RAJKOT AIRPORT: રાજકોટને મળવા જઈ રહ્યું છે નવું ઇન્ટરનેશનલ એરપોર્ટ, 27 જુલાઈએ પીએમ મોદી કરશે ઉદ્દઘાટન

RAJKOT AIRPORT: ગુજરાતને વધુ એક મોટું એરપોર્ટ મળવા જઈ રહ્યું છે. જો કે રાજકોટમાં એક એરપોર્ટ પહેલેથી છે, પરંતુ હવે રાજકોટમાં નવું આંતરરાષ્ટ્રીય એરપોર્ટ બનાવવામાં આવ્યું છે અને 27 જુલાઈએ વડાપ્રધાન નરેન્દ્ર મોદી તેનું ઉદ્દઘાટન કરશે. નવું એરપોર્ટ રાજકોટથી 33 કિમી દૂર હિરાસર ગામમાં 2533 એકરમાં બનાવવામાં આવ્યું છે. સામાન્ય રીતે આ એરપોર્ટ 2654 કરોડના ખર્ચે બનાવવામાં આવ્યું છે. Airbus A380, Boeing 747,777 જેવા મોટા વિમાનો આ એરપોર્ટ પર ઉતરી શકશે. 4 એરોબ્રિજ, 3 કન્વેયર બેલ્ટ, 20 ચેક-ઇન કાઉન્ટર અને 14 એરક્રાફ્ટ માટે પાર્કિંગ પણ હશે. તેમાં પીક અવર્સ દરમિયાન 1800 મુસાફરોને હેન્ડલ કરવાની ક્ષમતા પણ હશે. એરપોર્ટને રાજકોટના રણજીત વિલાસ પેલેસ અને ગુજરાતી દાંડિયા ગરબાનો લુક આપવામાં આવ્યો છે. આ એરપોર્ટ રેન હાર્વેસ્ટિંગ સિસ્ટમ સાથે સંપૂર્ણપણે ગ્રીનફિલ્ડ હશે.

વડાપ્રધાન નરેન્દ્ર મોદીના ડ્રીમ પ્રોજેક્ટ હિરાસર ગ્રીનફિલ્ડ એરપોર્ટનું કામ પૂર્ણ થયું છે. તાજેતરના અહેવાલ મુજબ, આ એરપોર્ટનું ઉદ્દઘાટન 27 જુલાઈ, 2023ના રોજ પીએમ મોદી કરશે. આ માટે તડામાર તૈયારીઓ કરવામાં આવી રહી છે.

રાજકોટના હિરાસર એરપોર્ટ પર ફ્લાઈટની ઈન્સ્ટ્રુમેન્ટ લેન્ડિંગ સિસ્ટમ દ્વારા ટેસ્ટીંગનું કામ પૂર્ણ કરવામાં આવ્યું હતું. સાથોસાથ કંટ્રોલ નેવિગેશન સિસ્ટમની પણ તપાસ કરવામાં આવી હતી. ટૂંક સમયમાં આ એરપોર્ટ પરથી ફ્લાઈટ સેવા શરૂ થશે.

આ એરપોર્ટ વિશે માહિતી આપતા એરપોર્ટ ઓથોરિટી ઓફ ઈન્ડિયા (AAI) એ જણાવ્યું છે કે રાજકોટનું નવનિર્મિત ગ્રીનફિલ્ડ એરપોર્ટ રાજકોટ ઈન્ટરનેશનલ એરપોર્ટ તરીકે ઓળખાશે. વડાપ્રધાન નરેન્દ્ર મોદી 27 જુલાઈએ એરપોર્ટનું ઉદ્દઘાટન કરશે.