Imran Khan Arrest: પાકિસ્તાનમાં સ્થિતિ બેકાબૂ! PM શાહબાઝ શરીફના ઘર પર ફેંકાયા પેટ્રોલ બોમ્બ, હિંસાગ્રસ્ત વિસ્તારોમાં સેના તૈનાત

Imran Khan Arrest: ભ્રષ્ટાચારના કેસમાં ધરપકડ કરાયેલા પાકિસ્તાનના પૂર્વ પીએમ ઈમરાન ખાનના સમર્થકોએ બુધવારે લાહોરમાં વડા પ્રધાન શેહબાઝ શરીફના નિવાસસ્થાન પર હુમલો કર્યો હતો. પોલીસના જણાવ્યા અનુસાર, પાકિસ્તાન તહરીક-એ-ઈન્સાફ (પીટીઆઈ) પાર્ટીના 500થી વધુ હુમલાખોરો વહેલી સવારે મોડલ ટાઉન લાહોરમાં વડા પ્રધાનના નિવાસસ્થાને પહોંચ્યા હતા અને ત્યાં પાર્ક કરેલા વાહનોને આગ ચાંપી દીધી હતી. પંજાબ પોલીસના એક વરિષ્ઠ અધિકારીએ બુધવારે TOIને જણાવ્યું કે તેઓએ વડાપ્રધાનના ઘર પર પેટ્રોલ બોમ્બ પણ ફેંક્યા હતા. પોલીસ અધિકારીએ જણાવ્યું હતું કે જ્યારે હુમલાખોરોએ હુમલો કર્યો ત્યારે વડા પ્રધાનના આવાસ પર માત્ર ચોકીદાર જ હાજર હતો. તેઓએ ત્યાં એક પોલીસ ચોકીને પણ આગ ચાંપી દીધી હતી.

અધિકારીઓએ જણાવ્યું હતું કે પોલીસની એક ટીમ ત્યાં પહોંચતાની સાથે જ પીટીઆઈ વિરોધીઓ ત્યાંથી ચાલ્યા ગયા હતા. વડા પ્રધાનના નિવાસસ્થાને પહોંચતા પહેલા, ખાનના સમર્થકોના ટોળાએ મોડલ ટાઉનમાં શાસક પીએમએલ-એન સચિવાલય પર હુમલો કર્યો, ત્યાં પાર્ક કરેલા વાહનોને આગ લગાવી દીધી. તેઓએ ત્યાંના ડિવાઈડરને પણ આગ ચાંપી દીધી હતી.

ઈમરાન ખાનની ધરપકડ બાદ હિંસા પ્રભાવિત વિસ્તારોમાં બુધવારે સેના તૈનાત કરવામાં આવી હતી. ભ્રષ્ટાચારના કેસમાં ભૂતપૂર્વ વડા પ્રધાન ઈમરાન ખાનની નાટકીય ધરપકડ બાદ અનેક શહેરોમાં હિંસક વિરોધ અને લશ્કરી સ્થાપનો પર થયેલા હુમલાને પગલે દેશના સૌથી વધુ વસ્તી ધરાવતા પંજાબ પ્રાંતમાં કાયદો અને વ્યવસ્થા જાળવવા માટે પાકિસ્તાન સેનાના જવાનોને તૈનાત કરવામાં આવ્યા છે. પાકિસ્તાનની ફેડરલ સરકાર દ્વારા જારી કરવામાં આવેલા નોટિફિકેશન મુજબ, આ નિર્ણય પંજાબ સરકારની વિનંતી પર ગૃહ મંત્રાલય દ્વારા લેવામાં આવ્યો છે.

