હવે FASTag પરથી બિનજરૂરી ટોલ કપાશે નહીં! સરકારે ટોલ ઓપરેટરો પર કડક પકડ બનાવી, ખોટી કપાત બદલ 1 લાખનો દંડ!

તમે ઘણી વાર સાંભળ્યું હશે કે તમારું વ્હીકલ પાર્કિંગમાં પાર્ક કરેલું હોય છે છતાં પણ FASTag માંથી પૈસા કપાઈ જાય છે. આવું ઘણા લોકો સાથે વારંવાર બનતું હતું, પરંતુ હવે સરકારે તેની સામે કડક કાર્યવાહી કરવાનું શરૂ કર્યું છે. નેશનલ હાઇવે ઓથોરિટી ઓફ ઇન્ડિયા (NHAI)એ ખોટી ટોલ કપાતના 250થી વધુ કેસોમાં ટોલ ઓપરેટરો પર 1 લાખ રૂપિયા સુધીનો દંડ ફટકાર્યો છે. આ પગલા પછી, આવા કેસોમાં 70% ઘટાડો થયો છે.

ટોલ પ્લાઝા પર રેડિયો ફ્રીક્વન્સી આઇડેન્ટિફિકેશન (RFID) ટેકનોલોજી દ્વારા FASTagનો ઉપયોગ થાય છે, જે રોકાયા વિના ટોલ ટેક્સ કાપવામાં મદદ કરે છે. પરંતુ ક્યારેક ખોટા નંબર એન્ટ્રી અથવા સિસ્ટમ ભૂલને કારણે પૈસા કપાઈ જાય છે. ફરિયાદ નોંધાવ્યા પછી, મામલાની તપાસ કરવામાં આવે છે અને જો ખોટી કપાત જોવા મળે છે, તો પૈસા પરત કરવામાં આવે છે.

NHAI દ્વારા તમામ વ્હીકલો માટે FASTag ફરજિયાત બનાવવામાં આવ્યું છે. તેનો ઉદ્દેશ ટોલ પ્લાઝા પર ભીડ ઘટાડવાનો, ફ્યુઅલ બચાવવાનો અને ડિજિટલ ટ્રાન્જેક્શનને પ્રોત્સાહન આપવાનો છે. FASTag દ્વારા પેમેન્ટ ઓટોમેટિક છે અને તેને મોબાઇલ એપ્લિકેશન દ્વારા રિચાર્જ કરી શકાય છે.

દરેક ખોટી કપાત માટે 1 લાખ રૂપિયાનો દંડ

રિપોર્ટ અનુસાર, NHAIની ટોલ મેનેજમેન્ટ બોડી IHMCL હવે આવા કિસ્સાઓમાં 1 લાખ રૂપિયાનો દંડ વસૂલ કરે છે. એક અહેવાલ મુજબ, આ ભારે દંડને કારણે આવી ઘટનાઓમાં 70% ઘટાડો થયો છે. હાલમાં, IHMCL ને દર મહિને આવી લગભગ 50 ફરિયાદો મળે છે જ્યારે રાષ્ટ્રીય ધોરીમાર્ગ ટોલ પ્લાઝા પર 30 કરોડ FASTag ટ્રાન્જેક્શન થાય છે.

અધિકારીએ શું કહ્યું?

IHMCL ના એક વરિષ્ઠ અધિકારીના જણાવ્યા અનુસાર, કસ્ટમર્સ સોશિયલ મીડિયા પ્લેટફોર્મ પર અને IHMCL ને ઔપચારિક ફરિયાદો દ્વારા ખોટી ટોલ કપાતની જાણ કરી શકે છે. આ ઉપરાંત, તમે 1033 પર કૉલ કરીને અથવા falsededuction@ihmcl.com પર ઇમેઇલ કરીને ફરિયાદ નોંધાવી શકો છો.