Malaysia Tourism: વિઝા વિના વિદેશ પ્રવાસ! મલેશિયાએ ભારતીયોને 30 દિવસની આપી મોટી ભેટ!

Malaysia Tourism: મલેશિયાએ ભારતના લોકોને વિઝા ફ્રી એન્ટ્રી આપવાની જાહેરાત કરી છે. મલેશિયાના વડાપ્રધાન અનવર ઈબ્રાહિમે કહ્યું છે કે ભારત અને ચીનના નાગરિકો 30 દિવસ સુધી વિઝા વગર મલેશિયામાં રહી શકે છે. 30 દિવસની વિઝા ફ્રી એન્ટ્રી 1લી ડિસેમ્બરથી શરૂ થાય છે.

મલેશિયાના વડાપ્રધાન અનવરે રવિવારે મોડી રાત્રે તેમની પાર્ટી પીપલ્સ જસ્ટિસ પાર્ટી કોંગ્રેસમાં ભાષણ દરમિયાન આ જાહેરાત કરી હતી. ન્યૂઝ એજન્સી રોઈટર્સના અહેવાલ મુજબ, જો કે, અનવરે એ નથી જણાવ્યું કે 30 દિવસના વિઝા ફ્રી એન્ટ્રીનો આ નિયમ કેટલા સમય સુધી અમલમાં રહેશે.

ભારત, ચીનમાંથી લાખો લોકો મલેશિયા જાય છે

સરકારી આંકડાઓ અનુસાર આ વર્ષે જાન્યુઆરીથી જૂન વચ્ચે 90 લાખ 16 હજાર પ્રવાસીઓ મલેશિયા આવ્યા હતા, જેમાંથી 4 લાખ 98 હજાર 540 પ્રવાસીઓ ચીનથી અને 2 લાખ 83 હજાર 885 પ્રવાસીઓ ભારતમાંથી આવ્યા હતા. રોગચાળા પહેલા, 2019 ના સમાન સમયગાળામાં, ચીનમાંથી 15 લાખ લોકો અને ભારતમાંથી 3 લાખ 54 હજાર 486 લોકો પર્યટન માટે મલેશિયા ગયા હતા.

મલેશિયાએ પ્રવાસનને પ્રોત્સાહન આપવા માટે સ્ટેપ લીધાં

મલેશિયાએ વિઝા ફ્રી એન્ટ્રીનું આ પગલું ભર્યું છે જેથી દેશમાં પ્રવાસીઓની સંખ્યામાં વધારો થાય અને ભારતીય અને ચીની પ્રવાસીઓની સંખ્યા જે કોવિડ દરમિયાન અને પછી ઘટી છે, તેમાં વધારો થાય.

મલેશિયા પહેલા તેના પાડોશી દેશ થાઈલેન્ડે પણ દેશમાં પર્યટનને પ્રોત્સાહન આપવા માટે આવું પગલું ભર્યું હતું. થાઈલેન્ડની અર્થવ્યવસ્થામાં પર્યટનનો મોટો ફાળો છે પરંતુ કોવિડના કારણે તેના પર્યટન ક્ષેત્રને મોટો ફટકો પડ્યો છે. પ્રવાસન ક્ષેત્રને પુનર્જીવિત કરવા માટે, થાઇલેન્ડે ભારત અને ચીન સહિત ઘણા દેશોના નાગરિકોને વિઝા ફ્રી એન્ટ્રી આપવાનું શરૂ કર્યું છે.

થાઈલેન્ડે નવેમ્બરની શરૂઆતમાં જાહેરાત કરી હતી કે ભારતીયો 10 નવેમ્બર, 2023 થી 10 મે, 2024 સુધી 30 દિવસ માટે વિઝા વિના પ્રવેશ કરી શકે છે.

આ પણ વાંચો-Winter Fashion Tips: શિયાળામાં સ્ટાઇલિશ દેખાવા માટે ફોલો કરો આ ટિપ્સ, દરેક લોકો પાગલ થઈ જશે