PM Modi Birthday Special: 12 વર્ષમાં નવો ભારત, જાણો 2014થી 2026 વચ્ચે પીએમ મોદીએ કેવી રીતે બદલ્યો દેશ અને દુનિયાનો નજરિયો

PM Modi Birthday Special: 17 સપ્ટેમ્બર 2026ના રોજ દેશના વડાપ્રધાન નરેન્દ્ર મોદી તેમનો 76મો જન્મદિવસ મનાવી રહ્યા છે. છેલ્લા 12 વર્ષથી દેશનું સુકાન સંભાળી રહેલા પીએમ મોદીની કામ કરવાની સ્પીડમાં જરા પણ ઘટાડો થયો નથી. તાજેતરમાં બ્રિક્સ 2026ના સફળ આયોજને સાબિત કરી દીધું છે કે ભારત હવે દુનિયાના ટોચના દેશોની હરોળમાં મજબૂતીથી ઊભું છે. આજે ભારતને નજરઅંદાજ કરવું કોઈપણ દેશ માટે શક્ય નથી. પીએમ મોદીના 12 વર્ષના કાર્યકાળમાં માત્ર દેશ જ નથી બદલાયો, પરંતુ લોકોની વિચારસરણી અને ભારત તરફ જોવાનો દુનિયાનો નજરિયો પણ બદલાઈ ગયો છે.

2014 પહેલાનો ભારત અને મોદીની એન્ટ્રી

2014 પહેલા દેશમાં પોલિસી પેરાલિસિસ અને ભ્રષ્ટાચારનો માહોલ હતો. એવો સમય હતો જ્યારે સરકાર પરથી જનતાનો ભરોસો ઊઠી ગયો હતો. આવા સમયે મે 2014 માં નરેન્દ્ર મોદીએ વડાપ્રધાન તરીકે શપથ લીધા. ગુજરાતના મુખ્યમંત્રી તરીકે મળેલો તમામ પગાર દીકરીઓના શિક્ષણ માટે દાન કરીને તેઓ માત્ર બે સૂટકેસ સાથે દિલ્હી પહોંચ્યા હતા. તેમની સાથે તેમની જૂની અને ભરોસાપાત્ર ટીમ હતી, જેણે દિલ્હીમાં પણ સફળતાપૂર્વક મોરચો સંભાળી લીધો.

પડકારો અને જનતાનો અતૂટ 'મોદી ભરોસો'

પહેલો કાર્યકાળ (2014-19): નોટબંધી જેવા કડક નિર્ણયો અને વિપક્ષના આક્ષેપો છતાં 2019 માં જનતાએ ફરી 'મોદી ગેરંટી' પર મહોર મારી.

બીજો કાર્યકાળ (2019-24): કલમ 370 હટાવવી અને ટ્રિપલ તલાક નાબૂદ કરવા જેવા ઐતિહાસિક નિર્ણયો લેવાયા. કોરોના જેવી વૈશ્વિક મહામારીમાં ભારતે માત્ર પોતાની જનતાને જ નહીં, પણ આખી દુનિયાને મફત રસી પહોંચાડીને સંકટમોચકની ભૂમિકા ભજવી.

2024 ની ઐતિહાસિક જીત: 10 વર્ષની એન્ટી-ઇન્કમ્બન્સી છતાં NDA એ 290 થી વધુ બેઠકો સાથે સત્તામાં વાપસી કરી, જે પીએમ મોદીની લોકપ્રિયતાનો પુરાવો છે.

દેશમાં છેલ્લા 12 વર્ષમાં શું-શું બદલાયું?

પીએમ મોદીના શાસનમાં છેવાડાના માનવી સુધી વિકાસ પહોંચ્યો છે. કોરોના કાળથી દેશના 80 કરોડ ગરીબોને મફત રાશન મળી રહ્યું છે. જન ધન યોજના હેઠળ બેંક ખાતા ખૂલ્યા અને યોજનાઓના પૈસા સીધા ખાતામાં આવવા લાગ્યા. પીએમ કિસાન સન્માન નિધિ દ્વારા કરોડો ખેડૂતોને આર્થિક મદદ મળી રહી છે. 'બેટી બચાવો, બેટી પઢાવો' એક જનઆંદોલન બની ગયું છે. સ્વચ્છ ભારત અભિયાન હેઠળ શૌચાલયો બન્યા અને ઉજ્જવલા યોજનાથી ધુમાડામાંથી મુક્તિ મળી.

આજે 'લખપતિ દીદી' અને 'ડ્રોન દીદી' જેવી યોજનાઓથી મહિલાઓ આત્મનિર્ભર બની રહી છે. આજે ગામડાઓમાં પણ UPI દ્વારા ડિજિટલ પેમેન્ટ થઈ રહ્યું છે. સર્ટિફિકેટ જાતે જ અટેસ્ટ કરવાની છૂટ અને પેપરલેસ કામગીરીથી સામાન્ય માણસને સરકારી કચેરીઓના ધક્કા ખાવામાંથી મુક્તિ મળી છે. લાલ બત્તીઓ હટાવી દેવામાં આવી છે. સાયરનનો અધિકાર માત્ર એમ્બ્યુલન્સને છે. પીએમ મોદી પોતે મેટ્રોમાં સામાન્ય જનતા સાથે મુસાફરી કરે છે અને મંત્રીઓને રજા લીધા વિના સતત કામ કરવાની આદત પાડી છે.

ઐતિહાસિક નિર્ણયો જે ઇતિહાસમાં નોંધાયા

પીએમ મોદીના કાર્યકાળમાં કેટલાક એવા નિર્ણયો લેવાયા જેની દેશ વર્ષોથી રાહ જોઈ રહ્યો હતો. કાશ્મીરમાંથી શાંતિપૂર્ણ રીતે કલમ 370 ની નાબૂદી, અયોધ્યામાં ભવ્ય રામ મંદિરનું નિર્માણ અને બુલેટ ટ્રેન પ્રોજેક્ટ આવનારી પેઢીઓ હંમેશા યાદ રાખશે.

Gen Z સાથે કનેક્શન અને 2029ની તૈયારી

પીએમ મોદી જાણે છે કે સમય બદલાઈ રહ્યો છે. તેથી જ તેઓ ઈન્સ્ટાગ્રામ અને ડિજિટલ પ્લેટફોર્મ પર યુવાનો સાથે સીધો સંવાદ કરી રહ્યા છે. મંત્રીઓને પણ જનતાની ભાષામાં વાત કરવાનો નિર્દેશ અપાયો છે. પોતાના 76મા જન્મદિવસે પીએમ મોદી કોઈ જશ્ન મનાવવાના બદલે 17 સપ્ટેમ્બરથી 'સેવા પખવાડિયું' ઉજવી રહ્યા છે.

આ પણ વાંચો-આતંકવાદ સામે મોદી સરકારની લાલ આંખ: પાકિસ્તાન સમર્થિત 'શાહજાદ ભટ્ટી નેટવર્ક' UAPA હેઠળ આતંકી સંગઠન ઘોષિત