Investment Tips: શું ખરેખર પૂરો થઈ રહ્યો છે FDનો જમાનો? જાણો રોકાણકારો હવે ક્યાં લગાવી રહ્યા છે પૈસા અને કેમ?

FD vs Mutual Funds: ભારતમાં વર્ષો સુધી મધ્યમ વર્ગના પરિવારો માટે બેંક ફિક્સ ડિપોઝિટ (FD), સેવિંગ એકાઉન્ટ અને સોનું જ સુરક્ષિત ભવિષ્યની ગેરંટી ગણાતા હતા. જો બેંકમાં પૈસા પડ્યા છે અને તેના પર 6 થી 7% વ્યાજ મળી રહ્યું છે, તો તેને એક મજબૂત સેફ્ટી નેટ માનવામાં આવતું હતું. પરંતુ હવે સમય બદલાયો છે. વધતી જતી મોંઘવારી, બદલાતી જીવનશૈલીની જરૂરિયાતો અને ઇન્ટરનેટ પર ઉપલબ્ધ જાણકારીએ લોકોને વિચારતા કરી દીધા છે. હવે સવાલ એ ઉભો થયો છે કે, શું માત્ર પૈસા સુરક્ષિત રાખવા પૂરતા છે? આ જ સવાલને કારણે ભારતીય રોકાણકારો હવે પરંપરાગત રીતો છોડીને મ્યુચ્યુઅલ ફંડ, શેરબજાર અને SIP જેવા વિકલ્પો તરફ વળ્યા છે.

શા માટે લોકો FD છોડીને મ્યુચ્યુઅલ ફંડ તરફ વળ્યા?

આજના સમયમાં FDથી મ્યુચ્યુઅલ ફંડ તરફનો ઝુકાવ સ્પષ્ટપણે જોઈ શકાય છે. લોકો હવે એ ગણિત સમજવા લાગ્યા છે કે જો તમારા પૈસા મોંઘવારીના દર કરતા વધુ ઝડપે નથી વધી રહ્યા, તો હકીકતમાં તમારા પૈસાની કિંમત ઘટી રહી છે. આ સ્થિતિમાં SIP (Systematic Investment Plan) એક શ્રેષ્ઠ વિકલ્પ બનીને ઉભરી છે.

પહેલા એવું મનાતું હતું કે શેરબજારમાં રોકાણ કરવા માટે મોટી રકમ જોઈએ, પરંતુ SIP એ આ કામ સરળ કરી દીધું છે. હવે કોઈ પણ વ્યક્તિ દર મહિને માત્ર 5,000 કે 8,000 રૂપિયા જેવી નાની રકમથી પણ બજારમાં રોકાણ શરૂ કરી શકે છે. બજારમાં ઉતાર-ચઢાવ આવે છે, તે નક્કી છે, છતાં ઘણા પરિવારોએ અનુભવ્યું છે કે લાંબા ગાળે ઇક્વિટી (શેરબજાર) આધારિત રોકાણે FD કે સેવિંગ એકાઉન્ટ કરતા અનેકગણું સારું વળતર આપ્યું છે. આજનો રોકાણકાર હવે "માર્કેટ પડશે તો શું થશે?" એ ડરવાને બદલે "લાંબા ગાળે મને શું મળશે?" તેના પર વધુ ધ્યાન આપી રહ્યો છે.

રોકાણના આ બદલાવ પાછળ માત્ર પૈસા કમાવવાની લાલચ નથી, પરંતુ માનસિકતામાં આવેલો બદલાવ પણ જવાબદાર છે. પહેલાના જમાનામાં લોકો જોખમ એટલે કે રિસ્ક લેવાથી ડરતા હતા. હવે લોકો જોખમને સમજીને તેને સ્વીકારતા થયા છે. હવે રોકાણકારો પોતાના પોર્ટફોલિયોને ડાઈવર્સિફાય કરી રહ્યા છે. એટલે કે તેઓ બધો રૂપિયો એક જગ્યાએ નથી રોકતા, પણ થોડી રકમ FDમાં, થોડી મ્યુચ્યુઅલ ફંડમાં, કેટલાક ડાયરેક્ટ શેરમાં અને હવે તો ઘણા લોકો ઇન્ટરનેશનલ ફંડ કે ETFમાં પણ રોકાણ કરી રહ્યા છે.

જોકે, આ નવા રસ્તા પર થોડું ટેન્શન પણ મળે છે. જેવું માર્કેટ થોડું નીચે જાય કે તરત જ મોબાઈલમાં પોર્ટફોલિયો ચેક કરવો અને થોડી ગભરામણ થવી—આ બધું આજના ડિજિટલ રોકાણનો એક ભાગ બની ગયું છે. પરંતુ સારી વાત એ છે કે લોકો હવે શીખી રહ્યા છે કે બજારમાં પૈસા બનાવવા માટે ધૈર્ય અને શિસ્ત સૌથી મહત્વના છે.

પૈસાની સાથે પારિવારિક સંબંધો પર પણ અસર

આ આર્થિક બદલાવની અસર માત્ર બેંક બેલેન્સ પૂરતી સીમિત નથી રહી, પરંતુ તેની અસર ઘરના સંબંધો પર પણ પડી છે. પહેલાના સમયમાં રોકાણના નિર્ણયો ઘરના વડીલ કે માત્ર પુરુષો લેતા હતા. હવે ચિત્ર બદલાયું છે. હવે પતિ-પત્ની સાથે બેસીને ફ્યુચર પ્લાનિંગ કરે છે.

આટલું જ નહીં, હવે બાળકો પણ નાનપણથી સમજવા લાગ્યા છે કે પૈસા કેવી રીતે વધે છે અને ક્યારે ઘટી શકે છે. ઘરમાં પૈસાને લઈને હવે ખુલીને વાતચીત થાય છે અને ફાઇનાન્શિયલ લિટરસી વધી છે. આજના ભારતીય પરિવાર માટે આર્થિક સુરક્ષાનો અર્થ હવે માત્ર ગેરંટીડ રિટર્ન નથી, પરંતુ સાચું પ્લાનિંગ, સમજી-વિચારીને લીધેલું રિસ્ક અને ભવિષ્ય માટેની તૈયારી છે. આ જ 7% રિટર્નથી આગળ વિચારતી નવી સોચ છે.

આ પણ વાંચો-સાયબર ક્રિમિનલ્સની હવે ખેર નથી! અમિત શાહનો મોટો એક્શન પ્લાન: 1930 હેલ્પલાઈન અને બેંકોને આપ્યા કડક આદેશ