પેટ્રોલ પંપ પર UPI પેમેન્ટ કરનારા માટે મોટા સમાચાર, 2000થી વધુના પેમેન્ટ પર MDR ચાર્જ મામલે સરકાર આપી શકે છે મોટી રાહત

પેટ્રોલ પંપ પર પોતાના વાહનમાં ઈંધણ ભરાવીને ઓનલાઈન મેન્ટ કરતા લોકો માટે એક રાહતના સમાચાર સામે આવી રહ્યા છે. નેશનલ પેમેન્ટ કોર્પોરેશન ઓફ ઇન્ડિયા દ્વારા 2000 રૂપિયાથી વધુના UPI ટ્રાન્ઝેક્શન પર મર્ચન્ટ ડિસ્કાઉન્ટ રેટ ચાર્જ લગાવવાનો નિર્ણય લેવાયો છે, જે 15 ઓક્ટોબરથી લાગુ થવા જઈ રહ્યો છે. પરંતુ, સરકારના વરિષ્ઠ સૂત્રોના જણાવ્યા અનુસાર પેટ્રોલ પંપ પર થતા આવા પેમેન્ટને આ ચાર્જમાંથી મુક્તિ મળી શકે છે.

સરકાર કરી રહી છે વિચારણા

સૂત્રોના મતે, ડિપાર્ટમેન્ટ ઓફ ફાઇનાન્સિયલ સર્વિસિસ પેટ્રોલ પંપ ડીલર્સની માંગને ધ્યાનમાં રાખીને તેમને MDR ચાર્જમાંથી રાહત આપવા પર ગંભીરતાથી વિચાર કરી રહ્યું છે. જોકે, આ અંગે અંતિમ નિર્ણય ઉચ્ચ સ્તરીય બેઠક અને ચર્ચા બાદ જ લેવામાં આવશે. હાલમાં આ મામલે નાણા મંત્રાલય અને પેટ્રોલિયમ મંત્રાલય વચ્ચે વાતચીત ચાલી રહી છે.

પેટ્રોલિયમ ડીલર્સ એસોસિએશનની શું છે માંગ?

ઓલ ઇન્ડિયા પેટ્રોલિયમ ડીલર્સ એસિસોસિએશનએ આ મામલે 16 સપ્ટેમ્બરના રોજ દેશના નાણામંત્રી નિર્મલા સીતારમણને એક પત્ર લખ્યો છે. એસોસિએશનના પ્રમુખ અજય બંસલે સરકાર પાસે હસ્તક્ષેપની માંગ કરતા જણાવ્યું છે કે પેટ્રોલ પંપ પર થતા UPI પેમેન્ટને MDR ચાર્જમાંથી સંપૂર્ણપણે મુક્ત કરવામાં આવે.

ડીલરોએ કેમ કર્યો વિરોધ ?

MDR ચાર્જ માફ કરવા પાછળ ડીલરોએ એક મજબૂત દલીલ આપી છે. તેમનું કહેવું છે કે, પેટ્રોલ પંપ ડીલરો માત્ર ફિક્સ માર્જિન પર કામ કરે છે, જે ઓઇલ માર્કેટિંગ કંપનીઓ દ્વારા નક્કી કરવામાં આવે છે. આ માર્જિન ગ્રાહકે કેટલા રૂપિયાનું પેટ્રોલ પુરાવ્યું તેના પર નહીં, પરંતુ કેટલા લિટર ઇંધણ વેચાયું તેના પર આધાર રાખે છે. તેથી, ટ્રાન્ઝેક્શનની રકમ મોટી હોય તો પણ ડીલરોની કમાણી વધતી નથી. આવા સંજોગોમાં ચાર્જ કાપવામાં આવે તો તેમને સીધું નુકસાન થાય છે.