American Dream: ટ્રમ્પના ટેરિફથી અમેરિકામાં હતાશા, જાણો 38 વર્ષમાં પહેલીવાર 75% લોકોએ કેમ હાથ કરી દીધા અધ્ધર?

American Dream: અમેરિકાના રાષ્ટ્રપતિ ડોનાલ્ડ ટ્રમ્પે વૈશ્વિક વેપારમાં મોટો ફેરફાર લાવવા દુનિયાભરના દેશો પર ભારે ટેરિફ લગાવ્યા છે. આ નિર્ણયથી અમેરિકા ગ્લોબલ ટ્રેડમાં અલગ-થલગ પડી રહ્યું છે. વોલ સ્ટ્રીટ જર્નલના તાજા સર્વે મુજબ, અમેરિકામાં માત્ર 25% લોકો જ એવું માને છે કે તેમનું લિવિંગ સ્ટાન્ડર્ડ ભવિષ્યમાં સુધરશે. આ સર્વે 1987થી ચાલે છે અને 38 વર્ષમાં પહેલીવાર 75% લોકોએ કહ્યું કે તેઓ આગામી પેઢી માટે સારું ભવિષ્ય જોતા નથી.

અમેરિકન ડ્રીમનું અસ્તિત્વ જોખમમાં

સર્વેમાં 70% લોકોએ કહ્યું કે ‘અમેરિકન ડ્રીમ’ હવે માત્ર એક સપનું બની ગયું છે, જે પૂરું થવાની શક્યતા ઓછી છે. આ આંકડો છેલ્લા 15 વર્ષમાં સૌથી મોટો છે. 2020 પહેલાં 50-60% લોકો ભવિષ્ય વિશે આશાવાદી હતા, પરંતુ હવે દરેક વયજૂથ, વર્ગ અને વિસ્તારના લોકો નિરાશા અનુભવે છે.

કોસ્ટ ઓફ લિવિંગ અને દેવાનો બોજ

અમેરિકન ઈકોનોમી હાલમાં સ્થિર હોવા છતાં, દેશનું નેશનલ ડેટ 37 ટ્રિલિયન ડોલરને પાર કરી ગયું છે, જે ઈકોનોમીના 125% જેટલું છે. આ દેવાના ચૂકવણા માટે અમેરિકાને ભારે ખર્ચ કરવો પડે છે. ટેરિફના કારણે આયાતી સામાનની કિંમતો વધી રહી છે, જેનાથી ઈન્ફ્લેશનનો ખતરો વધ્યો છે. અમેરિકા, વિશ્વની સૌથી મોટી ઈકોનોમી હોવા છતાં, વિદેશથી ખાદ્યપદાર્થો અને અન્ય સામાન પર નિર્ભર છે, જે હવે મોંઘો થશે.

ટેરિફ પોલીસીની અસર

ટ્રમ્પનું કહેવું છે કે ટેરિફથી અમેરિકન ઉદ્યોગોને ફાયદો થશે અને જોબ્સ વધશે, પરંતુ ઘણા એક્સપર્ટ્સનું માનવું છે કે આનાથી કોસ્ટ ઓફ લિવિંગ વધશે અને ગ્લોબલ ટ્રેડમાં અવરોધ આવશે. સર્વે દર્શાવે છે કે અમેરિકનોમાં ટેરિફ વિરુદ્ધ અસંતોષ વધી રહ્યો છે, જેનાથી ટ્રમ્પની પોલિસીઝ પર સવાલો ઊભા થઈ રહ્યા છે.