Central Government Employee Bonus: દિવાળીના પવિત્ર તહેવાર પહેલાં જ કેન્દ્ર સરકારે પોતાના કર્મચારીઓના ખિસ્સા ભરવાનો મોટો નિર્ણય લીધો છે. સરકારે નાણાકીય વર્ષ 2025-26 માટે પાત્રતા ધરાવતા સરકારી કર્મચારીઓ માટે 30 દિવસના નોન-પ્રોડક્ટિવિટી લિંક્ડ (એડ-હોક) બોનસની મંજૂરી આપી દીધી છે. નાણા મંત્રાલયના ખર્ચ વિભાગ (Department of Expenditure) દ્વારા 15 ઓક્ટોબર, 2026 ના રોજ આ અંગેનો સત્તાવાર આદેશ બહાર પાડવામાં આવ્યો છે. સરકારના આ નિર્ણયથી લાખો કર્મચારીઓને દિવાળીની ખરીદીમાં મોટી રાહત મળશે.
દિવાળી પહેલા મોટી ભેટ: કેન્દ્ર સરકારે કર્મચારીઓ માટે 30 દિવસના બોનસની જાહેરાત કરી, જાણો કોને મળશે 6908 રૂપિયાનો લાભ
Central Government Employee Bonus: દિવાળી પહેલા કેન્દ્ર સરકારે કર્મચારીઓને મોટી ભેટ આપી છે. નાણાકીય વર્ષ 2025-26 માટે 30 દિવસના બોનસની જાહેરાત કરાઈ છે. જાણો કોને મળશે 6908 રૂપિયાનો લાભ.
અપડેટેડ 11:35:52 AM Oct 16, 2026 પર
કેન્દ્ર સરકારના આ નિર્ણય હેઠળ કર્મચારીઓને મહત્તમ 6908 રૂપિયા સુધીનું બોનસ ચૂકવવામાં આવશે. આ લાભ મુખ્યત્વે ગ્રુપ 'C' અને બિન-ગેઝેટેડ ગ્રુપ 'B' ના એવા કર્મચારીઓને મળશે.
કોને મળશે આ બોનસનો લાભ?
કેન્દ્ર સરકારના આ નિર્ણય હેઠળ કર્મચારીઓને મહત્તમ 6908 રૂપિયા સુધીનું બોનસ ચૂકવવામાં આવશે. આ લાભ મુખ્યત્વે ગ્રુપ 'C' અને બિન-ગેઝેટેડ ગ્રુપ 'B' ના એવા કર્મચારીઓને મળશે, જેઓ પ્રોડક્ટિવિટી-લિંક્ડ બોનસ સ્કીમમાં આવતા નથી. સેન્ટ્રલ આર્મ્ડ પોલીસ ફોર્સિસ (CAPF) અને સશસ્ત્ર દળોના જવાનોને પણ આ બોનસ આપવામાં આવશે. કેન્દ્ર સરકારના પગાર માળખા મુજબ વેતન મેળવતા કેન્દ્રશાસિત પ્રદેશોના કર્મચારીઓ પણ આ લાભ માટે પાત્ર રહેશે.
બોનસ મેળવવા માટેની જરૂરી શરતો
આ એડ-હોક બોનસનો લાભ મેળવવા માટે સરકારે કેટલીક ચોક્કસ શરતો રાખી છે. કર્મચારીએ વર્ષ 2025-26 દરમિયાન સળંગ ઓછામાં ઓછી 6 મહિનાની નોકરી કરેલી હોવી ફરજિયાત છે. બોનસ મેળવવા માટે કર્મચારી 31 માર્ચ, 2026 ના રોજ સેવામાં ચાલુ હોવો જોઈએ. જે કર્મચારીઓએ 6 મહિનાથી 1 વર્ષ વચ્ચે જ સેવા આપી છે, તેમને તેમના કામના સમયગાળા મુજબ પ્રમાણસર (પ્રો-રાટા) આધારે બોનસ ચૂકવવામાં આવશે. ખાસ કિસ્સાઓમાં જો કોઈ કર્મચારી 31 માર્ચ, 2026 પહેલા નિવૃત્ત થયા હોય, મેડિકલ કારણોસર નોકરી છોડી હોય કે તેમનું અવસાન થયું હોય, તો પણ જો તેમણે વર્ષમાં 6 મહિનાની નિયમિત સેવા આપી હશે તો તેમને બોનસ મળશે. ડેપ્યુટેશન પર રાજ્ય સરકાર કે PSU માં ગયેલા કર્મચારીઓને તે સંસ્થાના નિયમ મુજબ બોનસ મળશે.
કેટલા રૂપિયા મળશે?
કેન્દ્ર સરકારે બોનસ ગણવા માટે માસિક પગારની મર્યાદા 7000 રૂપિયા નક્કી કરી છે. જે કર્મચારીઓનો સરેરાશ પગાર 7000 રૂપિયા કે તેથી વધુ છે, તેમની ગણતરી આ મુજબ થશે: (7000 × 30 ÷ 30.4). આ ફોર્મ્યુલા મુજબ રાઉન્ડ ઓફ કરીને મહત્તમ 6908 રૂપિયા મળશે. જો કોઈ કર્મચારીનો માસિક પગાર 7000 રૂપિયાથી ઓછો હશે, તો તેમને તેમના વાસ્તવિક પગારના આધારે જ બોનસ ચૂકવાશે.
દૈનિક વેતનભોગીઓ માટે પણ ખુશખબર
સરકારે કેઝ્યુઅલ લેબરર્સને પણ આ બોનસનો હિસ્સો બનાવ્યા છે. જોકે, તેમની શરતો થોડી અલગ છે. 6 દિવસ કામ કરતી ઓફિસોમાં મજૂરોએ છેલ્લા 3 વર્ષમાં દર વર્ષે ઓછામાં ઓછા 240 દિવસ કામ કરેલું હોવું જોઈએ. 5 દિવસવાળી ઓફિસોમાં આ મર્યાદા દર વર્ષે 206 દિવસની રખાઈ છે. તેમના માટે માસિક વેતન મર્યાદા 1200 રૂપિયા નક્કી થઈ છે. તેથી તેમને 30 દિવસનું બોનસ 1184 રૂપિયા (1200 × 30 ÷ 30.4) મળશે. જો તેમનો પગાર આનાથી ઓછો હશે તો તે મુજબ રકમ ઘટશે.
બજેટ અને ચૂકવણી
સરકારની ગાઈડલાઈન મુજબ, આ બોનસ પાછળ થતો તમામ ખર્ચ સંબંધિત મંત્રાલયો અને વિભાગોના વર્ષ 2026-27 ના મંજૂર થયેલા બજેટમાંથી કરવામાં આવશે. કહીએ તો, મોંઘવારીના આ સમયમાં દિવાળી ટાણે મળનારું આ 6908 રૂપિયાનું રોકડ બોનસ કેન્દ્રીય કર્મચારીઓના પરિવારો માટે તહેવારની મજા બમણી કરી દેશે.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
