ભારત સરકારે રોઇટર્સ સહિત 2,355 એકાઉન્ટ્સ બ્લોક કરવાનો આપ્યો હતો આદેશ, Xનો મોટો ખુલાસો

Ban on X accounts: એલોન મસ્કના સોશિયલ મીડિયા પ્લેટફોર્મ X એ 8 જુલાઈના રોજ જણાવ્યું હતું કે ભારત સરકારે કંપનીને ભારતમાં 2,355 એકાઉન્ટ્સ બ્લોક કરવાનો આદેશ આપ્યો હતો, જેમાં સમાચાર એજન્સી રોઇટર્સના એકાઉન્ટ્સનો પણ સમાવેશ થાય છે. આ ભારતના ઇલેક્ટ્રોનિક્સ અને માહિતી ટેકનોલોજી મંત્રાલય (MeitY) ના નિવેદનની વિરુદ્ધ છે. કંપનીએ તેના વૈશ્વિક સરકારી બાબતોના એકાઉન્ટ દ્વારા એક પોસ્ટમાં કહ્યું હતું કે, 'ઇલેક્ટ્રોનિક્સ અને માહિતી ટેકનોલોજી મંત્રાલયે કોઈ કારણ આપ્યા વિના એક કલાકની અંદર તાત્કાલિક કાર્યવાહી કરવાની માંગ કરી હતી, અને આગામી સૂચના સુધી એકાઉન્ટ્સ બ્લોક રાખવાની માંગ કરી હતી.

જોકે, જાહેર વિરોધ પછી, સરકારે Xને @Reuters અને @ReutersWorldને અનબ્લોક કરવા વિનંતી કરી હતી.' કંપનીએ વધુમાં કહ્યું, 'આ બ્લોકિંગ ઓર્ડર્સને કારણે અમે ભારતમાં ચાલી રહેલા પ્રેસ સેન્સરશીપ અંગે ગંભીરતાથી ચિંતિત છીએ. X બધા ઉપલબ્ધ કાનૂની વિકલ્પો પર વિચાર કરી રહ્યું છે.

સરકારે કહ્યું હતું કે 'પ્રતિબંધની કોઈ માંગ નથી'

હકીકતમાં, આ અઠવાડિયે, ભારત સરકારના ઇલેક્ટ્રોનિક્સ અને માહિતી ટેકનોલોજી મંત્રાલયે કહ્યું હતું કે તેણે સોશિયલ મીડિયા પ્લેટફોર્મ X ને રોઇટર્સના એકાઉન્ટને બ્લોક કરવા કહ્યું નથી. મંત્રાલયે એક નિવેદનમાં કહ્યું હતું કે, 'ભારત સરકાર તરફથી રોઇટર્સના હેન્ડલને બ્લોક કરવાની કોઈ આવશ્યકતા નથી. અમે સમસ્યાના ઉકેલ માટે X સાથે સતત કામ કરી રહ્યા છીએ.'