Pokના ગરીબ લોકો ભારતમાં ઘૂસણખોરી કરવા પાકિસ્તાની સેનાના બન્યા પ્યાદા, મિશન ફેલ જવા પર મારી દેવાય છે ગોળી

પાકિસ્તાન અધિકૃત કાશ્મીર (PoK)માં ફરી એકવાર વિરોધ પ્રદર્શનો શરૂ થયા છે. અહીં પાકિસ્તાની સેના વિરુદ્ધ નારા લગાવવામાં આવી રહ્યા છે. અહીંના લોકોનો આરોપ છે કે પાક આર્મી ભારતમાં બળજબરીથી ઘૂસણખોરી કરવા માટે Pokના ગરીબ લોકોને પ્યાદા તરીકે ઉપયોગ કરી રહી છે. એટલું જ નહીં, લોકોનો આરોપ છે કે જ્યારે મિશન નિષ્ફળ જાય છે ત્યારે પાકિસ્તાની સેના આ લોકોને ગોળી મારી દે છે. સૂત્રોના જણાવ્યા અનુસાર, છેલ્લા કેટલાક દિવસોમાં આવા કેટલાય કિસ્સાઓ સામે આવ્યા છે જ્યારે ભારતીય સેનાના જવાનોને જોઈને ઘુસણખોરીનો પ્રયાસ કરનાર પોકના લોકો પાછા પાકિસ્તાન ભાગી ગયા હતા, ત્યારબાદ તેઓને મારી નાખવામાં આવ્યા હતા. પ્રદર્શનકારીઓએ કહ્યું છે કે પાકિસ્તાન આર્મી તેમના જ દેશના ગરીબ લોકોની હત્યા કરી રહી છે.

સૂત્રોએ ન્યૂઝ18ને જણાવ્યું કે PoKમાં રહેતા ગરીબ લોકોને પાકિસ્તાની સેના દ્વારા ભારતમાં ઘૂસણખોરી કરવા માટે ભારે લાલચ આપવામાં આવી રહી છે. પરંતુ ઘૂસણખોરીનો પ્રયાસ નિષ્ફળ જતાં પાકિસ્તાની સેના પોતાના જ લોકોને મારી રહી છે. ઘણા યુવાનોની હત્યા બાદ લોકોએ પાકિસ્તાની સેનાનો વિરોધ શરૂ કરી દીધો છે. દેખાવકારોનું કહેવું છે કે અહીં માત્ર યુનિફોર્મ છે, આતંકવાદ છે.

વાસ્તવમાં, ભારતમાં ઘૂસણખોરી કરવામાં નિષ્ફળતાના કારણે પાકિસ્તાની સેના બેહાલ છે. ભારતીય સુરક્ષા દળોએ તાજેતરમાં જમ્મુ અને કાશ્મીરના માછિલ સેક્ટરમાં નિયંત્રણ રેખા પર ઘૂસણખોરીના પ્રયાસને નિષ્ફળ બનાવ્યો હતો અને ચાર આતંકવાદીઓને ઠાર કર્યા હતા. ઉત્તર કાશ્મીરના કુપવાડા જિલ્લામાં માછિલ સેક્ટરના કાલા જંગલમાં ઘૂસણખોરીની કોશિશને નિષ્ફળ બનાવવામાં આવી હતી, એમ પોલીસે જણાવ્યું હતું. તેમાં કહેવામાં આવ્યું છે કે સુરક્ષા દળોએ ઘટનાસ્થળેથી શસ્ત્રો, દારૂગોળો અને શંકાસ્પદ માદક દ્રવ્યોનો વિશાળ જથ્થો જપ્ત કર્યો છે.

ઓપરેશનની વિગતો આપતા, સંરક્ષણ પ્રવક્તાએ જણાવ્યું હતું કે સેનાએ 22-23 જૂનની મધ્યાંતર દરમિયાન માછિલ સેક્ટરના કાલા જંગલમાં શંકાસ્પદ હિલચાલ શોધી કાઢી હતી. તેમણે કહ્યું કે રાત્રે લગભગ સાડા ચાર વાગે 4 આતંકવાદીઓને પાકિસ્તાન તરફથી નિયંત્રણ રેખા પાર કરતા જોવામાં આવ્યા હતા. ઘૂસણખોરી દરમિયાન સુરક્ષા દળોનું એન્કાઉન્ટર થયું હતું.

આ પણ વાંચો - Weather Updates: આજે દિલ્હીમાં હળવા વરસાદની શક્યતા, IMDએ ગોવા માટે યલો એલર્ટ કર્યું જાહેર

ભીષણ ગોળીબાર દરમિયાન ચારેય આતંકીઓને ઠાર કરવામાં આવ્યા હતા. અમારી સેનાને કોઈ નુકસાન નથી. તમને જણાવી દઈએ કે સુરક્ષા દળોએ આ પહેલા 16 જૂને કેરન સેક્ટરના જુમાગુંડ વિસ્તારમાં પાંચ આતંકીઓને ઠાર કર્યા હતા અને ઘૂસણખોરીના પ્રયાસને નિષ્ફળ બનાવ્યો હતો.