7 કરોડ નોકરિયાતો માટે મોટા સમાચાર! EPFO એ વ્યાજદર 8.25% પર જાળવી રાખ્યો, જાણો ખાતામાં ક્યારે આવશે પૈસા?

કર્મચારી ભવિષ્ય નિધિ સંગઠન તરફથી નોકરિયાત વર્ગ માટે એક મહત્વના સમાચાર આવ્યા છે. નાણાકીય વર્ષ 2025-26 માટે EPFO એ પીએફ ખાતા પર વ્યાજદર 8.25% જાળવી રાખવાની ભલામણ કરી છે. આ નિર્ણય સેન્ટ્રલ બોર્ડ ઓફ ટ્રસ્ટીઝની 239મી બેઠકમાં લેવામાં આવ્યો છે.

આ મહત્વની બેઠક કેન્દ્રીય મંત્રી મનસુખ માંડવિયાની અધ્યક્ષતામાં યોજાઈ હતી. જેમાં કેન્દ્રીય રાજ્ય મંત્રી શોભા કરંદલાજે, શ્રમ અને રોજગાર સચિવ વંદના ગુરનાની તેમજ EPFO ના પ્રમુખ રમેશ કૃષ્ણમૂર્તિ પણ વિશેષ રૂપે હાજર રહ્યા હતા.

7 કરોડ મેમ્બર્સના ખાતામાં ક્યારે આવશે પૈસા?

કર્મચારીઓના મનમાં સૌથી મોટો સવાલ એ છે કે વ્યાજના પૈસા ખાતામાં ક્યારે જમા થશે? સેન્ટ્રલ બોર્ડ ઓફ ટ્રસ્ટીઝના નિર્ણય બાદ હવે આ પ્રસ્તાવિત વ્યાજદરને અંતિમ મંજૂરી માટે નાણા મંત્રાલય પાસે મોકલવામાં આવશે. જેવી નાણા મંત્રાલય તરફથી આ દરને લીલી ઝંડી મળશે, કે તરત જ દેશના 7 કરોડથી વધુ ખાતાધારકોના પીએફ એકાઉન્ટમાં વ્યાજના પૈસા જમા થવાની પ્રક્રિયા શરૂ થઈ જશે.

તમારા પીએફ ખાતામાં જે રકમ જમા થાય છે તેના પર દર મહિને વ્યાજની ગણતરી કરવામાં આવે છે, પરંતુ આ વ્યાજની કુલ રકમ નાણાકીય વર્ષના અંતે જ ખાતામાં એકસાથે ઉમેરવામાં આવે છે.

જો કોઈ કર્મચારીનું પીએફ ખાતું સતત 36 મહિના સુધી નિષ્ક્રિય રહે, એટલે કે તેમાં કોઈ રકમ જમા ન થાય, તો તે ખાતું 'ડોર્મન્ટ' કેટેગરીમાં જતું રહે છે. આવા ખાતા પર વ્યાજ મળવાનું બંધ થઈ જાય છે.

અગાઉના વર્ષોમાં કેવો રહ્યો છે વ્યાજદરનો ટ્રેન્ડ?

EPFO એ સળંગ બે વર્ષથી 8.25% નો વ્યાજદર જાળવી રાખ્યો છે. નાણાકીય વર્ષ 2023-24 માં વ્યાજદર 8.15% થી વધારીને 8.25% કરવામાં આવ્યો હતો. જોકે, વર્ષ 2021-22 માં આ દર ઘટીને 8.10% થઈ ગયો હતો, જે છેલ્લા ચાર દાયકાનું સૌથી નીચું સ્તર હતું. અગાઉ 1977-78 માં વ્યાજદર 8% નોંધાયો હતો.

EPFO શું છે? એક ટૂંકી સમજ

એમ્પ્લોઈઝ પ્રોવિડન્ટ ફંડ ઓર્ગેનાઈઝેશનએ ભારત સરકારના શ્રમ અને રોજગાર મંત્રાલય હેઠળ કામ કરતી એક મહત્વની સંસ્થા છે. આ સંસ્થા મુખ્યત્વે કર્મચારીઓની નિવૃત્તિ સમયની બચતનું સંચાલન કરે છે. તે PF, પેન્શન અને જીવન વીમા જેવી ઉપયોગી યોજનાઓ ચલાવે છે.

સંગઠિત ક્ષેત્રમાં કામ કરતા કર્મચારીના પગારમાંથી અને તેમની કંપની તરફથી દર મહિને એક નક્કી કરેલો હિસ્સો આ ફંડમાં જમા કરવામાં આવે છે, જેના પર સરકાર વ્યાજ આપે છે. નોકરી છોડવા પર, નિવૃત્તિ વખતે કે કોઈ વિશેષ જરૂરિયાતના સમયે આ પૈસા સરળતાથી ઉપાડી શકાય છે.

એકંદરે જોઈએ તો, સરકારે આ વખતે વ્યાજદરમાં કોઈ ફેરફાર ન કરીને સ્થિરતા જાળવી છે. આનો સીધો અર્થ એ છે કે, રોકાણકારોને ગયા વર્ષની જેમ જ આ વખતે પણ 8.25% ના દરે આકર્ષક રિટર્ન મળવાનું ચાલુ રહેશે.

આ પણ વાંચો-શેરબજાર માટે મોટા સમાચાર: આખા F&O માં કોઈ સમસ્યા નથી, નિયમો પર થશે વિચાર, સેબી ચીફ તુહીનકાંત પાંડેએ કહી આ મોટી વાતો