Budget 2026: ઓટોમોબાઈલ ઈન્ડસ્ટ્રીની સરકાર પાસે મોટી માગ, Tata Motors અને Mercedesએ કહી આ વાત

Budget 2026: આગામી નાણાકીય વર્ષ 2026-27ના બજેટ માટે તૈયારીઓ શરૂ થઈ ગઈ છે. અલગ-અલગ સેક્ટરની જેમ ઓટોમોબાઈલ ઈન્ડસ્ટ્રીએ પણ નાણામંત્રી પાસે પોતાની અપેક્ષાઓ વ્યક્ત કરી છે. ખાસ કરીને દેશની દિગ્ગજ કંપની ટાટા મોટર્સ અને લક્ઝરી કાર મેકર મર્સિડીઝ બેન્ઝે સરકાર સામે કેટલીક મહત્વની માગણીઓ મૂકી છે. આ બંને કંપનીઓનું માનવું છે કે ટેક્સ અને ડ્યુટીમાં ફેરફાર કરવાથી કાર માર્કેટને મોટો ફાયદો થઈ શકે છે.

નાની ઈલેક્ટ્રિક કાર પર ટાટા મોટર્સની ચિંતા

ટાટા મોટર્સ પેસેન્જર વ્હીકલ્સના મેનેજિંગ ડાયરેક્ટર અને CEO શૈલેષ ચંદ્રાએ બજેટ અંગે વાત કરતા જણાવ્યું હતું કે, સરકારે GSTમાં જે સુધારા કર્યા છે તેના લીધે પેટ્રોલ કારોની કિંમતોમાં ઘટાડો થયો છે. જોકે, આ સારી બાબત છે પણ તેની એક આડઅસર જોવા મળી છે. પેટ્રોલ કાર સસ્તી થવાને કારણે એન્ટ્રી લેવલની (શરૂઆતી રેન્જની) ઈલેક્ટ્રિક ગાડીઓ પર સ્પર્ધાનું દબાણ વધી ગયું છે. લોકો સસ્તી પેટ્રોલ કાર તરફ વળી રહ્યા છે, જેના લીધે નાની EVના વેચાણ સામે પડકારો ઉભા થયા છે.

તેમણે સરકારને વિનંતી કરી છે કે બજેટમાં શરૂઆતી સ્તરની ઈલેક્ટ્રિક ગાડીઓ માટે ખાસ પ્રોત્સાહન (Incentive) આપવા પર વિચાર કરવો જોઈએ. તેમણે કહ્યું કે સરકારના જૂના પગલાંથી પેસેન્જર વ્હીકલ ઈન્ડસ્ટ્રીમાં માંગ વધી છે, પણ હવે EV સેક્ટરને વધુ વેગ આપવાની જરૂર છે.

શૈલેષ ચંદ્રાએ બીજી એક મહત્વની વાત કરી છે જે કોમર્શિયલ વાહનો સાથે જોડાયેલી છે. તેમણે કહ્યું કે ભલે કુલ વેચાણમાં કોમર્શિયલ ઈલેક્ટ્રિક કારનો હિસ્સો માત્ર 7 ટકા છે, પરંતુ વાહન કેટલા કિલોમીટર ચાલે છે તેની ગણતરી કરીએ તો તેમનો ફાળો 33થી 35 ટકા જેટલો છે. એટલે કે એક સામાન્ય પ્રાઈવેટ કાર કરતા કોમર્શિયલ કાર 5 ગણી વધારે ચાલે છે.

આ ગાડીઓ પહેલા FAME-2 સ્કીમનો ભાગ હતી, પરંતુ હવે તેને 'PM E-Drive' યોજનામાં સામેલ કરવામાં આવી નથી. જો આ કોમર્શિયલ ગાડીઓને પણ સરકારી મદદ મળે તો પર્યાવરણને મોટો ફાયદો થશે અને દેશના તેલની આયાતમાં પણ ઘટાડો થશે.

મર્સિડીઝની માગ: લક્ઝરી કાર પર ઈમ્પોર્ટ ડ્યુટી ઘટે

બીજી તરફ, લક્ઝરી કાર માર્કેટની દિગ્ગજ કંપની મર્સિડીઝ-બેન્ઝ ઈન્ડિયાએ પણ પોતાની વાત મૂકી છે. કંપનીના MD અને CEO સંતોષ અય્યરે કહ્યું કે વિદેશથી ઈમ્પોર્ટ કરવામાં આવતી લક્ઝરી કાર પર કસ્ટમ ડ્યુટી ખૂબ વધારે છે, જેને તર્કસંગત બનાવવાની જરૂર છે. તેમનું માનવું છે કે જો ડ્યુટી ઘટશે તો પ્રીમિયમ કારની માંગ વધશે અને છેવટે તો તેનાથી સરકારની ટેક્સની આવકમાં જ વધારો થશે.

આ ઉપરાંત, તેમણે રૂપિયામાં આવતા ઉતાર-ચઢાવ અને આર્થિક નીતિઓમાં સ્થિરતાની વાત કરી હતી. ખર્ચ વધવાને કારણે કંપનીઓએ ભાવ વધારવા પડે છે, જેની સીધી અસર ગ્રાહકો પર પડે છે.

હાલમાં કેટલો ટેક્સ લાગે છે?

તમને જણાવી દઈએ કે હાલમાં ઈમ્પોર્ટેડ કાર પર સરકાર ભારે ભરખમ ટેક્સ વસૂલે છે. સંતોષ અય્યરે માહિતી આપી કે અત્યારે 40,000 ડોલરથી ઓછી કિંમતની ઈમ્પોર્ટેડ કાર પર 70 ટકા બેઝિક કસ્ટમ ડ્યુટી લાગે છે. જ્યારે 40,000 ડોલરથી મોંઘી ગાડીઓ પર આ ડ્યુટી 110 ટકા જેટલી છે. મર્સિડીઝની માગ છે કે આ સ્લેબને ઘટાડીને એક સમાન અને વ્યાજબી સ્તરે લાવવામાં આવે.

હવે જોવું રહ્યું કે આગામી બજેટમાં નાણામંત્રી નિર્મલા સીતારમણ ઓટો ઈન્ડસ્ટ્રીની આ માગણીઓ પર કેટલું ધ્યાન આપે છે અને સામાન્ય માણસથી લઈને લક્ઝરી કાર ખરીદનારાઓને કોઈ રાહત મળે છે કે નહીં.

આ પણ વાંચો- યુદ્ધના ભણકારા: અમેરિકાનું ‘મોતનું જહાજ’ ઈરાનની સરહદે પહોંચ્યું, ઈરાની કમાન્ડરે કહ્યું- ‘અમારી આંગળીઓ ટ્રિગર પર છે!’