India Beats USA in EV: ઈલેક્ટ્રિક ગાડીઓની રેસમાં ભારતે અમેરિકાને પછાડ્યું! નવી કારોના રજિસ્ટ્રેશનમાં ભારત 8.8% સાથે આગળ | Moneycontrol Gujarati
Get App

India Beats USA in EV: ઈલેક્ટ્રિક ગાડીઓની રેસમાં ભારતે અમેરિકાને પછાડ્યું! નવી કારોના રજિસ્ટ્રેશનમાં ભારત 8.8% સાથે આગળ

India Beats USA in EV: ઈલેક્ટ્રિક કારની રેસમાં ભારતે અમેરિકાને પાછળ છોડી દીધું છે. સપ્ટેમ્બર 2026માં ભારતમાં નવી કારના રજિસ્ટ્રેશનમાં EVનો હિસ્સો 8.8% પર પહોંચ્યો, જ્યારે અમેરિકા 6.8% પર અટક્યું.

અપડેટેડ 01:13:17 PM Nov 19, 2026 પર
Story continues below Advertisement
ભારતમાં નવી કારોના કુલ રજિસ્ટ્રેશનમાં ઈલેક્ટ્રિક કારોનો હિસ્સો વધીને 8.8% પર પહોંચી ગયો છે, જ્યારે અમેરિકા માત્ર 6.8% પર જ અટકી ગયું છે.

India Beats USA in EV: એક સમય હતો જ્યારે ઈલેક્ટ્રિક કારની વાત નીકળતી ત્યારે અમેરિકા અને યુરોપના દેશોનું નામ સૌથી પહેલા લેવામાં આવતું હતું. ટેકનોલોજી પણ તેમની હતી, બજાર પણ તેમનું હતું અને રફ્તાર પણ તેમની જ હતી. પરંતુ હવે આખી કહાની બદલાઈ ગઈ છે. ઈલેક્ટ્રિક ગાડીઓ અપનાવવાની રેસમાં ભારતે સુપરપાવર અમેરિકાને પણ પાછળ છોડી દીધું છે.

સપ્ટેમ્બર 2026 ના આંકડા મુજબ, ભારતમાં નવી કારોના કુલ રજિસ્ટ્રેશનમાં ઈલેક્ટ્રિક કારોનો હિસ્સો વધીને 8.8% પર પહોંચી ગયો છે, જ્યારે અમેરિકા માત્ર 6.8% પર જ અટકી ગયું છે. એટલે કે જે રેસમાં ભારત થોડા વર્ષો પહેલા ઘણું પાછળ હતું, ત્યાં આજે ભારતે અમેરિકાને અરીસો બતાવી દીધો છે.

અમિતાભ કાંતે શેર કર્યા ચોંકાવનારા આંકડા


ઈલેક્ટ્રોમોબિલિટી અને સસ્ટેનેબલ મોબિલિટી પર નજર રાખતા નિષ્ણાત યુજેન સીબર્ટ (Eugen Siebert) દ્વારા તૈયાર કરવામાં આવેલા એક ચાર્ટમાં આ રસપ્રદ માહિતી સામે આવી છે. નીતિ આયોગના પૂર્વ CEO અમિતાભ કાંતે સોશિયલ મીડિયા પ્લેટફોર્મ 'X' પર આ ચાર્ટ શેર કર્યો છે. ચાર્ટના આંકડા દર્શાવે છે કે વર્ષ 2019 થી 2025 ની વચ્ચે મોટાભાગના સમયમાં અમેરિકા આ મામલે ભારતથી આગળ રહ્યું હતું, પરંતુ તાજેતરના વર્ષોમાં ભારતે જબરદસ્ત છલાંગ લગાવીને સપ્ટેમ્બર 2026 માં અમેરિકાને પછાડી દીધું છે.

ભારતમાં કેવી રીતે વધ્યો ઈલેક્ટ્રિક કારોનો દબદબો?

ભારતમાં નવી કારોના રજિસ્ટ્રેશનમાં બેટરી ઈલેક્ટ્રિક વાહનો (BEV) ના હિસ્સામાં વર્ષવાર થયેલો વધારો નીચે મુજબ છે:

વર્ષ 2019 અને 2020: ભારતમાં નવી કારોના રજિસ્ટ્રેશનમાં ઈલેક્ટ્રિક કારનો હિસ્સો 1% થી પણ ઓછો હતો.

વર્ષ 2022 અને 2023: 2022 માં આ હિસ્સો વધીને 1% અને 2023 માં 2.2% થયો.

વર્ષ 2024 અને 2025: 2024 માં આ આંકડો 2.5% પર પહોંચ્યો અને 2025 માં સારો ઉછાળો નોંધાવીને 4.3% થઈ ગયો.

સપ્ટેમ્બર 2026: આ હિસ્સો સીધો ડબલથી પણ વધુ ઉછળીને 8.8% ના ઐતિહાસિક સ્તરે પહોંચી ગયો.

અમેરિકાના બજારમાં ઈલેક્ટ્રિક કારોના હિસ્સામાં ઘટાડો

બીજી તરફ અમેરિકાની વાત કરીએ તો, ત્યાં શરૂઆતના વર્ષોમાં ઈલેક્ટ્રિક કારોનો હિસ્સો ઝડપથી વધ્યો હતો. વર્ષ 2019 માં અમેરિકામાં નવી કારોના રજિસ્ટ્રેશનમાં BEV નો હિસ્સો 1.4% હતો, જે 2021 માં 3.1% અને 2022 માં વધીને 5.5% થયો હતો. ત્યારબાદ વર્ષ 2024 માં અમેરિકાએ 7.8% સાથે પોતાનું સૌથી સર્વોચ્ચ સ્તર વટાવ્યું હતું.

