માત્ર 1 એકર જમીનમાંથી રોજના 12,000ની કમાણી, ફૂલોની ખેતીથી લાખો કમાતા મહારાષ્ટ્રના ખેડૂતની સફળતાનું રહસ્ય

સામાન્ય રીતે એવું માનવામાં આવે છે કે ખેતીમાં લાખો રૂપિયા કમાવવા માટે મોટી જમીન હોવી જરૂરી છે. પરંતુ, જો યોગ્ય પાક અને આધુનિક ટેકનોલોજીનો સમન્વય કરવામાં આવે તો નાની જમીનમાંથી પણ જબરદસ્ત કમાણી કરી શકાય છે. મહારાષ્ટ્રના પ્રગતિશીલ ખેડૂત અર્જુન સાબળેએ પોતાની કોઠાસૂઝ અને મહેનતથી આ વાતને સો ટકા સાચી સાબિત કરી બતાવી છે.

પરંપરાગત ખેતીથી આધુનિક ખેતી તરફની સફર

અર્જુનનો પરિવાર પેઢીઓથી ગલગોટા અને સેવંતી જેવા પરંપરાગત ફૂલોની ખેતી કરતો હતો. આ ફૂલો મુંબઈના બજારોમાં વેચાતા હતા. પરંતુ સમય જતા બજારમાં હરીફાઈ વધી અને ફૂલોના ભાવ ઘટવા લાગ્યા. મહેનત વધવા છતાં આવકમાં કોઈ ખાસ વધારો થતો ન હતો. આ જ સમયે અર્જુને ખેતીમાં કોઈ નવો રસ્તો અપનાવવાનો નિર્ણય લીધો.

અભ્યાસ દરમિયાન મળ્યો નવો આઈડિયા

BSc એગ્રીકલ્ચરનો અભ્યાસ કરતા સમયે અર્જુનને અલગ-અલગ ખેતરોની મુલાકાત લેવાની તક મળી. ત્યાં તેમણે પોલીહાઉસમાં થતી ફૂલોની ખેતી જોઈ. વાતાવરણને નિયંત્રિત રાખીને ગુલાબ ઉગાડવાની આ રીત તેમને ખૂબ ગમી ગઈ. તેમણે મોટા રોકાણને બદલે નાના પાયે પ્રયોગ કરવાનું નક્કી કર્યું.

માત્ર 10 ગુંઠા જમીનથી કરી શરૂઆત

અર્જુને શરૂઆતમાં માત્ર 10 ગુંઠા જમીનમાં ગુલાબની ખેતી શરૂ કરી. તેમણે બેંગલુરુના એક ખેડૂત પાસેથી 8,000 રૂપિયાના રોપા ખરીદીને વાવેતર કર્યું. 6 મહિના પછી રોજિંદા 500 ગુલાબનું ઉત્પાદન શરૂ થયું. સ્થાનિક બજારમાં એક ગુલાબ 5 રૂપિયામાં વેચાવા લાગ્યું, જેનાથી તેમને રોજની 2,500 રૂપિયાની આવક થવા લાગી. આ નાનકડી સફળતાએ તેમનો ઉત્સાહ વધાર્યો.