોઈએ. આ જ કારણથી તેમણે પસંદગી પ્રક્રિયા થોડા સમય માટે રોકીને તેને વધુ સારી બનાવી છે. ભારતની આ દાવેદારીમાં ગુજરાતનું અમદાવાદ શહેર મુખ્ય કેન્દ્ર છે, જ્યાં 2030ના કોમનવેલ્થ ગેમ્સનું પણ આયોજન થવા જઈ રહ્યું છે.

કતાર આપશે જોરદાર ટક્કર

આ રેસમાં કતાર પણ ભારતને ખૂબ મજબૂત ટક્કર આપી રહ્યું છે. કતાર પાસે 2022 ફિફા વર્લ્ડ કપ જેવા મોટા અને સફળ આયોજનનો અનુભવ છે. એવું માનવામાં આવે છે કે કતાર પોતાની રાજધાની દોહાની સાથે આસપાસના પાડોશી દેશોમાં પણ રમતો રમાડી શકે છે.

સામાન્ય રીતે 2004 થી લઈને અત્યાર સુધીના ઓલિમ્પિક જુલાઈ અને ઓગસ્ટ મહિનામાં જ રમાયા છે. પરંતુ જો કતારને 2036 ની યજમાની મળશે, તો ત્યાં પડતી ભયંકર ગરમીને ધ્યાનમાં રાખીને ઓલિમ્પિકના શેડ્યૂલમાં મોટો ફેરફાર થઈ શકે છે.

આ પણ વાંચો-કોમર્શિયલ પાયલટ ટ્રેનિંગ માટે ગુજરાત બન્યું નેશનલ હબ: નવી 5 ફ્લાઇંગ ઈન્સ્ટિટ્યૂટ શરૂ થશે, યુવાનો માટે ખુલ્યા કારકિર્દીના નવા દ્વાર