8th Pay Commission: સરકારી કર્મચારીઓની લાગશે લોટરી! ન્યૂનતમ પેન્શન 45,000 અને OPS ફરી લાગુ કરવા ઉઠી જોરદાર માંગ

8th Pay Commission: દેશમાં જ્યારથી 8મા પગાર પંચની ચર્ચાઓ શરૂ થઈ છે, ત્યારથી સરકારી કર્મચારીઓમાં પગાર અને પેન્શનને લઈને ઉત્સાહ જોવા મળી રહ્યો છે. કેટલાક લોકો ફિટમેન્ટ ફેક્ટર વધારવાની વાત કરી રહ્યા છે, તો કેટલાક ભથ્થાઓમાં વધારાની રાહ જોઈ રહ્યા છે. પરંતુ, નિવૃત્ત થઈ ચૂકેલા અને હાલ નોકરી કરી રહેલા કર્મચારીઓ વચ્ચે સૌથી મોટો મુદ્દો જૂની પેન્શન યોજના (OPS) અને નેશનલ પેન્શન સિસ્ટમ (NPS) ને લઈને છે.

કર્મચારી સંગઠનોએ હવે પેન્શન સુધારાને લઈને સરકાર સામે મોરચો ખોલી દીધો છે. NPS અને તાજેતરમાં જાહેર થયેલી UPS ના બજાર આધારિત અનિશ્ચિત રિટર્નથી નારાજ યુનિયનોએ હવે ગેરંટીડ પેન્શનની માંગ પકડી છે.

ક્યાં સુધીમાં આવશે 8મા પગાર પંચનો રિપોર્ટ?

હાલમાં પગાર પંચ દ્વારા દેશના અલગ-અલગ શહેરોમાં કર્મચારી યુનિયનો અને એસોસિએશન સાથે સતત બેઠકો કરવામાં આવી રહી છે. પુડુચેરી અને ચંદીગઢમાં બેઠકો યોજાયા બાદ, હવે 7 અને 8 ઓક્ટોબરે બેંગલુરુમાં કેન્દ્રીય કર્મચારીઓની માંગણીઓ સાંભળવામાં આવશે.

શા માટે OPS સૌથી મોટો મુદ્દો બની ગયો છે?

વર્ષ 2004 પછી નોકરીમાં જોડાયેલા કેન્દ્રીય કર્મચારીઓ હાલની પેન્શન વ્યવસ્થાથી જરા પણ સંતુષ્ટ નથી. 8મા પગાર પંચને સોંપવામાં આવેલા આવેદનપત્રોમાં કર્મચારીઓએ સ્પષ્ટ કહ્યું છે કે બજારના જોખમો પર આધારિત પેન્શન યોજનાઓ તેમના ભવિષ્યને સુરક્ષિત કરવામાં નિષ્ફળ રહી છે. તેથી, તેઓને ફરીથી જૂની 'ફિક્સ અને ગેરંટીડ લાભ' વાળી વ્યવસ્થામાં સામેલ કરવામાં આવે.

કર્મચારી સંગઠનોની 4 સૌથી મોટી માંગણીઓ કઈ છે?

અલગ-અલગ કર્મચારી અને પેન્શનર્સ યુનિયનોએ 8મા પગાર પંચ સમક્ષ પોતાની આ મુખ્ય માંગણીઓ રજૂ કરી છે:

મિનિસ્ટિરિયલ સ્ટાફ એસોસિએશન (સર્વે ઓફ ઈન્ડિયા): આ સંગઠને જૂની પેન્શન યોજના (OPS) સંપૂર્ણપણે પાછી લાવવાની માંગ કરી છે. તેઓ ઈચ્છે છે કે નિવૃત્તિ વખતે કર્મચારીના છેલ્લા બેઝિક પગારનો ઓછામાં ઓછો 50% હિસ્સો ગેરંટીડ પેન્શન તરીકે આપવામાં આવે.

ફેડરેશન ઓફ નેશનલ પોસ્ટલ ઓર્ગેનાઈઝેશન (FNPO): પોસ્ટ વિભાગના આ સંગઠનનું કહેવું છે કે NPS અને નવી UPS યોજનાઓ કર્મચારીઓનો ડર દૂર કરી શકી નથી. આથી તમામ કર્મચારીઓને ફરીથી જૂની પેન્શન યોજના (OPS) નો જ લાભ મળવો જોઈએ.

રેલવે સિનિયર સિટીઝન્સ વેલફેર સોસાયટી (RSCWS): રેલવેના પેન્શનર્સે સ્વાસ્થ્ય અને આર્થિક સુરક્ષાનો મુદ્દો ઉઠાવ્યો છે. તેમણે સરકાર પાસે એક ગેરંટીડ ન્યૂનતમ પેન્શનની જોગવાઈ કરવાની અપીલ કરી છે.

ભારત પેન્શનર્સ સમાજ (BPS): પેન્શનરોના આ સૌથી મોટા મંચે એક મોટી માંગ મૂકી છે. તેમણે ન્યૂનતમ પેન્શન વધારીને દર મહિને 45,000 કરવા, છેલ્લા પગારના 67% જેટલું પેન્શન આપવા અને ફેમિલી પેન્શનને છેલ્લા પગારના 50% કરવા ભલામણ કરી છે.

આગળ શું થશે?

હાલમાં પગાર પંચ દેશભરમાં ફરીને તમામ પક્ષોની રજૂઆતો સાંભળી રહ્યું છે. ન્યૂનતમ પગાર વધારવા અને પેન્શનમાં સમાનતા લાવવા જેવા ગંભીર મુદ્દાઓ પર પણ ચર્ચાઓ ચાલી રહી છે.

હવે જોવાનું એ રહે છે કે, મે-જૂન 2027માં જ્યારે રિપોર્ટ આવશે ત્યારે સરકાર શું નિર્ણય લેશે. શું સરકાર હાલના NPS/UPS માળખાને જ થોડું મજબૂત કરશે કે પછી કર્મચારીઓના ભારે દબાણને વશ થઈને જૂની પેન્શન સિસ્ટમમાં કોઈ મોટો અને ક્રાંતિકારી ફેરફાર લાવશે? 2004 પછી જોડાયેલા લાખો કર્મચારીઓનું ભવિષ્ય હવે આ 8મા પગાર પંચના રિપોર્ટ પર જ ટકેલું છે.

આ પણ વાંચો- સાબરમતીથી પાટણ વચ્ચે દેશની પહેલી LNG DEMU ટ્રેન: 27 સપ્ટેમ્બરે થશે લોકાર્પણ, ડીઝલમાં મોટી બચતનો દાવો