ભારતના અમીરોને કેમ નથી ગમી રહ્યો પોતાનો જ દેશ? 3500 કરોડપતિઓએ છોડ્યું ભારત, રિપોર્ટમાં ચોંકાવનારો ખુલાસો

Indian Millionaires leaving India: શું ભારતના ધનકુબેરોનો હવે પોતાના જ દેશ પરથી ભરોસો ડગમગી રહ્યો છે? આ સવાલ એટલા માટે પૂછવો પડે છે કારણ કે હાલમાં આવેલા એક રિપોર્ટમાં બહુ મોટો ખુલાસો થયો છે. છેલ્લા કેટલાક વર્ષોમાં હજારો કરોડપતિઓએ ભારત છોડીને બીજા દેશોમાં કાયમી વસવાટ કરવાનું નક્કી કર્યું છે.

આ માત્ર ઘર બદલવાની વાત નથી, પણ આ ટ્રેન્ડ રોકાણ (Investment), ટેક્સ, બિઝનેસ માટેનું વાતાવરણ અને ગ્લોબલ મોબિલિટી સાથે જોડાયેલો છે. ચાલો જાણીએ કે આખરે કેમ ભારતના અમીરો વતન છોડી રહ્યા છે.

દુનિયાભરમાં અમીરો શોધી રહ્યા છે નવું ઘર

ફક્ત ભારત જ નહીં, દુનિયાના ઘણા મોટા દેશોમાં અમીરોનો મોહભંગ થઈ રહ્યો છે. એક નવા રિપોર્ટ મુજબ, ગયા વર્ષે આખી દુનિયામાં લગભગ 1.42 લાખ ‘હાઈ-નેટવર્થ ઇન્ડિવિજ્યુઅલ્સ’ (HNWIs) એટલે કે સુપર રિચ લોકોએ પોતાનો દેશ છોડીને બીજા દેશમાં રહેવા જવાનું પસંદ કર્યું છે. દુઃખની વાત એ છે કે સૌથી વધુ કરોડપતિઓ જે દેશોમાંથી ગયા છે, તે લિસ્ટમાં ભારત ટોપ-3 માં આવે છે.

રિપોર્ટના આંકડા જોઈએ તો અમીરોના પલાયનમાં બ્રિટન (UK) સૌથી આગળ છે.

બ્રિટન: ગયા વર્ષે 16,500 અમીરોએ બ્રિટન છોડ્યું. 2024 માં આ આંકડો 10,800 હતો. ત્યાં નબળી પડતી અર્થવ્યવસ્થા અને ટેક્સના વધતા ભારણને મુખ્ય કારણ માનવામાં આવે છે.

ચીન: બીજા નંબરે ચીન છે, જ્યાંથી 7,800 રઈસોએ બીજા દેશોની વાટ પકડી છે.

ભારત: આપણો દેશ આ લિસ્ટમાં ત્રીજા નંબરે છે. ગયા વર્ષે ભારતના 3,500 કરોડપતિઓએ વિદેશમાં સ્થાયી થવાનો નિર્ણય લીધો છે.

આ સિવાય સાઉથ કોરિયા, રશિયા અને બ્રાઝિલ જેવા દેશોમાંથી પણ મોટી સંખ્યામાં ધનકુબેરો બીજા દેશોમાં શિફ્ટ થયા છે.

અમીરોને બીજા દેશો કેમ પસંદ આવી રહ્યા છે?

તમને થતું હશે કે અઢળક પૈસા હોવા છતાં આ લોકો દેશ કેમ છોડે છે? રિપોર્ટ અનુસાર તેના મુખ્ય કારણો નીચે મુજબ છે:

ટેક્સ નીતિઓ: જ્યાં ટેક્સ ઓછો હોય ત્યાં અમીરો વધુ આકર્ષાય છે.

સુરક્ષા અને લાઈફસ્ટાઈલ: સારી લાઈફસ્ટાઈલ અને સુરક્ષિત વાતાવરણ બધાની પ્રાથમિકતા છે.

બિઝનેસ ફ્રેન્ડલી માહોલ: કડક નિયમોથી કંટાળેલા બિઝનેસમેન સરળ નિયમો વાળા દેશો શોધે છે.

રાજકીય સ્થિરતા: જે દેશમાં પોલિટિકલ સ્ટેબિલિટી હોય ત્યાં રહેવું લોકો વધુ પસંદ કરે છે.

સૌથી વધુ ફાયદો કોને થયો?

ભારત અને બ્રિટન જેવા દેશોમાંથી નીકળેલા આ અમીરો જાય છે ક્યાં? આનો સીધો ફાયદો યુનાઈટેડ આરબ અમીરાત (UAE) ને થયો છે. ત્યાં ‘ઝીરો ઈન્કમ ટેક્સ’ ની પોલિસી હોવાથી ગયા વર્ષે 9,800 અમીરોએ દુબઈ અને UAE ને પોતાનું નવું સરનામું બનાવ્યું છે.

બીજા નંબરે અમેરિકા (USA) છે, જ્યાં 7,500 અમીરો શિફ્ટ થયા છે. આ ઉપરાંત ઈટાલી, સ્વિટ્ઝર્લેન્ડ, સાઉદી અરેબિયા અને સિંગાપોર જેવા દેશો પણ ધનકુબેરોની પહેલી પસંદ બની રહ્યા છે.

ભારત માટે આ ચિંતાનો વિષય કે સામાન્ય વાત?

નિષ્ણાતોનું માનવું છે કે અમીરોનું દેશ છોડવું એ માત્ર ટેક્સ બચાવવાની વાત નથી, પણ તે દેશની આર્થિક તંદુરસ્તી તરફ પણ ઈશારો કરે છે. જોકે, રાહતની વાત એ છે કે ભલે 3,500 અમીરોએ દેશ છોડ્યો હોય, પણ ભારતની અર્થવ્યવસ્થા ઝડપથી વધી રહી છે અને અહીંનું સ્ટાર્ટઅપ ઈકોસિસ્ટમ હજુ પણ દુનિયાભરના રોકાણકારોને આકર્ષી રહ્યું છે. તેમ છતાં, જો આ આંકડો વધતો જશે તો સરકારે આ અંગે વિચારવું જરૂર પડશે.

આ પણ વાંચો-Market outlook : સેન્સેક્સ અને નિફ્ટી લાલ નિશાનમાં બંધ, જાણો 2 માર્ચે કેવી રહેશે માર્કેટની ચાલ