US H-1B Visa Update: અમેરિકામાં નોકરી કરતા ભારતીયોનું ટેન્શન વધશે, નોકરી જતાં જ તરત દેશ છોડવો પડશે, 60 દિવસનો ગ્રેસ પિરિયડ ખતમ થવાની તૈયારી

US H-1B Visa Update : અમેરિકામાં નોકરી કરતા અને ત્યાં સ્થાયી થવાનું સપનું જોતા ભારતીય ટેક કર્મચારીઓ માટે એક ખૂબ જ મોટા અને ચિંતાજનક સમાચાર સામે આવ્યા છે. અમેરિકન સરકારે H-1B સહિતના અન્ય નોન-ઇમિગ્રન્ટ વિઝા ધારકોને નોકરી ગયા પછી મળતો 60 દિવસનો 'ગ્રેસ પિરિયડ' ખતમ કરવાનો પ્રસ્તાવ રજૂ કર્યો છે. જો આ પ્રસ્તાવ કાયદો બની જશે, તો અમેરિકામાં નોકરી ગુમાવ્યા પછી ત્યાં રહીને નવી નોકરી શોધવી લગભગ અશક્ય બની જશે.

કયા વિઝા ધારકો પર પડશે સીધી અસર?

ડિપાર્ટમેન્ટ ઓફ હોમલેન્ડ સિક્યોરિટી દ્વારા E-1, E-2, E-3, H-1B, H-1B1, L-1, O-1 અને TN વિઝા ધારકો માટે આ વર્તમાન 60 દિવસનો ગ્રેસ પિરિયડ ખતમ કરવાનો પ્રસ્તાવ મૂકવામાં આવ્યો છે. ખાસ વાત એ છે કે આની અસર માત્ર કર્મચારીઓ પર જ નહીં, પરંતુ તેમના પર નિર્ભર પરિવારજનો પર પણ પડશે.

આપણે જાણીએ છીએ કે H-1B વિઝાનો ઉપયોગ ખાસ કરીને ટેકનિકલ અને સ્પેશિયલાઇઝ્ડ નોકરીઓ માટે થાય છે. અમેરિકન આઇટી કંપનીઓ ભારત અને ચીન જેવા દેશોમાંથી હજારો સ્કિલ્ડ વર્કર્સને આ વિઝા દ્વારા નોકરી પર રાખે છે. તેથી જ આ નવા નિયમની સૌથી વધુ નકારાત્મક અસર ભારતીય આઇટી પ્રોફેશનલ્સ પર પડી શકે છે.

હાલનો નિયમ: અત્યારની વ્યવસ્થા મુજબ, જો કોઈ કર્મચારીની નોકરી છૂટી જાય (કંપની કાઢી મૂકે કે તે જાતે છોડે), તો તેને અમેરિકામાં રહીને નવી નોકરી શોધવા અથવા પોતાનું ઇમિગ્રેશન સ્ટેટસ બદલવા માટે વધુમાં વધુ 60 દિવસનો સમય મળે છે.

નવો પ્રસ્તાવ: જો આ નવો નિયમ લાગુ થશે, તો નોકરી જતાં જ કર્મચારીએ તાત્કાલિક અમેરિકા છોડવું પડશે. જ્યાં સુધી તેમની પાસે ત્યાં રહેવાની બીજી કોઈ કાયદેસર પરવાનગી ન હોય, ત્યાં સુધી તેઓ રોકાઈ શકશે નહીં. જો કોઈ નવી અમેરિકન કંપનીમાં નોકરી મળે, તો પણ કર્મચારીએ પોતાના દેશમાં પાછા આવીને અમેરિકન એમ્બેસી અથવા વાણિજ્ય દૂતાવાસ દ્વારા ફરીથી વિઝા માટે અરજી કરવી પડશે.

2016 માં શરૂ થઈ હતી આ સુવિધા

તમને જણાવી દઈએ કે, અમેરિકાએ હાઈ-સ્કિલ વિદેશી કર્મચારીઓને નોકરી બદલવામાં અનુકૂળતા રહે અને તેમના જીવનમાં સ્થિરતા આવે તે માટે 2016 માં આ 60 દિવસના ગ્રેસ પિરિયડની સુવિધા શરૂ કરી હતી. આનાથી અમેરિકન કંપનીઓ માટે પણ વિદેશી ટેલેન્ટને હાયર કરવાનું સરળ બન્યું હતું.

હજુ અંતિમ નિર્ણય લેવાયો નથી

રાહતની વાત એ છે કે આ મામલે હજુ આખરી નિર્ણય લેવાયો નથી. આ માત્ર એક પ્રસ્તાવ છે. DHS ના આ પ્રસ્તાવને પહેલા 'ફેડરલ રજિસ્ટર' માં પ્રકાશિત કરવામાં આવશે. ત્યારબાદ સામાન્ય લોકો અને નિષ્ણાતો પાસેથી 60 દિવસની અંદર સૂચનો અને અભિપ્રાય માંગવામાં આવશે. જો આ પ્રસ્તાવને અંતિમ મંજૂરી મળશે, તો જ હાલનો ગ્રેસ પિરિયડ ખતમ થશે.

આ પણ વાંચો-BRICS Summit 2026: દિલ્હીમાં રશિયન રાષ્ટ્રપતિ પુતિનનું આગમન, 11 થી 13 સપ્ટેમ્બરની ટ્રાફિક એડવાઇઝરી જાહેર