Foreign Remittance: વિદેશમાં કામ કરતા ભારતીયો માટે મોટી રાહત! RBIનો નવો નિયમ, પૈસા મિનિટોમાં ઘર પહોંચશે

Foreign Remittance: વિદેશમાં કામ કરીને પરિવારને પૈસા મોકલતા લાખો ભારતીયો માટે ખુશખબર છે. હવે તેમને ઘણા દિવસો સુધી રાહ જોવી નહીં પડે. ભારતીય રિઝર્વ બેન્ક (RBI)એ એક નવો પ્રસ્તાવ જાહેર કર્યો છે, જેનાથી વિદેશથી આવતા પૈસા ઝડપથી અને સરળતાથી ભારતમાં પરિવારના ખાતામાં જમા થશે. આ પગલાથી ભારતની બેન્કિંગ વ્યવસ્થા વૈશ્વિક ધોરણે પહોંચશે.

પેમેન્ટ વિઝન 2025

RBIએ પોતાના પેમેન્ટ વિઝન 2025 અને G20 રોડમેપ હેઠળ આ ડ્રાફ્ટ માર્ગદર્શિકા જાહેર કરી છે. તેમાં કહેવામાં આવ્યું છે કે વિદેશથી પેમેન્ટ મેળવતી બેન્કોએ વિદેશી મુદ્રા બજારના કામકાજના સમય દરમિયાન મળેલા પૈસા તે જ વેપારી દિવસે ગ્રાહકોના ખાતામાં જમા કરવા પડશે. જો પૈસા બજાર બંધ થયા પછી આવે, તો તેને આગલા કામકાજના દિવસે ટ્રાન્સફર કરવા પડશે. હાલમાં ભારતમાં માત્ર 8-10% વિદેશી રેમિટન્સ એક કલાકમાં ગ્રાહકો સુધી પહોંચે છે, જ્યારે અમેરિકા જેવા દેશોમાં આ આંકડો 75% સુધી છે. RBIના આ પગલાથી ભારતની પેમેન્ટ વ્યવસ્થા વધુ ઝડપી અને વિશ્વસનીય બનશે.

મોડું કેમ થાય છે?

ઘણી વખત મોડું એટલે થાય કે ભારતીય બેન્કો વિદેશી બેન્કોના નોસ્ટ્રો ખાતાના દિવસના અંતના નિવેદન દ્વારા પેમેન્ટની ખરાઈ કરે છે. આ ખાતામાં પહેલા પૈસા આવે અને પછી ગ્રાહકના ભારતીય ખાતામાં મોકલાય. આ પ્રક્રિયામાં મેન્યુઅલ તપાસ અને મોડુંને કારણે સમય વધે છે. હવે RBIએ સૂચન કર્યું છે કે બેન્કો પોતાના નોસ્ટ્રો ખાતાનું મેળાપ “near real-time”માં અથવા મેક્સિમમ દર 30 મિનિટે કરે. વળી, બેન્કોએ ‘straight-through automated system’ વાપરવું પડશે, જેથી માનવીય ભૂલ અને મોડું ઓછું થાય. સાથે જ, ગ્રાહકોને રેમિટન્સની સ્થિતિ રીઅલ-ટાઇમમાં જોવા માટે વેબસાઇટ કે એપ આપવી પડશે.

RBIનો સ્પષ્ટ આદેશ

RBIએ સ્પષ્ટ કર્યું છે કે બેન્કોએ ગ્રાહકોને પૈસા મળવાની જાણ તુરંત આપવી. જો પેમેન્ટ બજારના સમય પછી આવે તો આગલા કામકાજના દિવસની શરૂઆતમાં જાણ કરવી. RBIએ બેન્કો અને અન્ય સંબંધિત પક્ષો પાસેથી આ ડ્રાફ્ટ પર 19 નવેમ્બર સુધી પ્રતિસાદ માંગ્યો છે. અંતિમ નિર્દેશ જાહેર થયા પછી 6 મહિનામાં આ નવા નિયમો અમલમાં આવશે. આ નિયમથી વિદેશમાં રહેતા ભારતીયોને મોટી સુવિધા મળશે અને પરિવારોને તાત્કાલિક આર્થિક મદદ મળી રહેશે.