Closing Bell: શેરબજારમાં હાહાકાર! સેન્સેક્સ 1068 પોઈન્ટ તૂટ્યો, નિફ્ટી 25,450 ની નીચે બંધ, IT સેક્ટરનો રકાસ

Closing Bell: ભારતીય શેરબજાર માટે સપ્તાહની શરૂઆત નિરાશાજનક રહી છે. આજે 24 ફેબ્રુઆરીના રોજ ટ્રેડિંગ સેશનના અંતે બજારમાં ભારે વેચવાલી જોવા મળી હતી. ખરાબ ગ્લોબલ સંકેતો અને IT સેક્ટરમાં આવેલા મોટા ઘટાડાને કારણે રોકાણકારોનો મૂડ બગડ્યો હતો. સેન્સેક્સ અને નિફ્ટી બંને ઇન્ડેક્સ 1% કરતા વધુ તૂટીને લાલ નિશાનમાં બંધ થયા છે.

બજાર બંધ થતા કઈ સ્થિતિ રહી?

આજના કારોબારના અંતે બોમ્બે સ્ટોક એક્સચેન્જનો સેન્સેક્સ 1068.74 પોઈન્ટ એટલે કે 1.28% ના જંગી ઘટાડા સાથે 82,225.92 ના સ્તરે બંધ થયો હતો. બીજી તરફ નેશનલ સ્ટોક એક્સચેન્જનો નિફ્ટી પણ 288.35 પોઈન્ટ એટલે કે 1.12% તૂટીને 25,424.65 ના લેવલ પર બંધ થયો છે. આમ, નિફ્ટીએ 25,450 નું મહત્વનું લેવલ ગુમાવી દીધું છે.

IT સેક્ટરમાં સૌથી મોટું ગાબડું

IT Index: સૌથી વધુ વેચવાલી અહીં જોવા મળી, જેના કારણે આખું ઇન્ડેક્સ 4% કરતા વધુ તૂટી ગયું હતું.

Realty Index: રિયલ્ટી સેક્ટરમાં પણ નરમાઈ રહી અને તે 2% થી વધુ ઘટ્યું હતું.

જોકે, આ ભયંકર ઘટાડા વચ્ચે પણ મેટલ, ફાર્મા, સરકારી બેંકો (PSU Bank), ઓઈલ એન્ડ ગેસ અને એનર્જી સેક્ટરના શેરોમાં 0.5% થી 1% સુધીનો સામાન્ય સુધારો જોવા મળ્યો હતો, જેણે બજારને થોડો સપોર્ટ આપ્યો હતો.

આજના ટોપ લુઝર્સ અને ગેઈનર્સ 

નિફ્ટીમાં કયા શેરો તૂટ્યા અને કયા વધ્યા તેના પર એક નજર કરીએ:

ઘટનારા શેર : આજના માર્કેટમાં IT કંપનીઓની હાલત કફોડી હતી. ટેક મહિન્દ્રા, ઇન્ફોસિસ, ટીસીએસ, એચસીએલ ટેક્નોલોજી અને ઈટર્નલ જેવા શેરોમાં સૌથી વધુ ઘટાડો નોંધાયો હતો.

વધનારા શેર : બીજી તરફ હિન્દુસ્તાન યુનિલિવર, સન ફાર્મા, પાવર ગ્રીડ કોર્પ, એનટીપીસી અને જેએસડબલ્યુ સ્ટીલ જેવા શેરો લીલા નિશાનમાં બંધ થયા હતા.

નાના અને મધ્યમ શેરોમાં પણ ઘટાડો

માત્ર મોટી કંપનીઓ જ નહીં, પરંતુ બ્રોડર માર્કેટમાં પણ દબાણ જોવા મળ્યું હતું. નિફ્ટી મિડકેપ અને સ્મોલકેપ ઇન્ડેક્સ પણ લગભગ 1% જેટલા તૂટ્યા હતા. આજે F&O એક્સપાયરીનો દિવસ હોવાથી બજારમાં ભારે ઉતાર-ચઢાવ જોવા મળ્યો હતો.

આ પણ વાંચો-Textile Stocks Crisis: ગોકલદાસ, વર્ધમાન અને અરવિંદ જેવા શેર 6% સુધી તૂટ્યા, સરકારે અચાનક 50% ઘટાડ્યું ઇન્સેન્ટિવ