Joint Home Loan: જોઈન્ટમાં હોમ લોન લીધી હોય અને એક પાર્ટનરનું મોત થઈ જાય તો EMI કોણ ભરશે? જાણો લેટેસ્ટ નિયમ

Joint Home Loan: પોતાનું ઘર ખરીદવું એ દરેક વ્યક્તિનું સપનું હોય છે. આજના મોંઘવારીના સમયમાં રિયલ એસ્ટેટના ભાવ આસમાને પહોંચી ગયા છે. તેથી, લોકો પોતાનું સપનું પૂરું કરવા માટે બેંકમાંથી જોઈન્ટ હોમ લોન લેવાનું વધુ પસંદ કરે છે.

જોઈન્ટ લોન લેવાનો સૌથી મોટો ફાયદો એ છે કે બે લોકોની આવક ભેગી થવાથી મોટી રકમની લોન આસાનીથી મળી જાય છે અને દર મહિને આવતો EMI નો બોજ પણ બંને વચ્ચે વહેંચાઈ જાય છે. મોટાભાગે પતિ-પત્ની, પિતા-પુત્ર, માતા-પુત્ર કે માતા-પુત્રી સાથે મળીને આવી લોન લેતા હોય છે. આ માટે બંને પાર્ટનરની નિયમિત આવક હોવી જરૂરી છે.

પરંતુ, જિંદગીનો કોઈ ભરોસો નથી હોતો. જો લોન ચાલતી હોય અને તે દરમિયાન બેમાંથી કોઈ એક પાર્ટનરનું અચાનક મૃત્યુ થઈ જાય તો શું થશે? શું બેંક બાકીની લોન માફ કરી દે છે કે પછી બીજા પાર્ટનરે પૈસા ભરવા પડે છે? આ એક એવો સવાલ છે જે દરેક લોન લેનારને મૂંઝવતો હોય છે. ચાલો જાણીએ આ અંગેના નિયમો શું કહે છે.

જીવિત પાર્ટનર પર આવે છે સંપૂર્ણ જવાબદારી

જ્યારે તમે જોઈન્ટમાં હોમ લોન લો છો, ત્યારે લોન ચૂકવવાની જવાબદારી પણ બંનેની સરખી હોય છે. જો કોઈ દુર્ઘટના કે બીમારીના કારણે એક પાર્ટનરનું મૃત્યુ થાય, તો બેંક બાકીની EMI માફ કરતી નથી. બેંકના નિયમો મુજબ, આવી સ્થિતિમાં બાકીની તમામ લોન ચૂકવવાની સંપૂર્ણ જવાબદારી જીવિત પાર્ટનરના માથે આવી પડે છે.

જો EMI ન ભરો તો શું થાય?

હોમ લોન એ સિક્યોર્ડ લોન છે, જેમાં તમારું ઘર બેંક પાસે ગીરવે મૂકેલું હોય છે. જો હયાત પાર્ટનર બાકીની EMI સમયસર ન ભરી શકે અથવા લોન ચૂકવવામાં નિષ્ફળ જાય, તો બેંકને પૂરો અધિકાર છે કે તે કાયદેસરની કાર્યવાહી કરીને ઘરને જપ્ત કરી શકે છે. ત્યારબાદ બેંક પ્રોપર્ટીની હરાજી કરીને પોતાના પૈસા વસૂલ કરી શકે છે. આવી સ્થિતિમાં પરિવાર પર ઘરવિહોણા થવાનું સંકટ આવી શકે છે.