ફોર્ડનું રિકોલ: 8.5 લાખથી વધુ ગાડીઓમાં ફ્યુઅલ પંપની ખામી, એન્જિન બંધ થવાનો ખતરો!

Ford Car : અમેરિકન ઓટોમેકર ફોર્ડ મોટરે યુએસમાં 8,50,318 ગાડીઓને રિકોલ કરવાનો નિર્ણય લીધો છે. આ રિકોલનું કારણ ફ્યુઅલ પંપમાં સંભવિત ખામી છે, જેના લીધે ગાડી ચાલતી વખતે એન્જિન અચાનક બંધ થઈ શકે છે, જે દુર્ઘટનાનું જોખમ વધારે છે. યુએસ નેશનલ હાઈવે ટ્રાફિક સેફ્ટી એડમિનિસ્ટ્રેશન (NHTSA)ના જણાવ્યા અનુસાર, આ ખામીથી ફ્યુઅલ ટેન્કથી એન્જિન સુધી ઇંધણનો પુરવઠો ઓછો થઈ શકે છે, જેનાથી ગાડી અટકી શકે છે.

કઈ ગાડીઓ છે રિકોલમાં સામેલ?

આ રિકોલમાં ફોર્ડ અને લિંકન બ્રાન્ડની તાજેતરની ગાડીઓનો સમાવેશ થાય છે, જેમાં નીચેની ગાડીઓનો સમાવેશ થાય છે:

* ફોર્ડ બ્રોન્કો

* ફોર્ડ એફ-150

* લિંકન એવિએટર

* લિંકન નેવિગેટર

ગ્રાહકોને શું કરવું જોઈએ?

NHTSAના રિપોર્ટ મુજબ, ફોર્ડ 14 જુલાઈથી ગાડીના માલિકોને આ સમસ્યા અંગે નોટિફિકેશન મોકલવાનું શરૂ કરશે. જોકે, આ ખામીને ઠીક કરવા માટેનો ઉકેલ હજુ તૈયાર નથી અને તેના પર કામ ચાલી રહ્યું છે. ફોર્ડે જણાવ્યું છે કે ગ્રાહકોને બીજો પત્ર મોકલવામાં આવશે, જેમાં ડીલરશિપ પર ગાડી લઈ જવાની અને મફત સર્વિસની માહિતી આપવામાં આવશે.

ગાડીમાં દેખાતા ચેતવણીના સંકેતો

NHTSAએ ડીલરોને જણાવ્યું છે કે ફ્યુઅલ પંપની ખામી પહેલાં ગાડીમાં નીચેના સંકેતો જોવા મળી શકે છે:

* એન્જિનનું ઝટકા સાથે ચાલવું (મિસફાયરિંગ)

* ગાડી સરળ ન ચાલવી (રફ રનિંગ)

* ગાડીનો પાવર ઓછો થવો (લો પાવર)

* 'ચેક એન્જિન' લાઇટ ચાલુ થવી

ફોર્ડની પ્રતિક્રિયા

ફોર્ડે હજુ સુધી આ ખામીથી કોઈ દુર્ઘટના કે ઈજાની પુષ્ટિ કરી નથી. કંપનીના ગ્રાહક સેવા વિભાગે ગાડીના માલિકોને ચેતવણીના સંકેતોને ગંભીરતાથી લેવાની સલાહ આપી છે, જેથી મોટી દુર્ઘટના ટળી શકે. NHTSAને આ અંગે છ ગ્રાહકોની ફરિયાદો મળી હતી, જેમાં ચાલતી ગાડીની પાવર અચાનક ગુમ થઈ હોવાનું જણાવાયું હતું.

ફોર્ડે રિકોલની પ્રક્રિયા શરૂ કરી દીધી છે, પરંતુ ખામી ઠીક કરવાનો સમય હજુ નક્કી નથી. કંપની ગાડીઓનું નિરીક્ષણ અને રિપેર કરવાની પ્રક્રિયા પર કામ કરી રહી છે. ગ્રાહકોને સલાહ છે કે તેઓ ફોર્ડની ઓફિશિયલ વેબસાઈટ અથવા ડીલરશિપનો સંપર્ક કરીને રિકોલ અંગેની લેટેસ્ટ માહિતી મેળવે.

આ પણ વાંચો- 75 વર્ષનો અર્થ એ છે કે વ્યક્તિએ નિવૃત્તિ લેવી જોઈએ; મોહન ભાગવતે કોનો ઉલ્લેખ કરતા કહી આ વાત