કેન્દ્રીય કર્મચારીઓ માટે ખુશખબર: 25 સપ્ટેમ્બરે જ આવી જશે પગાર અને પેન્શન, જાણો સરકારે કેમ લીધો આ મોટો નિર્ણય!

Central govt employees salary: કેન્દ્ર સરકારના કર્મચારીઓ અને પેન્શન મેળવતા લોકો માટે એક ખૂબ જ સારા અને રાહત આપનારા સમાચાર સામે આવ્યા છે. સામાન્ય રીતે મહિનાના છેલ્લા દિવસે ખાતામાં આવતો પગાર આ વખતે સમય કરતાં વહેલો જમા થવાનો છે. સરકારે સત્તાવાર જાહેરાત કરી છે કે સપ્ટેમ્બર 2026 મહિનાનો પગાર અને પેન્શન 25 સપ્ટેમ્બર 2026, શુક્રવારના રોજ જ ચૂકવી દેવામાં આવશે.

શા માટે 25 સપ્ટેમ્બરે જ પગાર ચૂકવાશે?

સરકારે આ મોટો નિર્ણય આગામી દિવસોમાં આવનારી બેંક હડતાળ અને રજાઓને ધ્યાનમાં રાખીને લીધો છે. નાણા મંત્રાલયના જણાવ્યા અનુસાર, 28 સપ્ટેમ્બરથી 30 સપ્ટેમ્બર વચ્ચે બેંક કર્મચારીઓની 3 દિવસની દેશવ્યાપી હડતાળ પ્રસ્તાવિત છે. આ હડતાળના કારણે બેન્કિંગ અને ક્લિયરિંગ સેવાઓ પર મોટી અસર પડી શકે છે. તે પહેલાં 26 સપ્ટેમ્બરે મહિનાનો ચોથો શનિવાર છે અને 27 સપ્ટેમ્બરે રવિવારની રજા આવે છે. સળંગ રજાઓ અને હડતાળના કારણે મહિનાના અંતમાં સરકારી કર્મચારીઓને પૈસાની કોઈ તકલીફ ન પડે, તે માટે તમામ સરકારી કચેરીઓ, પે એન્ડ એકાઉન્ટ્સ ઓફિસ અને બેંકોને 25 તારીખે જ પગાર જમા કરવાનો આદેશ આપવામાં આવ્યો છે. સાથે જ સપ્ટેમ્બર મહિનાના હાફ-યરલી ક્લોઝિંગના કારણે અન્ય નાણાકીય લેવડદેવડ પણ વહેલી પતાવવા જણાવાયું છે.

ઓક્ટોબરના પગારમાં થશે હિસાબ

સરકારે સ્પષ્ટ કર્યું છે કે 25 સપ્ટેમ્બરે મળતો આ પગાર કે પેન્શન એક 'એડવાન્સ પેમેન્ટ' ગણાશે. જ્યારે સપ્ટેમ્બર મહિનો પૂરો થશે અને આખા મહિનાના પગારની અંતિમ ગણતરી થશે, ત્યારે જો કોઈ રકમમાં વધઘટ હશે, તો તેને કોઈપણ અપવાદ વિના ઓક્ટોબર 2026 ના પગારમાંથી એડજસ્ટ કરી લેવામાં આવશે.

RBIનો મોટો નિર્ણય: 27 સપ્ટેમ્બર, રવિવારે બેંકો ખુલ્લી રહેશે!

હડતાળ અને રજાઓના કારણે સામાન્ય જનતાને સતત કેટલાક દિવસો સુધી હેરાનગતિ ન થાય તે માટે રિઝર્વ બેંક ઓફ ઈન્ડિયા અને નાણા મંત્રાલયે એક ઐતિહાસિક નિર્ણય લીધો છે. 27 સપ્ટેમ્બર 2026, રવિવારના દિવસે દેશની તમામ સરકારી બેંકો અને ગ્રામીણ બેંકો સામાન્ય દિવસોની જેમ જ ખુલ્લી રહેશે. RBI એ બેંકોની તમામ શાખાઓ, કરન્સી ચેસ્ટ અને ATM સાથે જોડાયેલી બ્રાન્ચને રવિવારે રાબેતા મુજબ ચાલુ રાખવાની ખાસ મંજૂરી આપી દીધી છે.