ઓપરેશન સિંદૂરમાં ‘આકાશ'નો દબદબો, બ્રાઝિલ સાથે મોટી ડીલની તૈયારી!

ભારતની 'આકાશ' એર ડિફેન્સ સિસ્ટમ ફરી એકવાર ચર્ચામાં છે. વડાપ્રધાન નરેન્દ્ર મોદીની આગામી બ્રાઝિલ યાત્રા દરમિયાન બ્રાઝિલ સરકારે આ સ્વદેશી એર ડિફેન્સ સિસ્ટમમાં રસ દાખવ્યો છે. ઓપરેશન સિંદૂર દરમિયાન આ સિસ્ટમે વિશ્વ સમક્ષ પોતાની ક્ષમતા સાબિત કરી હતી, અને હવે બ્રાઝિલ સાથેની આ સંભવિત ડીલ ભારતના ડિફેન્સ સેક્ટર અને 'મેક ઇન ઇન્ડિયા' પહેલ માટે ગેમ-ચેન્જર સાબિત થઈ શકે છે.

બ્રિક્સ સમિટમાં રક્ષા સહયોગ પર ચર્ચા

વડાપ્રધાન નરેન્દ્ર મોદી 5થી 8 જુલાઈ દરમિયાન બ્રાઝિલમાં યોજાનારી બ્રિક્સ સમિટમાં ભાગ લેવા જઈ રહ્યા છે. આ યાત્રા દરમિયાન ભારત અને બ્રાઝિલ વચ્ચે રક્ષા સહયોગ, સંયુક્ત ઉત્પાદન અને ટ્રેનિંગ જેવા મુદ્દાઓ પર ચર્ચા થવાની સંભાવના છે. વિદેશ મંત્રાલયના સચિવ પી. કુમારનના જણાવ્યા અનુસાર, બ્રાઝિલે ભારતની આકાશ એર ડિફેન્સ સિસ્ટમ, સંચાર પ્રણાલી, ઓફશોર પેટ્રોલિંગ જહાજો, સ્કોર્પિયન સબમરીન, કોસ્ટલ સર્વેલન્સ સિસ્ટમ અને ગરુડ તોપોમાં રુચિ દર્શાવી છે.

શું છે આકાશ એર ડિફેન્સ સિસ્ટમ?

આકાશ એર ડિફેન્સ સિસ્ટમ એ ભારતની સ્વદેશી ટેકનોલોજી પર આધારિત શોર્ટ-રેન્જ એન્ટિ-મિસાઈલ સિસ્ટમ છે, જે સરફેસ-ટુ-એર મિસાઈલ ટેકનોલોજી પર કામ કરે છે. આ સિસ્ટમ વાહન આધારિત છે, એટલે કે તેને ટ્રક પર લઈ જઈ શકાય છે, જે તેને અત્યંત મોબાઈલ બનાવે છે. ઓપરેશન સિંદૂર દરમિયાન આ સિસ્ટમે પાકિસ્તાનના ડ્રોન્સ અને મિસાઈલોને નિષ્ફળ કરીને પોતાની અસરકારકતા સાબિત કરી હતી.

બ્રાઝિલ પહેલા અર્મેનિયા સાથે ડીલ

આ પહેલી વખત નથી કે કોઈ દેશે આકાશ એર ડિફેન્સ સિસ્ટમમાં રસ દાખવ્યો હોય. ભારતે અગાઉ 6,000 કરોડ રૂપિયાની કિંમતે અર્મેનિયાને આ સિસ્ટમની સપ્લાય કરી છે. જો બ્રાઝિલ સાથેની આ ડીલ સફળ થશે, તો તે ભારતના રક્ષા નિકાસ અને 'મેક ઇન ઇન્ડિયા' પહેલને નવી ઊંચાઈઓ પર લઈ જશે.