India-Canada Tensions News: કેનેડા સામે ભારતનું સખત કડક વલણ, કેનેડિયન નાગરિકો માટે વિઝા સર્વિસ કરી સ્થગિત

India-Canada Tensions News: ભારત અને કેનેડા વચ્ચેના સંબંધોમાં તણાવ વધુ વધી રહ્યો છે. તાજેતરમાં જ બંને દેશોના રાજદ્વારીઓને સસ્પેન્ડ કરવામાં આવ્યા હતા. બંને દેશો વચ્ચે વધી રહેલા તણાવ વચ્ચે ભારતે કેનેડિયનો માટે વિઝા સેવાઓ સ્થગિત કરી દીધી છે. ભારતે કેનેડિયન નાગરિકો માટે વિઝા સેવાઓ અનિશ્ચિત સમય માટે સ્થગિત કરી દીધી છે. આનો અર્થ એ થયો કે હવે કેનેડાના નાગરિકોને આગામી આદેશ સુધી ભારતના વિઝા નહીં મળે. ગયા અઠવાડિયે જ ટ્રુડો જી-20માં ભાગ લેવા ભારત આવ્યા હતા. કેનેડાના વડાપ્રધાન જસ્ટિન ટ્રુડોએ આરોપ લગાવ્યો છે કે ખાલિસ્તાની આતંકવાદી હરદીપ સિંહ નિજ્જરની હત્યા પાછળ ભારત સરકારનો હાથ હોઈ શકે છે.

નિજ્જરની હત્યામાં ભારતની ભૂમિકાની તપાસને ધ્યાનમાં રાખીને કેનેડાએ ભારતના ટોચના રાજદ્વારીને પણ હાંકી કાઢ્યા છે. ભારતે પણ દિલ્હીમાં કેનેડિયન હાઈ કમિશનને બોલાવીને અને વરિષ્ઠ રાજદ્વારીને હાંકી કાઢીને જવાબ આપ્યો.

ટ્રુડોનું નિવેદન ભારતની જવાબી કાર્યવાહી બાદ આવ્યું છે. કેનેડાના વડા પ્રધાને કહ્યું કે ભારત સરકારે આ બાબતને ખૂબ જ ગંભીરતાથી લેવાની જરૂર છે. તેમણે કહ્યું કે અમે આ કરી રહ્યા છીએ. અમે ઉશ્કેરણી કે તણાવ વધારવાનો પ્રયાસ નથી કરી રહ્યા. ટ્રુડોએ કહ્યું કે અમે ભારત સરકાર સાથે મળીને દરેક બાબતની સ્પષ્ટતા કરવા અને યોગ્ય પ્રક્રિયા સુનિશ્ચિત કરવા ઈચ્છીએ છીએ.

ભારતે કેનેડાના વડા પ્રધાન જસ્ટિન ટ્રુડોના આરોપોને પાયાવિહોણા ગણાવીને ફગાવી દીધા હતા કે ખાલિસ્તાની અલગતાવાદી નેતા હરદીપ સિંહ નિજ્જરની હત્યા અને ભારત સરકારના એજન્ટો વચ્ચે સંભવતઃ કોઈ સંબંધ છે. ટ્રુડોએ સંસદમાં આ સંદર્ભે આક્ષેપો કર્યા પછી, કેનેડાના વિદેશ પ્રધાન મેલાની જોલીએ જાહેરાત કરી કે એક વરિષ્ઠ ભારતીય રાજદ્વારીને કેનેડામાંથી હાંકી કાઢવામાં આવ્યા છે.

આ પણ વાંચો - Investment Option: આ 4 ઇન્વેસ્ટ ઓપ્શન્સ FD કરતાં વધુ રિટર્ન આપી રહ્યા છે, વ્યાજ દરો કરી લો ચેક

કેનેડાના બ્રિટિશ કોલંબિયા પ્રાંતના સરેમાં ગુરુદ્વારા બહાર 18 જૂને બે અજાણ્યા બંદૂકધારીઓએ કેનેડિયન નાગરિક નિજ્જરની ગોળી મારીને હત્યા કરી દીધી હતી. ટ્રુડોએ સોમવારે સંસદમાં જણાવ્યું હતું કે કેનેડિયન સુરક્ષા એજન્સીઓ જૂનમાં નિજ્જરની હત્યા અને ભારત સરકારના એજન્ટ વચ્ચે સંભવિત જોડાણના ગંભીર આરોપોની સક્રિયપણે તપાસ કરી રહી છે.