પરંતુ ત્યારબાદ અમેરિકન માર્કેટમાં ઈલેક્ટ્રિક કારોના હિસ્સામાં ઘટાડો શરૂ થયો. વર્ષ 2025 માં તે ઘટીને 7.5% રહી ગયો અને સપ્ટેમ્બર 2026 માં વધુ નીચે ગગડીને 6.8% પર આવી ગયો. આનાથી વિપરીત ભારતમાં સતત વધારો થતો રહ્યો અને ભારત અમેરિકાથી આગળ નીકળી ગયું.

એપ્રિલ 2026થી દર મહિને અમેરિકા કરતા આગળ છે ભારત

એમ્બરના રિસર્ચ અનુસાર, એપ્રિલ 2026 થી ભારતમાં નવી કારોના વેચાણમાં BEV નો હિસ્સો દર મહિને અમેરિકા કરતા વધારે રહ્યો છે:

વેચાણમાં 46 ગણો ઉછાળો: ભારતમાં કુલ ઈલેક્ટ્રિક વાહનોનું વેચાણ વર્ષ 2016 થી 2025 ની વચ્ચે આશરે 46 ગણું વધ્યું છે. વર્ષ 2016 માં જ્યાં માત્ર 50,000 ની આસપાસ ઈલેક્ટ્રિક વાહનો વેચાયા હતા, ત્યાં 2025 માં આ સંખ્યા વધીને અંદાજે 23 લાખ યુનિટ પર પહોંચી ગઈ છે.

કુલ હિસ્સેદારી: નાણાકીય વર્ષ 2015-16 માં દેશમાં કુલ ઈલેક્ટ્રિક વાહનોનો હિસ્સો માત્ર 0.08% હતો, જે નાણાકીય વર્ષ 2025-26 માં વધીને 8.26% થઈ ગયો છે. (નોંધ: આ કુલ આંકડાઓમાં ટુ-વ્હીલર, થ્રી-વ્હીલર અને અન્ય તમામ ઈલેક્ટ્રિક વાહનો સામેલ છે).

ચાર્જિંગ ઈન્ફ્રાસ્ટ્રક્ચર વધારવું સૌથી મોટો પડકાર

અમિતાભ કાંતે ભારતની આ સિદ્ધિને ખૂબ જ મહત્વપૂર્ણ ગણાવી છે, પરંતુ સાથે જ તેમણે દેશમાં EV ચાર્જિંગ ઈન્ફ્રાસ્ટ્રક્ચર સુધારવા પર પણ ભાર મૂક્યો છે. તેમનું માનવું છે કે માત્ર ઈલેક્ટ્રિક ગાડીઓનું વેચાણ વધવાથી આ બદલાવને લાંબા સમય સુધી ટકાવી રાખવો શક્ય નહીં બને.

કોઈ પણ ઈલેક્ટ્રિક વાહન ખરીદનાર માટે ગાડીની 'રેન્જ' અને 'ચાર્જિંગની સુવિધા' એ બે સૌથી મોટી ચિંતા હોય છે. જો દેશના શહેરો અને હાઈવે પર પૂરતા પ્રમાણમાં ચાર્જિંગ સ્ટેશનો અને મજબૂત ચાર્જિંગ નેટવર્ક ઝડપથી વિકસાવવામાં નહીં આવે, તો લોકો ઈલેક્ટ્રિક વાહનો ખરીદતા ખચકાશે.

કયા ડેટાના આધારે કરવામાં આવી છે આ સરખામણી?

ભારતના આંકડા સરકારના 'વાહન' પોર્ટલ, ફેડરેશન ઓફ ઓટોમોબાઈલ ડીલર્સ એસોસિએશન (FADA) અને ભારત સરકારના ડેટા પર આધારિત છે. જ્યારે અમેરિકાના આંકડા માટે આર્ગોન નેશનલ લેબોરેટરી અને વોર્ડ્સ ઈન્ટેલિજન્સના ડેટાનો ઉપયોગ કરાયો છે. અહીં એ સમજવું પણ જરૂરી છે કે 2019 થી 2025 સુધીના આંકડા આખા વર્ષના છે, જ્યારે સપ્ટેમ્બર 2026 નો આંકડો એક મહિનાનો છે. વળી, આ સરખામણી કુલ વેચાયેલી કારોની સંખ્યાના આધારે નહીં, પરંતુ નવી કારોના રજિસ્ટ્રેશનમાં બેટરી ઈલેક્ટ્રિક કારોની ટકાવારીના આધારે કરવામાં આવી છે.

આ પણ વાંચો- રોકાણની શરૂઆત કરી રહ્યા છો? પૈસા બચાવવા અને ડબલથી ચાર ગણા કરવાના આ 7 ગોલ્ડન રુલ્સ જાણી લો, ભવિષ્યમાં ક્યારેય નહીં પડે પૈસાની તંગી

MoneyControl News

MoneyControl News

First Published: Nov 19, 2026 1:13 PM

પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ,  Stock Tips,  સમાચાર, પર્સનલ ફાઇનાન્સ  અને બિઝનેસ  સંબંધિત સમાચાર વાંચો. દૈનિક બજાર અપડેટ્સ માટે Moneycontrol App  ડાઉનલોડ કરો.