ગુજરાતના રસ્તાઓ 1242 કરોડ રૂપિયાથી ચમકશે, મુખ્યમંત્રી પટેલના આદેશે કામગીરી શરૂ

ગુજરાતના તમામ જિલ્લાઓમાં રસ્તાઓની જરૂરિયાતોને ધ્યાને લઈને મુખ્યમંત્રી ભૂપેન્દ્ર પટેલે રાજ્યના રસ્તા-માળખાને મજબૂત કરવા ઐતિહાસિક પગલું ભર્યું છે. આ અંતર્ગત રસ્તાઓની રિસરફેસિંગ, પુનઃનિર્માણ, સિમેન્ટ-કોંક્રિટ (સીસી) બનાવવા અને અન્ય સહાયક કામગીરી માટે કુલ 1242 કરોડ રૂપિયાની ફાળવણી કરવામાં આવી છે. આ નિર્ણયથી નાગરિકો, ઉદ્યોગો અને વેપારીઓને પરિવહનમાં સરળતા મળશે, ગ્રામીણ વિસ્તારોનો વિકાસ થશે અને હાજીપીર જેવા તીર્થસ્થળો સાથે જોડાણ વધુ મજબૂત થશે.

735 કિલોમીટર રસ્તાઓ માટે 975 કરોડની મંજૂરી

મુખ્યમંત્રી ભૂપેન્દ્ર પટેલે રાજ્યભરના રસ્તાઓની સ્થિતિને સુધારવા માટે વ્યાપક યોજના હાથ ધરી છે. આ અંતર્ગત રાજ્યના વિવિધ જિલ્લાઓમાં અત્યંત જરૂરી 118 રસ્તાઓના 735 કિલોમીટર લાંબા વિસ્તારના પુનઃનિર્માણ, રિસરફેસિંગ અને અન્ય સહાયક કામગીરી માટે રસ્તા અને મકાન વિભાગને 975 કરોડ રૂપિયાની ફાળવણી કરવામાં આવી છે. આ રસ્તાઓમાં રાજ્ય ધોરીમાર્ગો, મુખ્ય જિલ્લા રસ્તાઓ અને ગ્રામીણ વિસ્તારોના અન્ય રસ્તાઓનો સમાવેશ થાય છે.

મહેસાણા જિલ્લાને 267 કરોડની ભેટ

મુખ્યમંત્રીએ મહેસાણા જિલ્લાના કડી તાલુકા અને કચ્છ જિલ્લાના દેશલપર-હાજીપીર વિસ્તારમાં રસ્તા નેટવર્કના વિવિધ કામો માટે કુલ 267 કરોડ રૂપિયાની મંજૂરી આપી છે. મહેસાણા જિલ્લાના કડી તાલુકામાં ચાર મહત્વના રસ્તાઓના સુધારણા કાર્યો માટે 171 કરોડ રૂપિયા ફાળવવામાં આવ્યા છે. આ રસ્તાઓમાં ડાંગરવા-કરજીસણ રોડ અને કડી-જસલપુર-મોકાસણ-સૂરજ રોડનો સમાવેશ થાય છે, જેના મજબૂતીકરણ, રિસરફેસિંગ અને સીસી બનાવવા માટે 27 કરોડ રૂપિયા ફાળવાયા છે.

આ ઉપરાંત, કડી તાલુકા મુખ્યાલયને જોડતા બે મહત્વના રસ્તાઓ – ભાલઠી-ધરમપુર-ખાવડ રોડ અને કડી-નાની કડી-બાવડુ-ચંદ્રાસણ-ખોડાનો ઢાળ રોડના વિસ્તરણ માટે 144 કરોડ રૂપિયાની ફાળવણી કરવામાં આવી છે. આ રસ્તાઓને યાતાયાતના ભારને ધ્યાને લઈને 7 મીટરથી 10 મીટર પહોળા કરવામાં આવશે. આમ, કડી તાલુકામાં કુલ ચાર રસ્તાઓના સુધારણા કાર્યો માટે 171 કરોડ રૂપિયા મંજૂર થયા છે.

હાજીપીરને જોડતા રસ્તાનું આધુનિકરણ