Made in India સ્ટીલ્થ ફાઇટર જેટ: 2 લાખ કરોડના મેગા પ્રોજેક્ટ માટે અદાણી-ટાટા સહિત 7 કંપનીઓ મેદાનમાં, આકાશમાં ભારત બનશે 'ગેમ ચેન્જર'

Made in India Stealth Fighter Jet: ભારતીય વાયુસેનાને વધુ શક્તિશાળી અને ભવિષ્યની ટેકનોલોજીથી સજ્જ કરવા માટે કેન્દ્ર સરકારે એક મોટું પગલું ભર્યું છે. દેશે તેના સૌથી મહત્વાકાંક્ષી ડિફેન્સ પ્રોજેક્ટ્સમાંથી એક, 5th જનરેશનના એડવાન્સ મીડિયમ કોમ્બેટ એરક્રાફ્ટ (AMCA) બનાવવા માટેની પ્રક્રિયાને વેગ આપ્યો છે. આ મેગા પ્રોજેક્ટ પાછળ લગભગ 2 લાખ કરોડનો ખર્ચ કરવામાં આવશે, જે અંતર્ગત 125થી વધુ સુપરસોનિક સ્ટીલ્થ ફાઇટર જેટ્સનું નિર્માણ ભારતમાં જ કરવામાં આવશે.

દેશની ટોચની 7 કંપનીઓએ લગાવી બોલી

આ પ્રોજેક્ટ માટે દેશની દિગ્ગજ કંપનીઓએ રસ દાખવ્યો છે. કુલ 7 કંપનીઓએ આ ફાઇટર જેટના પ્રોટોટાઇપને ડિઝાઇન અને ડેવલપ કરવા માટે બોલી લગાવી છે. આ કંપનીઓમાં સરકારી માલિકીની હિન્દુસ્તાન એરોનોટિક્સ લિમિટેડ (HAL) ઉપરાંત લાર્સન એન્ડ ટુબ્રો (L&T), ટાટા એડવાન્સ્ડ સિસ્ટમ્સ લિમિટેડ અને અદાણી ડિફેન્સ જેવી મોટી પ્રાઇવેટ કંપનીઓ પણ સામેલ છે.

ડિફેન્સ રિસર્ચ એન્ડ ડેવલપમેન્ટ ઓર્ગેનાઇઝેશન (DRDO) આ પ્રોજેક્ટને લીડ કરી રહ્યું છે. બોલી લગાવનાર 7 કંપનીઓમાંથી 2 કંપનીઓની પસંદગી કરવામાં આવશે. આ પસંદગી બ્રહ્મોસ એરોસ્પેસના પૂર્વ પ્રમુખ એ. શિવથાનુ પિલ્લઇની અધ્યક્ષતાવાળી એક કમિટી દ્વારા કરવામાં આવશે, જે પોતાનો રિપોર્ટ સંરક્ષણ મંત્રાલયને સોંપશે.

શરૂઆતમાં, પસંદ કરાયેલી બે કંપનીઓને 5 પ્રોટોટાઇપ મોડેલ બનાવવા માટે 15,000 કરોડનો કોન્ટ્રાક્ટ મળશે. આ પ્રોટોટાઇપના સફળ પરીક્ષણ બાદ મોટા પાયે વિમાનોના ઉત્પાદન માટેના અધિકારો આપવામાં આવશે. આશા છે કે આ વિમાનો 2035 સુધીમાં ભારતીય વાયુસેનાના બેડામાં સામેલ થઈ જશે. આ પ્રોજેક્ટ સફળ થતાં જ ભારત અમેરિકા (F-22, F-35), ચીન (J-20) અને રશિયા (Su-57) જેવા દેશોની હરોળમાં આવી જશે જેમની પાસે પોતાના 5th જનરેશન ફાઇટર જેટ છે.

દુશ્મનો માટે કેમ ઘાતક સાબિત થશે AMCA?

ભારતનું પ્રથમ 5th જનરેશનનું ફાઇટર જેટ અનેક અત્યાધુનિક ટેકનોલોજીથી સજ્જ હશે.

ડિઝાઇન: આ એક સિંગલ-સીટ અને ટ્વિન-એન્જિન (બે એન્જિન) ધરાવતું જેટ હશે.

સ્ટીલ્થ ટેકનોલોજી: તેની પર એક ખાસ પ્રકારનું સ્ટીલ્થ કોટિંગ હશે અને હથિયારોને વિમાનની અંદર રાખવા માટે ઇન્ટરનલ વેપન્સ બે હશે, જેના કારણે તે દુશ્મનના રડારમાં સરળતાથી પકડાશે નહીં.

પાવર અને રેન્જ: આ વિમાન 55,000 ફૂટની ઊંચાઈ પર ઓપરેટ કરી શકશે. તે પોતાની સાથે 6,500 કિલોગ્રામ વધારાનું ફ્યુઅલ લઈ જઈ શકશે.

હથિયાર ક્ષમતા: તે વિમાનની અંદર 1,500 કિલોગ્રામ અને બહારના ભાગમાં 5,500 કિલોગ્રામના હથિયારો લઈ જઈ શકશે.

બે અલગ-અલગ વર્ઝનમાં બનશે, બીજામાં હશે સ્વદેશી એન્જિન

રિપોર્ટ્સ અનુસાર, AMCAના બે વર્ઝન તૈયાર કરવામાં આવશે. પહેલા વર્ઝનમાં અમેરિકન કંપની જનરલ ઇલેક્ટ્રિક (GE)નું F414 એન્જિન લગાવવામાં આવશે. જોકે, બીજા વર્ઝનમાં સંપૂર્ણપણે સ્વદેશી અને વધુ શક્તિશાળી એન્જિન લગાવવાની ભારતની યોજના છે. આ વિમાનમાં એડવાન્સ બેટલફિલ્ડ સોફ્ટવેર હશે જે પાઇલટને યુદ્ધક્ષેત્ર અને દુશ્મનની દરેક ગતિવિધિ વિશે રિયલ-ટાઇમ માહિતી આપશે, જેથી તે હંમેશાં દુશ્મન પર હાવી રહી શકે.

આ પણ વાંચો-રૂપિયો બન્યો વૈશ્વિક: નેપાળ, શ્રીલંકા અને ભૂતાનમાં હવે રૂપિયામાં ટ્રેડ અને લોન!