PF Limit Hike: નોકરીયાત વર્ગ માટે મોટા સમાચાર! આજે કેબિનેટ બેઠકમાં EPF લિમિટ 15,000 થી વધારી 25,000 કરવા પર લાગી શકે છે મહોર

PF Limit Hike: પ્રાઇવેટ સેક્ટરમાં કામ કરતા લાખો કર્મચારીઓ માટે આજે એક ખૂબ જ મોટા અને ખુશીના સમાચાર આવી શકે છે. કેન્દ્ર સરકાર નોકરીયાત વર્ગને એક મોટી ભેટ આપવાની તૈયારીમાં છે. આજે મળનારી મોદી કેબિનેટની મહત્વની બેઠકમાં એમ્પ્લોઈઝ પ્રોવિડન્ટ ફંડ (EPF) અને એમ્પ્લોઈઝ પેન્શન સ્કીમ (EPS) માટેની ફરજિયાત સેલરી લિમિટ વધારવા અંગે મોટો નિર્ણય લેવાઈ શકે છે.

પ્રસ્તાવ મુજબ, આ લિમિટ હાલના 15,000 થી વધારીને 25,000 પ્રતિ માસ કરવામાં આવી શકે છે. જો આ પ્રસ્તાવ પાસ થશે, તો લાખો નવા કર્મચારીઓ ઓટોમેટિક પીએફ (PF) અને પેન્શનના દાયરામાં આવી જશે.

એક દાયકા કરતા વધુ સમય બાદ બદલાશે નિયમ

તમને જણાવી દઈએ કે પીએફની આ લિમિટ છેલ્લે 1 સપ્ટેમ્બર 2014 ના રોજ વધારવામાં આવી હતી. ત્યારે તેને 6,500 થી વધારીને 15,000 કરવામાં આવી હતી. હાલનો નિયમ એવો છે કે જે કર્મચારીઓની બેઝિક સેલરી અને મોંઘવારી ભથ્થું (DA) મળીને 15,000 સુધી થાય છે, તેમના માટે EPF અને EPS માં યોગદાન આપવું ફરજિયાત છે. તેનાથી વધુ પગારવાળા માટે આ મરજિયાત છે. હવે આ લિમિટ 25,000 થવાથી મધ્યમ વર્ગના લાખો લોકો સામાજિક સુરક્ષા હેઠળ કવર થઈ જશે.

આ નિર્ણયથી કર્મચારીઓના ખિસ્સા અને બચત બંને પર સીધી અસર જોવા મળશે:

ઇન-હેન્ડ સેલરી ઘટશે: જે કર્મચારીઓનો બેઝિક પગાર 15,000થી 25,000ની વચ્ચે છે અને જેઓ અત્યાર સુધી પીએફ નહોતા કપાત કરાવતા, તેઓ હવે ફરજિયાત પીએફના દાયરામાં આવશે. પીએફની કપાત બેઝિક સેલરીમાંથી થતી હોવાથી, દર મહિને તમારા બેન્ક એકાઉન્ટમાં આવતો પગાર થોડો ઓછો થઈ શકે છે.

બચતમાં જબરદસ્ત વધારો: પગાર ભલે થોડો ઘટે, પરંતુ આ પૈસા તમારી જ રિટાયરમેન્ટ બચતમાં જમા થશે. જેનાથી ભવિષ્ય સુરક્ષિત બનશે અને લાંબા ગાળે તમારી પાસે મોટું ફંડ ભેગું થશે.

કંપનીઓ પર આર્થિક બોજ ન વધે તેની ખાસ વ્યવસ્થા

સરકારે આ પ્રસ્તાવમાં એક ખૂબ જ પ્રેક્ટિકલ રસ્તો કાઢ્યો છે. સેલરી લિમિટ ભલે 25,000 થઈ જાય, પરંતુ કંપનીઓ પર અચાનક મોટો આર્થિક બોજ ન પડે તે માટે તેમને જૂની 15,000ની લિમિટ પર જ પોતાનો હિસ્સો ગણવાની છૂટ મળી શકે છે. એટલે કે, કંપનીઓનું યોગદાન જૂના સ્તર પર જ સીમિત રહી શકે છે, જ્યારે કર્મચારીઓનો પીએફનો વ્યાપ વધી જશે.

ડિજિટલ કોમ્યુનિકેશન કમિશન થશે નાબૂદ?

આજના આર્થિક સુધારાઓની સાથે સાથે વહીવટી સુધારા પર પણ મોટી ચર્ચા થશે. સૂત્રોના જણાવ્યા અનુસાર, કેબિનેટ બેઠકમાં ટેલિકોમ સેક્ટરની સર્વોચ્ચ નિર્ણય લેનારી સંસ્થા ગણાતા 'ડિજિટલ કોમ્યુનિકેશન કમિશન (DCC)' ને સંપૂર્ણપણે ખતમ કરવાના અલગ પ્રસ્તાવ પર પણ વિચાર કરવામાં આવી રહ્યો છે.

2014 પછી મોંઘવારી અને પગારના માળખામાં ઘણો મોટો બદલાવ આવ્યો છે. 25,000ની આ નવી લિમિટ અસંગઠિત અને પ્રાઇવેટ સેક્ટરના કર્મચારીઓને નિવૃત્તિ માટે એક મજબૂત સપોર્ટ આપશે. આજના કેબિનેટના નિર્ણય બાદ EPFO દ્વારા જલ્દી જ આ અંગેની વિસ્તૃત ગાઈડલાઈન જાહેર કરવામાં આવી શકે છે.

આ પણ વાંચો- ‘અમેરિકાએ જે કરવું હોય તે કરે, અમે કોઈનાથી ડરતા નથી', 100% ટેરિફની ધમકી પર ભારતનો રોકડો જવાબ