ચીનમાં ચોંકાવનારો કિસ્સો: ખાણી-પીણીમાં મળ્યા માનવીય દાંત, લોકોમાં ખળભળાટ

ચીનમાં ખાણી-પીણીની આદતો અને વાનગીઓ હંમેશાં ચર્ચામાં રહે છે, પરંતુ તાજેતરમાં એક એવી ઘટના સામે આવી છે જે લોકોને વિચલિત કરી શકે છે. એક જ દિવસમાં ચીનના અલગ-અલગ શહેરોમાં ખાણીપીણીની વસ્તુઓમાં માનવીય અને નકલી દાંત મળવાના કિસ્સાઓએ ફૂડ સેફ્ટી અને હાઈજીન અંગે ગંભીર ચિંતાઓ ઉભી કરી છે.

જિલિન પ્રાંતનો પહેલો કિસ્સો

સાઉથ ચાઈના મોર્નિંગ પોસ્ટના અહેવાલ મુજબ, 13 ઓક્ટોબરે જિલિન પ્રાંતમાં એક મહિલાએ એક આઉટડોર સ્ટોલ પરથી તેના બાળક માટે સૉસેજ ખરીદ્યું હતું. સૉસેજ ખાતી વખતે તેને તેમાં ત્રણ માનવીય દાંત જેવી રચના જોવા મળી, જેનાથી તે ચોંકી ગઈ. શરૂઆતમાં સ્ટોલના વેપારીએ આ વાતને નકારી, પરંતુ સ્થાનિક બજાર નિયમન અધિકારીઓના હસ્તક્ષેપ બાદ તેણે માફી માંગી.

ગુઆંગડોંગમાં ડિમસમમાં દાંત

એ જ દિવસે ગુઆંગડોંગ પ્રાંતના ડોંગગુઆન શહેરમાં બીજો કિસ્સો સામે આવ્યો. અહીં એક મહિલાએ જણાવ્યું કે તેના પિતાને સ્થાનિક સાનજિન સૂપ ડમ્પલિંગ્સ રેસ્ટોરન્ટમાં પીરસાયેલા ડિમસમમાં બે માનવીય દાંત મળ્યા. મહિલાએ સ્પષ્ટ કર્યું કે આ દાંત તેના પિતાના ન હતા. રેસ્ટોરન્ટ ચેનનું કહેવું હતું કે તેમના ડમ્પલિંગ્સ કંપનીના મુખ્ય કાર્યાલયથી સીધા આવે છે, તેથી દાંત કેવી રીતે આવ્યા તેની તેમને કોઈ જાણ નથી. સ્થાનિક વહીવટીતંત્રે આ મામલે તપાસ શરૂ કરી છે.

શંઘાઈમાં કેકમાં નકલી દાંત

બીજા દિવસે, 14 ઓક્ટોબરે શંઘાઈમાં પણ આવી જ એક ઘટના બની. એક ગ્રાહકને સ્થાનિક સેમ્સ ક્લબની શાખામાંથી ખરીદેલી વોલનટ કેકમાં નકલી માનવીય દાંત મળ્યો. સેમ્સ ક્લબ, જે ઉચ્ચ ગુણવત્તાવાળા ખાદ્ય ધોરણો માટે જાણીતું છે અને ચીનના 20થી વધુ શહેરોમાં 50થી વધુ આઉટલેટ ધરાવે છે, તેના સ્ટાફે આ ઘટના પર આશ્ચર્ય વ્યક્ત કર્યું. તેમણે જણાવ્યું કે તેમની ફેક્ટરીમાં બનતા ઉત્પાદનોમાં આવી ભૂલ થવી ન જોઈએ. બાદમાં સ્ટોરે ગ્રાહકને 1,000 યુઆન (આશરે 140 યુએસ ડોલર)નું વળતર આપવાની ઓફર કરી.