મજૂરના દીકરાની કમાલ, ભારતીય સેના માટે બનાવશે અત્યાધુનિક ડ્રોન, સંરક્ષણ મંત્રાલયે મંજૂર કર્યા 3.50 કરોડ રૂપિયા

જો વ્યક્તિમાં કંઈક કરી છૂટવાની ધગશ હોય, તો ગરીબી કે સાધનોનો અભાવ ક્યારેય નડતો નથી. હમીરપુરની સરકારી પોલીટેકનિક કોલેજના એક છાત્રે આ વાત સાબિત કરી બતાવી છે. એક સામાન્ય અને ગરીબ પરિવારમાંથી આવતા સર્વેશ શર્માએ ભારતીય સેનાની સુરક્ષા અને જરૂરિયાતોને ધ્યાનમાં રાખીને એક એવું અત્યાધુનિક ડ્રોન તૈયાર કર્યું છે, જેની નોંધ છેક દિલ્હી સુધી લેવાઈ છે. આ પ્રોજેક્ટની સફળતાને જોતા રક્ષા મંત્રાલય દ્વારા તેને આગળ વધારવા માટે 3.50 કરોડ રૂપિયાની માતબર ગ્રાન્ટ ફાળવવામાં આવી છે.

આ રીતે આવ્યો ડ્રોન બનાવવાનો આઈડિયા

સર્વેશ શર્મા હમીરપુરની સરકારી પોલીટેકનિક કોલેજમાં કમ્પ્યુટર એન્જિનિયરિંગના 5 માં સેમેસ્ટરનો વિદ્યાર્થી છે. તાજેતરમાં તેણે IIT જોધપુર અને કોણાર્ક કોર દ્વારા આયોજિત નેશનલ લેવલની ઓપન કાર્ડબોર્ડ ડ્રોન સ્પર્ધામાં ભાગ લીધો હતો. આ સ્પર્ધામાં દેશભરમાંથી આવેલી લગભગ 50 જેટલી ટીમોએ પોતાના આઈડિયા રજૂ કર્યા હતા. આ કઠિન સ્પર્ધામાં સર્વેશની ટીમે ઉત્કૃષ્ટ પ્રદર્શન કરીને ચોથું સ્થાન પ્રાપ્ત કર્યું હતું. બસ, અહીંથી જ તેને દેશની સેના માટે કંઈક મોટું કરવાની પ્રેરણા મળી.

શરૂઆતી મોડેલ અને ગ્રાન્ટની સફર

શું છે આ ડ્રોનની ખાસિયતો?

સર્વેશ હવે જે પ્રોજેક્ટ પર કામ કરવાનો છે તેનું નામ 'રુદ્રા એજ T-1 (સ્પેક્ટ્રા)' રાખવામાં આવ્યું છે. આ ડ્રોન ખાસ કરીને ભારતીય સેના માટે બોર્ડર પર નજર રાખવા (સીમા નિગરાની) માટે વિકસાવવામાં આવી રહ્યું છે. તેની સૌથી મોટી ખાસિયત એ હશે કે તે દુશ્મન દેશના રડારની પકડમાં નહીં આવે. આ ઉપરાંત, દુશ્મનો દ્વારા કરવામાં આવતા ઈલેક્ટ્રોનિક જામિંગની અસરને પણ આ ડ્રોન સરળતાથી નિષ્ફળ બનાવી શકશે.

હવે IIT રૂરકીમાં થશે આગળનું કામ

રક્ષા મંત્રાલયની લીલી ઝંડી મળ્યા બાદ, હવે આ પ્રોજેક્ટનું ઈન્ક્યુબેશન સેન્ટર IIT રૂરકી ખાતે બનાવવામાં આવ્યું છે.સર્વેશ હવે IIT રૂરકીની અત્યાધુનિક લેબમાં આ ડ્રોન પર રિસર્ચ અને ડેવલપમેન્ટનું કામ કરશે.પ્રોજેક્ટને લગતી તમામ ઔપચારિકતાઓ પૂરી કરવા માટે તેને 20 દિવસનો સમય આપવામાં આવ્યો છે.જ્યારે આ સંપૂર્ણ પ્રોજેક્ટ તૈયાર કરવા માટે 20 મહિનાનો લક્ષ્યાંક નક્કી કરવામાં આવ્યો છે.

સાધારણ પરિવારના દીકરાની અસાધારણ સિદ્ધિ

સર્વેશ શર્મા મૂળ હમીરપુરના બાહનવી ગામનો વતની છે. તેનો પરિવાર આર્થિક રીતે ખૂબ જ સામાન્ય છે. તેના પિતા સંજીવ શર્મા છૂટક મજૂરી કરીને પરિવારનું ગુજરાન ચલાવે છે. સર્વેશે પોતાનું પ્રાથમિક શિક્ષણ સરકારી શાળામાં જ પૂરું કર્યું છે. દીકરાની આ ઐતિહાસિક સિદ્ધિથી પરિવારમાં ખુશીનો માહોલ છે. કોલેજના પ્રિન્સિપાલ ચંદ્રશેખર, એચઓડી સમીર ભારતી સહિત તમામ શિક્ષકોએ તેને ભવિષ્ય માટે શુભકામનાઓ પાઠવી છે.

આ પણ વાંચો-ઈરાનને મોટો ઝટકો, ભારતને ફાયદો! ડોનાલ્ડ ટ્રમ્પે ‘ભારત-મિડલ ઈસ્ટ-યુરોપ કોરિડોર'ને આપ્યું બમ્પર સમર્થન