સૂચના અનુસાર, પંજાબ પ્રાંતમાં તૈનાત સૈનિકોની ચોક્કસ સંખ્યા, તૈનાતીની તારીખ અને તેનો વિસ્તાર પ્રાંતીય સરકાર એડવાઈઝરીના આધારે નક્કી કરશે. પંજાબ ઉપરાંત ખૈબર-પખ્તુનખ્વા અને બલૂચિસ્તાનમાં પણ કાયદો અને વ્યવસ્થા જાળવવા માટે સેના તૈનાત કરવામાં આવી છે. સાથે જ રાજધાની ઈસ્લામાબાદમાં સેનાને પણ ઉતારી દેવામાં આવી છે. પાકિસ્તાનમાં હિંસક વિરોધ વચ્ચે, બુધવારે એક વિશેષ અદાલતે ભૂતપૂર્વ વડા પ્રધાન ખાનને આઠ દિવસ માટે ભ્રષ્ટાચાર વિરોધી એજન્સીના રિમાન્ડ પર મોકલ્યા, જ્યારે સેશન્સ કોર્ટે તેમને ભ્રષ્ટાચારના એક અલગ કેસમાં આરોપ મૂક્યો.

વડાપ્રધાને આપી ચેતાવણી

પાકિસ્તાનના વડા પ્રધાન શેહબાઝ શરીફે બુધવારે ભ્રષ્ટાચારના કેસમાં ધરપકડ બાદ ભૂતપૂર્વ વડા પ્રધાન ઇમરાન ખાનના સમર્થકો દ્વારા હિંસક વિરોધ પ્રદર્શનની નિંદા કરી હતી અને વિરોધીઓ સામે કડક કાર્યવાહીની ચેતવણી આપી હતી. દેશમાં છેલ્લા બે દિવસના વિરોધ પ્રદર્શન દરમિયાન થયેલી જીવલેણ હિંસા બાદ વડાપ્રધાને રાષ્ટ્રને સંક્ષિપ્ત સંબોધન કર્યું હતું. આ હિંસામાં, લશ્કરી સ્થાપનો પર હુમલો કરવામાં આવ્યો હતો અને દેશની સંપત્તિને નુકસાન થયું હતું. વડા પ્રધાને કહ્યું કે જાહેર સંપત્તિ પર હુમલો એ આતંકવાદ અને દેશ પ્રત્યે દુશ્મનાવટનું કૃત્ય છે. તેમણે કહ્યું કે જે લોકો કાયદો હાથમાં લે છે તેમની સાથે કડક કાર્યવાહી કરવામાં આવશે.

તેમણે કહ્યું કે તેને એવી રીતે સજા આપવામાં આવશે કે તે એક ઉદાહરણ બેસાડે. તે જ સમયે, સંયુક્ત રાષ્ટ્ર (યુએન) ના મહાસચિવ એન્ટોનિયો ગુટેરેસે બુધવારે સત્તાવાળાઓને યોગ્ય પ્રક્રિયાનું સન્માન કરવા અને પાકિસ્તાનના ભૂતપૂર્વ વડા પ્રધાન ઇમરાન ખાનની ધરપકડ બાદ દેશમાં ચાલી રહેલા વિરોધ પ્રદર્શન પર ચારે બાજુથી હિંસાથી દૂર રહેવાનું આહ્વાન કર્યું હતું. સેક્રેટરી-જનરલના નાયબ પ્રવક્તા ફરહાન હકે બુધવારે જાહેર કરેલા એક નિવેદનમાં જણાવ્યું હતું કે ગુટેરેસે પાકિસ્તાનના અધિકારીઓને દેશના ભૂતપૂર્વ વડા પ્રધાન વિરુદ્ધ કાર્યવાહીમાં કાયદાની યોગ્ય પ્રક્રિયાનું સન્માન કરવા વિનંતી કરી હતી.

આ પણ વાંચો - Amritsar: સુવર્ણ મંદિર પાસે વધુ એક બ્લાસ્ટ, 7 દિવસમાં ત્રીજા વિસ્ફોટથી હડકંપ, 2 શકમંદોની પોલીસે કરી અટકાયત