ઈરાનને એક ફૂટી કોડી પણ નહીં આપીએ...2500 કરોડના પેમેન્ટની વાતો પર ડોનાલ્ડ ટ્રમ્પ ભડક્યા, જાણો US-Iran ડીલની અંદરની વાત

US Iran Peace Deal: અમેરિકા અને ઈરાન વચ્ચે થયેલા ઐતિહાસિક શાંતિ કરારને લઈને રાજકીય ગરમાવો સતત વધી રહ્યો છે. એક તરફ દુનિયાભરમાં આ ડીલની ચર્ચા છે અને શેરબજારોમાં તેની અસર જોવા મળી રહી છે, તો બીજી તરફ અમેરિકાની અંદર જ આ કરારની શરતો અંગે મોટો વિવાદ ઊભો થયો છે.

2500 કરોડના પેમેન્ટની વાત પર ટ્રમ્પનો બચાવ

છેલ્લા કેટલાક દિવસોથી મીડિયામાં એવા અહેવાલો વહેતા થયા હતા કે અમેરિકા આ ડીલ હેઠળ ઈરાનને 300 મિલિયન ડોલર એટલે કે અંદાજે 2500 કરોડ રૂપિયા ચૂકવશે. જોકે, સોમવારે અમેરિકન રાષ્ટ્રપતિ ડોનાલ્ડ ટ્રમ્પે આ તમામ દાવાઓને ફગાવી દીધા છે.

ટ્રમ્પે આ અહેવાલોને વિપક્ષની એક મોટી ચાલ ગણાવતા સ્પષ્ટ કર્યું છે કે ઈરાનને કોઈ જ પૈસા આપવામાં નથી આવી રહ્યા, પરંતુ ઈરાને હંમેશ માટે પરમાણુ હથિયાર ન બનાવવાની શરત સ્વીકારી લીધી છે.

ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ'પર પોસ્ટ લખીને પૈસા ચૂકવવાના દાવાઓ પર પોતાની પ્રતિક્રિયા આપી હતી.

ટ્રમ્પે લખ્યું, "ઈરાન હંમેશ માટે પરમાણુ હથિયાર ન રાખવા માટે સહમત થઈ ગયું છે!"

300 મિલિયન ડોલરના પેમેન્ટ પર ભડકતા તેમણે કહ્યું, "અમેરિકા ઈરાનને 300 મિલિયન ડોલર આપી રહ્યું છે તે વાત સંપૂર્ણપણે 'ફેક ન્યૂઝ' છે. આ અફવાઓ 'ડેમોક્રેટ્સ' દ્વારા ફેલાવવામાં આવી રહી છે."

ઈઝરાયેલના વિરોધ પર વાઇસ પ્રેસિડેન્ટ જેડી વેન્સનું મોટું નિવેદન

ઈઝરાયેલના વડાપ્રધાન બેન્જામિન નેતન્યાહુ આ શાંતિ કરારનો સતત વિરોધ કરી રહ્યા છે. આ મુદ્દે અમેરિકાના ઉપરાષ્ટ્રપતિ જેડી વેન્સનું એક મોટું નિવેદન સામે આવ્યું છે.

NBC ના કાર્યક્રમ નાઈટલી ન્યૂઝને આપેલા ઇન્ટરવ્યુમાં વેન્સે કહ્યું કે ટ્રમ્પ પ્રશાસનને પૂરો વિશ્વાસ છે કે ઈઝરાયેલ આખરે આ ડીલનું સમર્થન કરશે. કારણ કે આ કરારથી ઈઝરાયેલની સુરક્ષા વધુ મજબૂત થશે. વેન્સે એ પણ સ્વીકાર્યું કે અમેરિકા અને ઈઝરાયેલના હિત જોડાયેલા છે, પરંતુ ઘણીવાર અમુક મુદ્દાઓ પર બંને દેશો વચ્ચે અસહમતિ હોઈ શકે છે, જે એકદમ સ્વાભાવિક બાબત છે.

ટ્રમ્પની પોતાની જ ટીમને ડીલ પર શંકા! CIA એ ઉઠાવ્યા સવાલો

ભલે વ્હાઇટ હાઉસ આ ડીલને પોતાની સૌથી મોટી કૂટનીતિક જીત ગણાવી રહ્યું હોય, પરંતુ ટ્રમ્પની પોતાની રાષ્ટ્રીય સુરક્ષા ટીમની અંદર જ આ કરારને લઈને ગંભીર મતભેદો સામે આવ્યા છે.

એક્સિઓસના એક રિપોર્ટ અનુસાર, CIA ના ડિરેક્ટર જોન રેટક્લિફે ટ્રમ્પ અને અન્ય વરિષ્ઠ અધિકારીઓને સ્પષ્ટ કહ્યું છે કે ઇન્ટેલિજન્સ ઇનપુટ મુજબ ઈરાનની દાનત પર ગંભીર શંકા છે. રેટક્લિફનું માનવું છે કે ઈરાન પરમાણુ નિયંત્રણોનું સંપૂર્ણ પાલન નહીં કરે અને ભવિષ્યમાં આ ડીલનું ઉલ્લંઘન કરી શકે છે.

નવા અમેરિકન વિદેશ મંત્રી માર્કો રુબિયોએ પણ આ ડીલ પર ચિંતા વ્યક્ત કરી છે. રિપોર્ટ મુજબ રેટક્લિફ અને રુબિયો બંનેને બહુ ઓછી આશા છે કે ઈરાન અમેરિકાના પ્રસ્તાવ મુજબ પરમાણુ પ્રતિબંધોનું ઈમાનદારીથી પાલન કરશે.

આ પણ વાંચો-Currency Market: ક્રૂડ ઓઇલ સસ્તું થતાં રૂપિયામાં શાનદાર રિકવરી, ડોલર સામે 94.61 પર પહોંચ્યો, જાણો બોન્ડ યીલ્ડની સ્થિતિ