8th Pay Commission: કેન્દ્ર સરકારે 8મા પગાર પંચની રચના અને તેની બેઠકોની ચર્ચાઓ વચ્ચે સરકારી કર્મચારીઓને એક મોટી રાહત આપી છે. એક તરફ દેશભરના કર્મચારી સંગઠનો જૂની પેન્શન યોજના સંપૂર્ણપણે લાગુ કરવાની માંગ પર અડગ છે, ત્યારે બીજી તરફ સરકારે કર્મચારીઓની એક ખાસ કેટેગરીને જૂની પેન્શનનો લાભ આપવાની મોટી જાહેરાત કરી દીધી છે.
8th Pay Commission: સરકારી કર્મચારીઓ માટે મોટા ખુશખબર, પગાર પંચના નવા અપડેટ વચ્ચે આ લોકોને મળી ઓલ્ડ પેન્શનની ભેટ
કેન્દ્ર સરકારે 8મા પગાર પંચની બેઠકો વચ્ચે સરકારી કર્મચારીઓને મોટી રાહત આપી છે. જાણો જૂની પેન્શન યોજના (OPS) ના નવા નિયમો, કટ-ઓફ ડેટમાં ફેરફાર અને કોને મળશે આનો સીધો ફાયદો.
MoneyControl Newsઅપડેટેડ Jun 24, 2026 પર 10:20 AM
પેન્શન અને પેન્શનભોગી કલ્યાણ વિભાગએ 22 જૂન 2026 ના રોજ એક અત્યંત મહત્વપૂર્ણ આદેશ બહાર પાડ્યો છે. આ નવા નિયમ અંતર્ગત રહેમરાહે (અનુકંપાના આધારે) નોકરી મેળવનારા કેટલાક ખાસ કર્મચારીઓને હવે નેશનલ પેન્શન સિસ્ટમમાંથી હટાવીને જૂની પેન્શન યોજનાના દાયરામાં લાવવામાં આવશે.
નિયમોમાં શું મોટો ફેરફાર થયો?
અત્યાર સુધીના સરકારી નિયમ મુજબ, જૂની પેન્શનનો ફાયદો માત્ર એ જ લોકોને મળતો હતો જેમની જોઈનિંગ તારીખ 1 જાન્યુઆરી 2004 પહેલાની હોય. પરંતુ નવા આદેશ બાદ સરકારે પાત્રતા નક્કી કરવાનો મૂળ માપદંડ જ બદલી નાખ્યો છે:
એપ્લિકેશનની તારીખ બનશે મુખ્ય આધાર: સરકારે નક્કી કર્યું છે કે અનુકંપા નિમણૂકના કિસ્સામાં હવે 'નોકરી મળ્યાની તારીખ' ને બદલે 'નોકરી માટે અરજી કર્યાની તારીખ' ને મુખ્ય માનવામાં આવશે.
નવી કટ-ઓફ ડેટ: જો કોઈ કર્મચારીના પરિવારના સભ્યએ 31 ડિસેમ્બર 2003 અથવા તે પહેલાં નોકરી માટે અરજી કરી હતી અને તેઓ તે સમયે લાયક હતા, તો તેમને હવે સેન્ટ્રલ સિવિલ સર્વિસીસ (પેન્શન) રૂલ્સ હેઠળ સીધો જૂની પેન્શનનો લાભ મળશે.
વહીવટી વિલંબનો ઉકેલ: આ નિર્ણય એવા પરિવારો માટે આશીર્વાદરૂપ છે જેમણે 2004 માં NPS લાગુ થાય તે પહેલાં અરજી તો કરી દીધી હતી, પરંતુ સરકારી ફાઈલોની લેટલતીફી કે વહીવટી વિલંબને કારણે તેમની નિમણૂક 1 જાન્યુઆરી 2004 પછી થઈ હતી.
આ નિર્ણયનો સીધો ફાયદો કોને થશે?
જ્યારે કોઈ સરકારી કર્મચારીનું ચાલુ નોકરીએ અવસાન થાય અથવા તેઓ ગંભીર બીમારીને કારણે મેડિકલ ગ્રાઉન્ડ પર રિટાયર થાય, ત્યારે તેમના પરિવારને આર્થિક સંકટમાંથી બચાવવા માટે અનુકંપાના આધારે નોકરી આપવામાં આવે છે.
સરકારના આ નવા આદેશથી દેશભરના એવા હજારો કર્મચારીઓ અને તેમના પરિવારોને સીધો ફાયદો થશે, જેઓ વર્ષોથી પોતાના પેન્શનના હક માટે સરકારી કચેરીઓ અને કોર્ટના ધક્કા ખાઈ રહ્યા હતા. વહીવટી ખામીઓના કારણે તેમને પરાણે NPS માં ધકેલી દેવામાં આવ્યા હતા, પરંતુ હવે તેઓ હકપૂર્વક OPS મેળવી શકશે.
કર્મચારી યુનિયને કર્યું સ્વાગત, સાથે મૂકી નવી માંગ
ઓલ ઇન્ડિયા NPS એમ્પ્લોયી ફેડરેશનના રાષ્ટ્રીય અધ્યક્ષ ડૉ. મનજીત સિંહ પટેલે સરકારના આ નિર્ણયને દિલથી આવકાર્યો છે. તેમણે સોશિયલ મીડિયા પર ખુશી વ્યક્ત કરતા લખ્યું કે 31 ડિસેમ્બર 2003 કે તે પહેલા અરજી કરનારા કર્મચારીઓને જૂની પેન્શનમાં શિફ્ટ કરવા એ એક લાંબા સમયની માંગ પૂરી થવા સમાન છે.
જોકે, ડૉ. પટેલે સરકાર પાસે એવી પણ માંગ કરી છે કે સરકાર એક ડગલું આગળ વધીને તમામ નિવૃત્ત થતા કર્મચારીઓને ગેરંટીડ પેન્શનનો વિકલ્પ આપે, જે શેરબજારની અનિશ્ચિતતાઓથી સંપૂર્ણપણે મુક્ત હોય.
8મા પગાર પંચ સાથે શું છે કનેક્શન?
સરકારનો આ આદેશ એવા સમયે આવ્યો છે જ્યારે 23 જૂન 2026 ના રોજ લખનૌમાં 8મા પગાર પંચની બે દિવસીય મહત્વની બેઠકો પૂર્ણ થઈ છે. આ બેઠકમાં રેલવે, સંરક્ષણ, આરોગ્ય અને કમ્યુનિકેશન જેવા મોટા અને મહત્વના વિભાગોના કર્મચારી સંગઠનોએ આયોગ સમક્ષ પોતાની માંગણીઓ મજબૂતીથી રજૂ કરી છે.
અત્યારે 8મા પગાર પંચ સમક્ષ 'પેન્શન સુરક્ષા' સૌથી મોટો અને સંવેદનશીલ મુદ્દો બનેલો છે. કર્મચારીઓ સ્પષ્ટ ઈચ્છે છે કે તેમની રિટાયરમેન્ટ આવક નિશ્ચિત હોવી જોઈએ. ભલે હાલ પૂરતો સરકારનો આ નિર્ણય માત્ર અનુકંપા નિમણૂકો સુધી જ સીમિત હોય અને તેને સંપૂર્ણ OPS બહાલી ન કહી શકાય, પરંતુ આ ઐતિહાસિક નિર્ણયથી 8મા પગાર પંચની ચર્ચાઓમાં પેન્શન સુધારણાની માંગને એક નવો અને મજબૂત અવાજ મળ્યો છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.