ભારત સરકારની કડકાઈ બાદ ઝૂક્યું Meta, બાળકોની સુરક્ષાને લઈને માર્ક ઝુકરબર્ગની કંપનીએ લીધો મોટો નિર્ણય

Meta Child Sexual Case: સોશિયલ મીડિયા પ્લેટફોર્મ પર બાળકોની સુરક્ષા અને આપત્તિજનક કન્ટેન્ટને લઈને ભારત સરકારે લાલ આંખ કરી છે. સરકારની કડકાઈ બાદ હવે અમેરિકન ટેક દિગ્ગજ અને માર્ક ઝુકરબર્ગની કંપની મેટાએ મોટો નિર્ણય લીધો છે.

સરકારી સૂત્રોએ મંગળવારે માહિતી આપી હતી કે, મેટા હવે પોતાના પ્લેટફોર્મ પર બાળકોના યૌન શોષણ સંબંધિત કોઈપણ કેસ કે ઘટનાની માહિતી સીધી ભારતીય કાનૂન લાગુ કરનારી એજન્સીઓને આપવા માટે સંમત થઈ ગઈ છે.

સરકારનું કડક વલણ: બાળકોની સુરક્ષા સાથે કોઈ બાંધછોડ નહીં

ઈલેક્ટ્રોનિક્સ અને ઈન્ફોર્મેશન ટેકનોલોજી મંત્રાલયના સૂત્રોના જણાવ્યા અનુસાર, ભારતમાં કામ કરતી કોઈપણ સોશિયલ મીડિયા કંપની માટે બાળકોની ઓનલાઈન સુરક્ષા એ પાયાનો સિદ્ધાંત છે. આ બાબતે સરકાર કોઈપણ પ્રકારની બાંધછોડ કરવા તૈયાર નથી. લાંબા સમયથી સરકાર હાનિકારક માહિતી અને ફેક ન્યૂઝને રોકવા માટે સોશિયલ મીડિયા પ્લેટફોર્મ્સ સાથે વાટાઘાટો કરી રહી છે. મેટાની આ સહમતિ બાળકો માટે ઇન્ટરનેટને સુરક્ષિત બનાવવાની દિશામાં એક ખૂબ જ મહત્વપૂર્ણ અને પ્રથમ પગલું છે.

છેલ્લા કેટલાક સમયથી સરકાર સોશિયલ મીડિયા પ્લેટફોર્મ્સ પર ઝીણવટભરી નજર રાખી રહી છે. સરકારે મેટાને હાનિકારક અને ગેરકાયદેસર ઓનલાઈન કન્ટેન્ટ (જેમાં બાળકોના યૌન શોષણને લગતી સામગ્રી અને ડીપફેક સામેલ છે) રોકવા માટે કડક નોટિસ ફટકારી હતી. આ મામલાની ગંભીરતાને જોતા તાજેતરમાં જ સોશિયલ મીડિયા કંપનીના ટોચના અધિકારીઓને ભારતમાં તલબ કરવામાં આવ્યા હતા. કેન્દ્ર સરકારે સ્પષ્ટ શબ્દોમાં ચેતવણી આપી છે કે જો કોઈ કંપની ભારતીય કાયદાઓનું પાલન નહીં કરે, તો તેને કોઈપણ સંજોગોમાં ચલાવી લેવામાં આવશે નહીં.

અન્ય પ્લેટફોર્મ્સ સામે પણ થશે કાર્યવાહી

આ માત્ર મેટા પૂરતું સીમિત નથી. સરકારે ડિજિટલ પ્લેટફોર્મ્સની જવાબદારી નક્કી કરતા સ્પષ્ટ કર્યું છે કે, જે કંપનીઓ સગીર બાળકોને હાનિકારક કન્ટેન્ટથી બચાવવા માટે યોગ્ય અને સક્રિય પગલાં નહીં લે, તેમની સામે પણ આકરી કાનૂની કાર્યવાહી કરવામાં આવશે.

આ પણ વાંચો-તુકારામ મુંઢેની મોટી કાર્યવાહી: 11 રૂપિયાની વસ્તુના 325 વસૂલતી ખાનગી હોસ્પિટલોનો પર્દાફાશ, કમાય છે 2841% નફો