Luxury Cars: વિદેશી ગાડીઓ પર ટેક્સ ઘટશે તો લક્ઝરી કાર માર્કેટને મળશે બૂસ્ટ, જાણો અત્યારે સરકાર કેટલો ટેક્સ વસૂલે છે?

India-EU FTA: ભારતમાં કારના શોખીનોની કમી નથી, પરંતુ જ્યારે વાત લક્ઝરી કારની આવે છે ત્યારે ઊંચા ટેક્સને કારણે ઘણા લોકો પાછા પડી જાય છે. હાલમાં જ લક્ઝરી કાર સેગમેન્ટને લઈને એક મહત્વના સમાચાર સામે આવ્યા છે. નિષ્ણાતોનું માનવું છે કે જો વિદેશથી આવતી ગાડીઓ પર ટેક્સ (Customs Duty) ઘટાડવામાં આવે, તો ભારતમાં લક્ઝરી કાર માર્કેટને મોટો ફાયદો થઈ શકે છે.

ભારતમાં લક્ઝરી કારનો હિસ્સો માત્ર 1 ટકા

દેશમાં વેચાતી કુલ પેસેન્જર કારોમાં લક્ઝરી કારનો હિસ્સો અત્યારે ખૂબ જ ઓછો એટલે કે માત્ર 1 ટકા જેટલો છે. આ અંગે વાત કરતા BMW ગ્રુપ ઇન્ડિયાના પ્રેસિડેન્ટ અને CEO હરદીપ સિંહ બરારે સોમવારે મહત્વનું નિવેદન આપ્યું છે. તેમણે કહ્યું કે, ભારત અને યુરોપિયન સંઘ (EU) વચ્ચે જે મુક્ત વેપાર કરાર (FTA) થવા જઈ રહ્યો છે, તેના હેઠળ જો ઈમ્પોર્ટેડ કાર પર કસ્ટમ ડ્યુટી ઘટાડવામાં આવે તો ભારતમાં લક્ઝરી કાર સેગમેન્ટનો વિકાસ ઝડપી બની શકે છે.

બરારે વધુમાં જણાવ્યું હતું કે, ભારત-યુરોપિયન સંઘ વચ્ચેનો આ કરાર એક ઐતિહાસિક પગલું સાબિત થશે. તેનાથી માત્ર વેપાર જ નહીં વધે, પરંતુ નવી ટેક્નોલોજી અને ઇનોવેશનની પણ આપ-લે થશે, જેનાથી બંને પક્ષોને ફાયદો થશે.

ઓટોમોટિવ ઇન્ડસ્ટ્રીની દ્રષ્ટિએ જોઈએ તો, આ FTAમાં બંને પક્ષો માટે ફાયદાકારક નિયમો હોવાની આશા છે. હરદીપ સિંહ બરારે કહ્યું કે, "અત્યારે વૈશ્વિક સ્તરે જે સ્થિતિ છે તે જોતા સપ્લાય ચેઈનને મજબૂત કરવી ખૂબ જરૂરી છે. જો સંપૂર્ણ રીતે તૈયાર થયેલી કાર (CBU) પર કસ્ટમ ડ્યુટી ઓછી કરવામાં આવે, તો ભારતમાં લક્ઝરી કાર માર્કેટનો વ્યાપ વધશે."

તેમણે ઉમેર્યું કે, ભલે અત્યારે અમારી કુલ સેલ્સમાં ઈમ્પોર્ટેડ યુનિટ્સ (CBU)નો હિસ્સો લગભગ 5 ટકા છે, પરંતુ જો ટેક્સ ઘટશે તો કંપનીઓને નવા અને ગ્લોબલ લેવલે પોપ્યુલર મોડલ્સ ભારતમાં લાવવાની તક મળશે. આ ભારત અને યુરોપિયન સંઘ બંને માટે 'વિન-વિન' સિચ્યુએશન હશે.

અત્યારે ઇમ્પોર્ટેડ કાર પર કેટલો ટેક્સ લાગે છે?

હવે તમને થતું હશે કે સરકાર અત્યારે વિદેશી ગાડીઓ પર કેટલો ટેક્સ વસૂલે છે? તો આંકડા પર નજર કરીએ:

40,000 ડોલરથી ઓછી કિંમત: જો કોઈ આયાતી પેસેન્જર વાહનની કિંમત 40,000 ડોલરથી ઓછી હોય, તો તેના પર 70 ટકા બેઝિક કસ્ટમ ડ્યુટી લાગે છે.

40,000 ડોલરથી વધુ કિંમત: જો વાહનની કિંમત 40,000 ડોલરથી વધારે હોય, તો તેના પર 110 ટકા જેટલી ભારે કસ્ટમ ડ્યુટી વસૂલવામાં આવે છે.

આમ, જો સરકાર આ ટેક્સ સ્ટ્રક્ચરમાં ઘટાડો કરે તો ભારતીય રસ્તાઓ પર વધુ પ્રીમિયમ અને લક્ઝરી ગાડીઓ જોવા મળી શકે છે.

આ પણ વાંચો-Mutual Fund Schemes: શેરબજાર તૂટ્યું તો પણ આ 5 મ્યુચ્યુઅલ ફંડ્સમાં થઈ તગડી કમાણી, 3 વર્ષમાં મળ્યું 24% સુધીનું બમ્પર રિટર્ન